2 Cronicas 32 - Old Testament Quechua Wanca（QVW）

Juda läductam mandacü Senaquerib cunćhacaycälin 2Rey 18.13—19.37; Isa 36—37

1Chaynu mandacü Ezequias Tayta Dios munaśhanmannu sumä lulaycuyaptinmi, Asiriap mandacünin Senaquerib jinantin Juda läduman śhapämula. Jinalculmi sumä murälläśha malcancunap muyülïninman lluy cunćhacaycälila.

2Chaynu Jerusalenman yaycamunanpä Senaquerib ćhämuśha cacuyaptinmi Ezequias

3lluy puydïcunäta, alli-cama pilyäcunäta nin: “Malcap waśha muyülïninćhu pucyucunäta wićhäśhun” nil. Niptinmi paycuna awnipäcula.

4Chaymi achca-achca nunacuna juntunacuycul lluy pucyucunäta, siquianpa waśhaman yalücunätapis wićhälälila: “Asiriap mandacünin ćhalälimul ima yacullactapis mana talipäcunanpä” nil.

5Chaypi Ezequias sumä callpanchaculculmi lluy murällacta śhalcachiyta allacuycula. Waśha lädupapis juc murällactam śhalcachila. Jinamanmi täpananpä türrictapis śhalcachila. Chaynütacmi Davidpa Malcanćhu cä Miloctapis murällachila; ispädacunactapis, atajachicucunactapis achca-achcactamari lulachila.

6Chaypïtam pilyäcunäpa puydïnincunacta ćhulaycula. Jinalcul malcap puncunpa chimpan patyuman juntuycachilmi callpanchäla cay nil:

7“Callpanchaculcay, balurchaculcay. Asiriap mandacünintawan achca-achca śhamü pilyänincunacta ama manchaculcaychu nï jucmanyapäcuychu. Yaꞌanchicwanꞌa cäcämi paycunapïta mas munayniyu cayan.

8Paycuná nunacunäpa callpallanwanmi cayalcan; yaꞌanchicñatacmi ichá sumä munayniyu Tayta Diosninchicwan cayanchic yanapamänanchicpä yaꞌanchicpi pilyananpä” nil. Chaynu Juda lädup mandacünin Ezequiasta uyalipäculmi malcaca callpanchaculcäla.

9Chaypïta Asiriap mandacünin Senaqueribñatacmi lluy pilyänincunawan Laquis malcacta cunćhalayalcal puydïnincunacta Jerusalenman caćhäla. Chay Juda lädup mandacünin Ezequiastawan Jerusalenćhu lluy cäcunäta caynu ninanpämari caćhala:

10“Asiriap mandacünin Senaqueribmi caynu nin: ‘Lluy cunćhäśhaña cayalcal, ¿imamantá chalapaculcanqui Jerusalenćhu jawca cayalcänayquipä?

11¿Manachun Ezequias ingañayalcäśhunqui “Tayta Diosninchicmi mandacü Asiriap maquinpïta libraycamäśhun” nishanwan imatá? ¿Payꞌa micuypi yacupi manachun wañülächishunqui imamá?

12¿Imanuypatá chay taytachaca salbaycälishunquiman quiquin Ezequiel uycuna patacta chincayächiptin? ¿Manachun Juda lädućhu, Jerusalenćhu cäcunäta jucllay uycuna patacllaćhüña alawaycunanpä niycula imamá?

13¿Manachun yaćhapäcunqui awquillücunapi, jinantin pachäćhu cä nasyuncunäta imacta lulapäcuśhätapis imamá? Chay nasyuncunap taytachancuna maquïpïta libraycuyta manamá atipapäculachu.

14¿Awquillücuna camacaycuśhan nasyuncunap mayannin taytachallanꞌa, malcanta maquïpïta librayculatan? Chaychun ¿diosniquilä maquïpïta libraycälishunquiman imatá?

15Chayurá Ezequiaswan ama ingañachicuyalcaychu nï pantachicuyalcaychu, nïtac awniyalcaypischu. Chay nasyuncunap taytachancuna malcanta yaꞌapïta, awquillücunapïta mana libraycuyta atipayalcaptinꞌa, ¿imanuypatá maquïpïta diosniqui libraycuśhunquiman?’ ” nil.

16Chaynu Senaqueribpa willacünincuna nilcälilmi Tayta Diospa cuntran, jinaman Diospa sirbïnin Ezequiaspa cuntran mastalä nipäcula canpis.

17Jinaman Senaqueribꞌa Israelpa Tayta Diosninta jalutacuyninwanmi cartacta isquirbichila: “Lluy nasyuncunap taytachancuna maquïpïta libraycuyta mana atipayalcaptinchun, ¿Ezequiaspa diosnillan maquïpïta libraycülunman ampá?” nil.

18Chaypïta Senaqueribpa puydïnincunam hebreo limayćhu apalcaćhaypa nipäcula Jerusalenpa pilancunaćhu cäcunaca chucchupäcunanpä. Chaynu nipäcula jucmanyäśha cacuyalcaptin malcanta pudiracuycunanpämari.

19Chaynu Jerusalen nunacunap Tayta Diosninpïtá cuntran limala nunacunallap lulaśhan juc malcacunaćhu cä taytachancunapi-yupayllamari.

20Chaymi mandacü Ezequiaswan Amozpa chulin willacü Isaias, janay pachäćhu cäcäta mañaculcäla.

21Jinaptinmi Tayta Dios anjilninta caćhämuptin alli-cama pilyäcunäta, Asiriap mandäninpa puydïnincunactapis camacaycüla. Chaymi Senaquerib pinꞌacüśha malcanta cutilcul taytachanpa uycunanman yaycuycuptin quiquinpa chulincunalla ispädawan wañüchila.

22Chaynüpamari Ezequiasta Jerusalenćhu lluy cäcunäta Tayta Dios salbaycula Asiriap mandacünin Senaqueribpa maquinpïta, chaynütac lluy ćhïnicünincunapïtapis. Jinalculmi lluy malcacunäwan jawcacta cawsaycachila.

23Chaymi achca nunacuna Jerusalenman uycunancunacta Tayta Diospa apapämula. Judapa mandacünin Ezequiaspäpis alli ćhaniyu rigälucunactam apapämula. Chaypunpïmari juc nasyuncunaćhüpis Ezequias lisisha cacula.

Ezequiasmi ishyaśhanpïta allinyalcul cäniyüman muyun 2Rey 20.1-11; Isa 38.1-22

24Chay muyuncunaćhüñatacmi mandacü Ezequias ishyälul pasaypiña cayäla. Chaymi Tayta Diosta mañacuptin juc milagructa pay uycula.

25Chaynu llaquipaycuptinpis Ezequiasꞌa sulpäta mana uculmi aśhwanpalä nunatucüla. Chaynu licalïluptinmi Ezequiaspa, jinaman Juda lädućhu, Jerusalenćhu lluy cäcunäpäpis Tayta Dios sumä piñacüla.

26Chaynu nunatucüśha cayalpis Ezequiaswan Jerusalenćhu cä nunacunaca uyshuycapäculamari. Chaymi Ezequias cawsaśhancama Tayta Diospa piñacuynin paycunaman mana ćhayculachu.

27Ezequias sumä cäniyu sumä lisisham cacula. Pay achca-achcactam juntüchila: illaycunacta, ürucunacta, aläja tuquish lumicunacta, pirfümicunacta, atajachicucunacta, imaymana ćhaniyu aläjacunactapis.

28Chaynütacmi trïgucunacta, bïnucunacta, asayticunacta pilwananpäpis lulachila. Jinaman imaymana jatućhä uywacunapäpis wasincunacta, tacsha curralcunacta, canćhancunactapis lulachilamá.

29Payta Tayta Dios sumä uycuptinmari achca-achca jatućhä uchuchä uywancunapis cacula; jinaman malcacunactapis śhalcachilamá.

30Awari, Ezequiasꞌa Gihon pucyup puncuntapis wićhaycachilmari chay yacucta lulïllanpa, Davidpa Malcanpa läduncama ćhächila. Chaynüpam mandacü Ezequiaspa lluy lulaśhancuna allinpä licaycuśha cala.

Babiloniapi śhamücunäta mandacü Ezequias ćhasquin 2Rey 20.12-19; Isa 39.1-8

31Ñatac Babilonia lädup puydïnincunam nunancunacta caćhamula Judaćhu imanuy milagru pasaśhantapis yaćhaycälinanpä. Tayta Diosñatacmi ichá Ezequiaspa śhunꞌunćhu ima caśhantapis licaycunanpä japallanta caćhaycüla.

Ezequias wañucun 2Rey 20.20-21

32Ñatac mandacü Ezequiaspa lluy lulaśhancuna, allin lulaśhancunapis Amozpa chulin willacü Isaiaspa librunćhümi cayan; jinaman isquirbïsha cayan Juda lädup, Israel lädup mandacünincunap librunćhümi.

33Ezequias wañucuptinmi Davidpa milaynin mandacücuna pampaculcänanpä cä, allinnin lädunman pampaśha cala. Juda lädućhu, Jerusalenćhu cäcunämari altuman juluycälil Ezequiasta pampapäcula. Chayurá paypa pudirnin chulin Manasesñamá mandacüca cala.