Exodo 32 - Old Testament Quechua Wanca（QVW）

Wäcactanu taytachactam ürupi lulapäcun

1Ñatac Moises ulꞌüpi manaña cuticälimuptinmi nunacunaca Aaronman cunćhacaycälil nicuyalcan: “Chay Moises Egiptopi julaycamäśhanchiccäta imapis pasälunñaćh; manañamá yaćhanchicñachu. Apuraylla juc taytachacunacta lulaycälipamay puśhamänanchicpä” nil.

2Niptinmi Aaron: “Chayurá walmiquicuna, walaśh wamla chuliquicuna ürupi ćhulacuśhan arïtincunacta ućhilculꞌari apapämuy” nin.

3Niptinmi jinantin nunacunaca ürupi cä arïtincunacta quiquincuna julacalcälil Aaronman apapämula.

4Aaronñatacmi ćhasquiycul lluy chullüchila. Jinalculmi sinsilwan wäcactanu taytachacta luläla.

7Chaymi Moisesta Tayta Dios nin: “Wayra cutilpuy, Egiptopi julamuśhayqui malcayquim mana allinman śhaticacälälin.

8Manaläpis ancha unaytam caminup lipäcunanpä nishaccäpi munayninmannu japächacälälin. Chaymari üructa chullulcachil wäcacta lulacalcälil alawayalcan, uycunancunacta uycuyalcan: ‘Israel läducuna, caymi Egiptopi julaycuśhüniqui taytachayqui’ ” nil.

9Chaynütacmi Moisesta Tayta Dios nin: “Cay nunacunäta licayculmi tantiaycú maynu cullu linli malca capäcuśhanta.

10Canan caćhaycamay, śhunꞌú timpuśhanmannu paycunacta camacaycünäpä. Ampa milayniquipïñatacmi ichá jatun malcacta śhalcachishä” nil.

11Niptinmi Tayta Diosta jawcayachiyninwan Moises nicuyan: “Taytallay, ¿sumä maquiquiwan, sumä munayniquiwan Egiptopi julaycamuśhayqui malcayquipi imapïmi śhunꞌuyqui timpucuyan?

12Egiptocunaca: ‘Ulꞌucunäćhu camacänanpämi, cay pachäpi chincächinanpämi julülun’ nipäcunantá amari munaycuychu. Chaynu ¿pasanantachun munayanqui imatá? Piñacuypi śhunꞌuyqui amañari timpuyächunchu. Cay malcayquita amari mućhuycachiychu.

13Nunayqui Abrahamman, Isaacman, Jacobman limalicuśhayquitari yalpalcullay. Anmi nilanqui: ‘Uyllurcunätanümi achca-achcaman milayniquicunacta milachishä.

14Chaymi Tayta Dios chay piñacuyninćhu malcanta camacaycünanpi manalcülaña.

15Chaypïtam chay ulꞌüpïta Moises jiꞌalpamula lumipi ishcay tablachaćhu cä camachicuyta apaculcul. Chay lumipi tablachaćhümi pulan lädućhu isquirbïsha cala.

16Quiquin Tayta Diosmari chay lumipi tablachacunäta lulala. Quiquintacmi chay tablachaćhu cä camachicuycätapis isquirbiycula.

17Ñatac Josuemi malcap apaliynincunacta uyalil Moisesta nin: “Gïrranacuyćhu cayal apaliycunactam uyalí” nil.

18Niptinmi Moises: “Manam llallïpa apaliyninchu. Manatacmi llallichicüpa apaliyninpischu. Alaway taquicunactam uyaliyá” nin.

19Chay Israel caśhtacunaca caśhancäman Moises ćhälulmi wäca luläśhactapis licälul, jinaman tuśhuyalcäta licälul śhunꞌunpis sumä-sumäta timpucuyan. Chaymi lumipi apaśhan tablachätapis chapïluptin ulꞌüpa saytanćhu amshülun.

20Chaypïtam malta wäca lulaśhanta cañaycul, ñutuy-ñutuyta amshulcul, yacüman jitaycul lluy Israel läducunäta upyächila.

21Jinalculmi Aaronta nin: “¿Imanäśhulanquimá cay nunacunaca? ¿Imapïmi jatu-jatun juchaman jitaycülanqui?” nil.

22Niptinmi Aaron: “Taytay, ama piñacuychu. Tuquictam yaćhanqui cay nunacunaca mana allin lulayllapi wañupaculcäśhanta.

23Paycunam nipämäla: ‘Chay Moises Egiptopi julaycamäśhanchiccäta imapis pasälunñaćh; manamá yaćhanchicñachu. Juc taytachacta lulaycälipamay puśhamänanchicpä’ nil.

24Nipämaptinmi nilá: ‘Üruyücunaca üruyquita apapämuy’ nil. Niptïmi lluy apälälimun. Chay üructa chullüchiptïmi wäca yalämuña” nin.

25Chayćhümi Moises tantiäla malcaca munaśhanta lulaculcänanpä Aaron caćhaycuśhanta. Chaynütacmi tantiäla ćhïnicünincuna jamuyal burlaculcänanpä canantapis.

26Chaymi Moises chay jamapäcuśhanpa puncunćhu śhaycucuycul nin: “Tayta Diospa cäcunaca yaꞌaman aśhuycälimuy” nil. Niptinmi levitacunaca lluy aśhuycälila.

27Chaymi paycunacta Moises nin: “Israelpa Tayta Diosninmi caynüta nin: ‘Ispädayquita-cama apticalcälil cutipäcuy jamapäcuśhayquiman. Chayćhu chucllan-chucllan yaycuycul wawꞌi-caśhayquitapis, apanacuśhayquitapis, bisinuyquitapis wañuchiy’ ” nil.

28Chaynu nishanta levitacunaca lulaycälilmi quimsa walangacta (3,000) wañülächila.

29Chayćhümi Moises nin: “Mana cäsucu wawꞌi-caśhayquicunactapis, chuliquicunactapis wañuchipäcuśhayqui-laycum canan allinpä licaycuśha capäcunqui. Chaymi canan Tayta Diospa sirbïnin capäcuśhayquita tantiaycälichishunqui” nil.

30Chay walantinñatacmi Israel caśhtacunäta Moises nin: “Amcuna jatu-jatun juchactam lulälälinqui. Chaymi Tayta Diosman canan ishpishä, ichapis mañacuptí pampachaycälishunquimanpis” nil.

31Nilculmi Tayta Diosman caśhan cutilcul nin: “Taytallay, cay malcaca ürupïta taytachacta lulaśhanwan jatu-jatun juchactam lulälälin.

32Ama chaynu callaychu, juchallanta pampachaycullayꞌari. Mana pampachayculꞌa wiñay cawsay librupïtapis śhutïta julüluy” nil.

33Niptinmi Tayta Dios: “Mayanpis juchacücällactam librupïta juluycuśha.

34Chayurá nishäcäman malcäta wayra puśhay. Caćha anjilnïmi puśhaycuśhunqui. Chay mućhuycachinä muyuncäćhüñam juchancunapïta mućhuycachishä” nin.

35Chaynu Aaron, wäca lulaśhanta alawapäcuśhanpïmi Tayta Dios sumä sasachacuyta malcaman ćhächila.