Levitico 9 - Old Testament Quechua Wanca（QVW）

Aaronmi sasirdüti lulayninta allaycun

1Pusä muyuncäćhüñatacmi Aaronta, chulintinta, malcap yaśhancunactawan Moises ayachimula.

2Chayćhümi Aaronta nin: “Juc malta wäcactam juchayquipi Tayta Diospä uycunqui. Chaynütacmi cañaywan uycunayquipäpis juc ulu uwishta uycunqui. Chay pulanpis allinnin uywacunam caycunꞌa.

3Jinantin Israeltañatacmi ninqui: ‘Juchayquipi Tayta Diosman uycälinayquipä juc capishtam apapämunqui. Chaynütac cañaywan uycälinayquipäpis watayu allinnin malta wäcacta, uwishtam apapämunqui. Chaycuna allinnin uywacunam capäcunꞌa.

4Chaynütacmi allin cawsaśhayquipi juc wäcacta, ulu uwishta uycälinqui. Jinaman chaqui ćhacla micuy asaytiwan chapüśha micuycunactapis uycapämuy. Cananmari Tayta Dios imanuy caśhantapis licapäcunqui’ ” nil.

5Niptinmi tincuna carpap puncuncama lluy Israel caśhtacunaca Moises nishantanu apapämula. Chay Tayta Diospa ñawpäninćhümi lluy śhäcapäcula.

6Chayćhümi Moises nin: “Cay quiquin Tayta Dios nishanta lulapäcuptiquiꞌa paypa sumä cayninmi amcunaćhu camalacunꞌa” nil.

7Nilculmi Aaronta Moises nin: “Uycuna patacman aśhuycul juchayquipi uycuy. Chaynütac ampis, Israel caśhtacunäpis chuyanchaculcänayquipä cañaywan uycunayquita uycuy. Jinaman Tayta Dios nishannu Israel caśhtacunaca allin cawsaycälishanpi uycuytac” nil.

8Chaymi Aaron chuyanchaśha cananpä uycuna patacman malta wäcacta puśhaycul muꞌula.

9Chulincunañatacmi chay yawarta Aaronman aśhuycachipula. Chaymi chay yawarman dïdunta challpuycul uycuna patacpa wälaniläninman llusiycula. Parti puchücätañatacmi uycuna patacpa ćhaquinman chächuycula.

10Chaypïta Tayta Dios Moisesta nishannümi chay uywap allashquinćhu, ñatinninćhu, ishcaynin lulunninćhu wilancunactapis lluy lulunnintinta, uycuna pataccäćhu cañaycula.

11Ñatac aychantawan utantam ichá jamapäcuśhanpa waśha lädunćhu cañäla.

12Chaynütacmi cañaywan uycunanpä apaśhan uywactapis Aaron ćhipïla. Chulincuna chay yawarta apaycuptinñatacmi uycuna patacpa muyülïninman Aaron jićhaycula.

13Chaynütacmi chay umantawan aycha wartuśhyäśhanta apaycapäcula. Aaronñatacmi chay uycuna pataccäćhu cañaywan uycula.

14Chaynütac allashquincunacta, ćhaquincunactapis lluy paꞌalcul chay aychätawan cuscacta uycuna pataccäćhu cañaycula.

15Chaynütacmi malca-masincuna chuyanchaycuśha cananpä Tayta Diosman Aaron uycula. Chaymi camachishanmannu malca chuyanchaycuśha cananpä apamuśhan capishcäta muꞌula. Chaytapis punta lulaśhantanümari uycula.

16Camachisha caśhanmannümá chay uywacta cañaywan uycula.

17Chaynütacmi ćhacla micuy uycunactapis uycula. Chaypïtam juc apticta aptilcul uycuna pataccäćhu cañaywan uycula. Chaynu uycula achicäluptin Tayta Diosta alawaycuyninwan cañaywan uycuśhanwan cuscactam.

18Chaynütacmi malcaca allin cawsaśhanpiLev 3.1-11. Tayta Diosman uycapäcuśhan wäcactapis, ulu uwishtapis muꞌula. Chulincuna chay uywap yawarninta apapäcuptinñatacmi uycuna patacpa muyülïninman Aaron chächuycula.

19Chaynütacmi uycapäcula wäcap, ulu uwishpa lluy wilancunacta: ćhupanćhu, allashquincunaćhu, lulunninćhu, ñatinninćhu cä wilancunactapis.

20Chay wilancunactam pïchuntawan jucllachaycula. Jinalculmi uycuna pataccäćhu Aaron cañaycula.

21Pïchuntañatacmi allï caćhpantawan Aaron altuman pallalcul Tayta Diosman uycula. Chaynu lulaycula Moisesman Tayta Dios camachishanmannümari.

22Jinalculmi Aaron maquinta pallalcul malcaca allin capäcunanpä nila.Num 6.22-26. Chaypïta juchanpi uycuśhanpi, cañaywan uycuśhanpi, allin cawsaśhanpi uycuśhancunätapis uyculmi uycuna patacpi yalucula.

23Jinamanñatacmi tincuna carpaman Aaronwan Moises yaycapäcula. Chaypi yalamulñatacmi malcaca allin capäcunanpä niycula. Chayćhu Tayta Diosmi sumä cayninta malcantinman camalachicula.

24Chay Tayta Diospa cayninpi nina yalalcamulmi uycuna patacćhu cañaycuśha cä aychacunätawan, wilacunäta camacaycüla. Chaynu lulaśhanta licälulmari lluy Israel caśhtacunaca pampäcama uyshucaycälil unꞌulacaycälila, jinaman alawapäcula.