Jueces 9 - Old Testament Quechua Wanca（QVW）

Abimelecmi caminaycun

1Chay Jerobaalpa chulin Abimelecñatacmi Shiquemćhu cä mamanpa aylluncunaman lila. Chayćhümi chay aylluncunacta nin:

2“Ama chaynu caychu, Shiquem malcap puydïnincunaman lilcul caynu nipäcuy: ‘Amcunapä ¿mayanninmá mas allin canman? ¿Jerobaalpa anćhish ćhunca (70) chulincuna caminaycälishunayquichun icha jucllay nunalla caminaycälishunayquichun?’ nil. Ñatac amari unꞌapäcuychu yaꞌapis aylluyquimá cayá” nin.

3Chaynu mamanpïta cä aylluncunaman Shiquem malcäćhu willaycuptinmi Abimelecman lluy śhalcacalcälila “payꞌa ayllunchicmi” nil.

4Nilcälilmi Baal-berit nishan alawana wasipïta süta ćhunca (60) illayta uycälila. Chay illaywanmi Abimelec pasaypi nunacta, wañuchicü mataycunacta mincalcul puśhala.

5Paycunawan papäninpa Ofra malcanta lipäculmi Jerobaalpa anćhish ćhunca (70) lijitimu chulincunacta juc lumillap jananćhu manyapi wañülächila. Ñatac śhullca chulin Jotamllañam pacacülul lluptïla.

6Chaypïmi Shiquemćhu, Bet-miloćhu yaćhäcunaca juntunaculcäla Shiquemćhu cä roble lantaman, chaynütac chuya lumi caśhancäman. Chayćhümi Abimelecta malcap mandacüninpä ćhulapäcula.

7Chayta Jotam yaćhälulmi Gerizim ulꞌup chupquinman ishpiculcul chaypi alli-allicta ayaycaćhamula lluy uyalipäcunanpä:

“Uyalipämay Shiquem malcaćhu nunacuna;

chayćha amcunactapis Tayta Dios uyaliycälishunqui.

8Juc timpućhümi lantacunaca mandacüninpä

ćhulanacuyta munapäcul ulïbus lantacta:

‘Anmi caminaycüní canqui’ nipäcula.

9Niptinshi ulïbus lantaca nin:

‘Lantacunäpa caminaycünin canäpä,

¿asayticta manañachun wayuśhä imamá?

Chay asaytiwanmari taytachacunactapis

nunacunätapis altuman juluycunchic’ nil.

10“Mana munaptinshi ïgus lantätaña nin:

‘Amñari caminaycüní caycuy’ nil.

11Niptinshi ïgus lantaca nin:

‘Lantacunäpa caminaycünin canäpä

¿mishqui ćhulaśhá allin ïgusnïtachun ćhulayta manalcüman imamá?’ nil.

12“Paypis mana munaptinshi übas lantätaña nin:

‘Amñari caminaycüní caycuy’ nil.

13Niptinshi paypis nin: ‘Lantacunäpa caminaycünin

canäpä ¿taytachacunactapis, nunacunätapis

cushichinäpä bïnütachun ćhulayta manalcüman imamá?’ nil.

14“Chaynu mana munaptinshi zarza jaćhätaña nin:

‘Amñari caminaycüní caycuy’ nil.

15Niptinshi zarza jaćhaca nin:

‘Rasunpa mandacüniquipä ćhulapämalꞌa

llantuynïmanꞌari śhapämuy.

Mana munapämaptiquiꞌa yaꞌapïta nina yalalcamulmi

jinantin Libanoćhu cedro ilucunäta camacaycülunꞌa’ nil.

16“Canan má niycälimay: ¿Allin śhunꞌuyquiwanchun, rasuncäwanchun Abimelecta caminaycüniquipä ćhulaycuyalcanqui? ¿Allinpa licaycuśhuśhayquimannüchun Jerobaaltapis aylluntapis allin tuquip licaycuyalcanqui?

17Papänïmari Madian läducunäpa maquinpïta amcunacta libraycuyninwan cawsaynintapis wañuypa patanman ćhulaycula.

18¿Chaychun amcunañatac taytäpa aylluncunap cuntran śhalcacalcälinquiman? ¿Chaychun juc lumip janallanćhu anćhish ćhunca (70) chulincunactapis wañülächinquiman? ¿Chaychun taytäpa uywaynin walminćhu ishupacuynin Abimelecta ćhulalcanquiman Shiquem malcap caminaycüninpä? ¿Aylluqui caśhallanpachun ćhulayalcanquiman?

19Sïchuśh allin śhunꞌuyquiwan, rasunpa amcuna papäní Jerobaalta, jinaman aylluncunactapis canan lulaycuyalcalꞌa, Abimelecwan allinꞌari caycäliy; chaynutac paypis amcunawan allinćha caycunꞌa.

20Chaynu mana captinꞌa Abimelecpïta nina latämul Shiquemćhu, Bet-miloćhu nunacunäta lupächun. Chay malcacunäpi nina latämultac Abimelectapis lupächun” nil.

21Nilculmi Beer malcäman Jotam ayicula. Chayćhümi wawꞌi-caśhan Abimelecta manchacuypïta yaćhamula.

22Abimelecmi Israel caśhtacunäta quimsa wata caminaycula.

23Chayćhümi Abimelecmanpis, Shiquem malcaćhu nunacunämanpis ćhïninacuyta Tayta Dios ćhulaycüla. Chaymi Shiquem malcaćhu nunacunaca Abimelecpa cuntran śhalcälälila.

24Chaynüta lulala, Jerobaalpa anćhish ćhunca (70) chulincunacta wañuchishanpïta Abimelecta cutichicunanpämi. Chaynütac Shiquem nunacunätapis wañuchiyta yanapäśhanpïta cutichicunanpämi.

25Chay Shiquem nunacunämari ulꞌucunäpa puntanman suwacunaca pacaculcänanpä nila, chayninpa pasäcunäta suwananpä. Chaynu lulapäcuśhantam Abimelec yaćhäla.

26Juc muyunñatacmi Ebedpa chulin Gaal, wawꞌi-caśhancunawan Shiquem malcaman liculcan chayćhu yaćhapämunanpä. Chay Shiquem nunacunäwanmi cuyachicälälin.

27Chaymi ćhaclacunäman lipäcul übacta cusichapämula bïnucta lulapäcunanpä. Jinalculmi taytachanpa alawana wasinćhu micuśhtin, upyaśhtin fistachaculcäla, jinaman Abimelecpa mana allinnintapis limaśhtin.

28Chayćhümi Ebedpa chulin Gaal nin: “Shiquem malcaćhu yaćhäcuna, ¿pïtucuntan Abimelec payta sirbiyänanchicpä? ¿Manachun Jerobaalpa chulillan? ¿Manachun Zebulpis paypa yanapä-masillan? Shiquem malcacta śhalcachï Hamorpa chulincunactam ichá sirbichwan; amari Abimelectá.

29Cay Shiquem malcayquip caminaycünin yaꞌa calꞌa Abimelecllactá alapacülümanćha. Payta nïmanćha: ‘Lluy nunayquicunacta juntuycul supayapachinacpä yalamuy’ ” nil.

30Chaynu Ebedpa chulin Gaal nishanta yaćhälulmi Shiquem malcap licaycünin Zebul alli-allicta piñacüla.

31Chaymi Aruma malcaćhu Abimelec cayaptin pictapis mana musyachillal willacächin: “Ebedpa chulin Gaalmi wawꞌi-caśhancunawan Shiquem malcanchicman yaycaycamul nunacunäta umachayan cuntrayqui śhalcapäcunanpä.

32Chayurá canan tuta lluy pilyäniquicunawan ulꞌucunäman pacacälälimuy.

33Chayćha wälaman inti yalayämuptin malcaman yaycälälinqui. Gaal lluy nunancunawan pilyä yalamuptinñatacmi munaśhayquimannu paycunacta lluy lulälälinqui” nil.

34Niptinmi Abimelec nunancunawan chay tuta liculcal Shiquem malcap muyülïninman tawa partiman ćhulanacälälila.

35Chayćhu Ebedpa chulin Gaal nunancunawan pilyä yalapämulmi malcap puncunćhu cayalcaptin, Abimelecñatac pacaläśhancunäpi lluy yalatityalälimun.

36Chayta Gaal licälulmi Zebulta nin: “Licay, wic ulꞌucunäpi jiꞌalpacayämun achca nunacuna” nil. Niptinmi Zebul: “Manam nunachu. Ulꞌucunap llantuynintam nunactanu licayanqui” nin.

37Niptinpis Gaal nicuyan: “Licayꞌari. ‘Cay pachäpa pupun’ nishanchic ulꞌupïpis jiꞌalpacayalcämun. ‘Licacücunäpa encina lantan’ nishanchic caminunnintapis śhacayalcämun” nil.

38Niptinmi Zebul nin: “¿¡Maytatá nunatucuyniqui licun!? Mayćhütá cayan, ‘¿pitan Abimelec sirbiyänanchicpä’ nishayquica? Canan cayꞌari mana cäpa licaśhayquicunaca. Má supayapachinacamuyꞌari” nil.

39Chaymi Shiquem nunacunäwan Gaal yalapäcula Abimelecwan pilyä.

40Abimelec llallilcul aticuyaptinñatacmi Gaal ayicula. Chaymi malcap puncunman ćhäpäcunancama intiru caminućhu achca nunacuna wañüchisha cäpäcula.

41Chaypïmi Abimelec quïdacula Aruma malcaćhu. Zebulñatacmi Gaalta lluy wawꞌi-caśhantinta Shiquem malcapi alapacüla.

42Chay walantinmi Shiquem nunacunaca ulꞌucunäman lipäcula. Chayta Abimelec yaćhälulñatacmi,

43nunancunacta quimsaman laquilcul ulꞌucunäman pacaculcänanpä nila. Shiquem nunacunaca malcanpi yalayalcämuptinmari pacaläśhancunäpi yalalcälimul pilyapäcula.

44Chayćhümi Abimelec nunancunawan malcap puncunman apuraylla llallïlälila duyñuchacaycälinanpä. Ishcay partïñatacmi ulꞌucunäćhu cäcunäta camacaycälälila.

45Chay anyaśh muyunmi Shiquem malcaćhu cäcunäwan Abimelec pilyapäcula, lluyta llallinancama. Malcacta duyñuchacuyculñatacmi lluy nunacunätapis, malcactapis camacaycüla. Jinalculmi caćhictalä jillpuycülapis.

46Chayta yaćhälälilmi Shiquem malcap türrinćhu cäcunaca, pacacälälila Berit taytachanpa alawana wasinpa sigüru cä türrinman.

47Chay türrićhu lluy pacacälälisha capäcuśhantam Abimelecta willaycälälin.

48Chaymari Salmon ulꞌuman lluy nunancunawan Abimelec lipäcula. Chayćhümi lantap pallayninta ächawan cuchüla. Chayta umruculculmi nunancunacta nin: “Yaꞌa lulaśhänu amcunapis apuray lulapäcuy” nil.

49Niptinmi lluy nunancuna lantap pallayninta cuchulcälil Abimelecta türricama atipäcula. Chay türrip lulïninman ćhulaycälilmi lataycälächin. Jinaptinmi chayćhu pacaläcunaca walanganu (1,000) wayapacunäwan walmicuna wañülälila.

50Chaypïta Abimelec licula Tebes malcätam. Chaymanpis lluy cunćhayculmi yaycälälila.

51Chay malcap ćhawpinćhümi jatun türri cala. Chaymanmi jinantin malcaca walmipis, wayapapis pacacälälila. Puncuncunactapis masïsu-masïsucta wićhalculmari türrip altunninman ishpipäcula.

52Abimelecñatacmi camacaycünanpä türriman ćhälun. Chaymi chay puncunćhu cañaycüśhä niyaptin,

53juc walmi jatun tunay lumicta Abimelecman caćhalpaycämun. Jinaptinmi umantapis lluy paquïlun.

54Chayćhümi apuraypa Abimelec arma apäninta ayaycul: “Ispädayquiwanñari wañulpächimay. Yanꞌalmi ‘walmim wañüchin’ nipäcunman” nin.

Niptinmi yanapänin ispädanwan tucsïluptin wañucula.

55Chaynu Abimelec wañuśhanta licälälilmi Israel caśhtacunaca wasinta-cama cuticulcäla.

56Chaynüpam Abimelecta Tayta Dios mućhuycachila papäninpa cuntran śhalcul anćhish ćhunca (70) wawꞌi-caśhancunacta wañuchishanpïta.

57Chaynütacmi Shiquem nunacunätapis mana allin lulapäcushanpïta Tayta Dios mućhuycachila. Mana allin capäcunanpä Jerobaalpa chulin Jotam nishancämari lulacacüla.