Ezequiel 6 - Old Testament Quechua Wanca（QVW）

Taytachacunacta alawayca camacaycüśha cananpämi willacun

1 Tayta Diosmi caynu niman:

2“Am wañucülla nuna, Israelpa ulꞌuncunaman ñawiquita ćhulaycul chaypa cuntran willacamuy:

3‘Tayta Dios nishanta Israel ulꞌucuna uyaliculcay. Ulꞌucuna, ulꞌuchacuna, mayucuna, pampacuna Tayta Diosmi caynu niyalcäśhunqui: Amcunamanmi ispädacta caćhamuśhä. Ulꞌucunäćhu cä taytachayquicunacta, alawanayquipä cä capillacunactapis camacaycüśhämi.

4Uycuna patacniquicunactapis pampamanmi muyüchishä, insinsiu cañacuyquicunactapis amshüśhämá. Taytachayquicunap puntanćhümá nunacunätapis maśhtaypa-maśhtaycüśhä.

5Israel läducunäpa wañünincunacta taytachancunap ñawpäninmanmá jitaycüśhä. Uycuna patacnincunamanmá tulluncunacta wicapaycüśhä.

6Mayćhu yaćhaculcaptiquipis chay malcapis camacaycüśhamá canꞌa; chay ulꞌucunäćhu alawaśhayquicunäpis pampaman muyüchishamá canꞌa. Uycuna patacniquipis amshüśhamá quïdanꞌa; taytachayquicunapis paquiypa pawäśhamá juntulanꞌa. Insinsiu cañacuyquicunapis, lluy ima lulaśhayquicunapis pampaman muyüchishamá licalinꞌa.Lev 26.30-31.

7Amcunap ćhawpiquićhu nunacunaca wañüläliptinlämi yaꞌa Tayta Dioslla rasunca caśhäta yaćhapäcunqui.

8“ ‘Ñatac waquinniquicuna wañuycäpi ayipäcunayquipämi caćhaycuśhayqui. Paycunam jinantin nasyuncunäman, malcacunäman chiꞌichisha capäcunꞌa.

9Chay cawsäcunaca may malcaman prïsu puśhaśha cayalcalpis yaꞌapïta yalpapäcunꞌamá. Paycuna chayćhülämari tantiaculcanꞌa, yaꞌapïta japächaculcul, taytachancunawan waticaculcäśhanpi. Jinaman chaynu capäcuśhanpi cawsaynïćhünüñachu yaꞌa mana cawsaśhätapis tantiaculcanꞌam. Pasaypi millachicuy anla lulaśhancunapi pinꞌacüśhamari uyshulapäcunꞌa.

10Chaylämi yaꞌa Tayta Dios caśhäta tantiapäcunꞌa; chayćhülämi mućhuycachinäpä nishäca yanꞌal mana caśhanta yaćhaycälinꞌa’ ” nil.

11Chaynütacmi Tayta Dios niman: “Cananꞌari Israel lädup millachicuy lulaynincunapïta umayquita wipyaycaćhay, maquiquita tällay, ćhaquiquiwanpis saytaycaćhay. Ay, cananmi ispädawan, micuy wanaywan, ishyaywan camacaycüśha capäcunꞌa.

12Calućhu cäcunämi ishyaywan wañülälinꞌa; sircaćhu cäcunäñatacmi ispädawan camacaycüśha capäcunꞌa. Cawsayniyu quïdäcunäñatacmi micuypi wañupäcunꞌa. Chaynüpamá piñacuynïta pasachicüśhä.

13Chay taytachancunap, uycuna patacnincunap puntancunaćhu, ulꞌup puntancunaćhu, lantacunap lulincunaćhu, pallaysapa encina lantap lulincunaćhu, chaynütac taytachancunaman tuqui mishqui aśhnäcunacta uśhancunäćhu wañüśha ayacuna jitalayalcätamá licapäcunꞌa. Chaylämi yaꞌa Tayta Dioslla rasun caśhäta yaćhapäcunꞌa.

14Yaꞌamá paycunaman maquïta ćhulaycuśhä. Mayćhu yaćhapäcuptinpis camacaycüśhämá, Riblat malcapïta aśhta chunyä ulꞌucama. Chaynüpamá yaꞌa Tayta Dioslla rasun caśhäta yaćhapäcunꞌa” nil.