1Wañüśha chuspicunaca sumä pirfümip tuqui aśhnaynintapis pirdïchinmá.
Chaynümi yaćhaywan lluy lulaśhanta,
altuman juluycuśha caynintapis luclu cayninwan
uchuy mana alli lulaycuśhallan pirdïchinman.
2Yaćhayniyücäpa śhunꞌunćhu allincäta lulayllamá cayan;
luclüpa śhunꞌunćhüñatacmi ichá mana allin lulaylla cayan.
3Lucluca mayćhu pulilpis, luclu caśhantam camalachicun;
limayninwanmari luclu caśhanta tantiachicun.
4Puydïca amwan piñacüluptinpis
lulanayquipä cäcäta ama caćhaycuychu.
Pasinsiacuycämari sumä ñacaycunapïtapis julaycamanchic.
5Cay allpäćhu sumä mana allintamá licayculá; puydïcunämá caynu mana allinta lulaycälin:
6Alli-cama lulaycunamanlämá luclu nunacta ćhulaycun; yaćhayniyücunäñatacmi ichá mana bälï lulaycunallaman ćhulaycuśha capäcun.
7Licalämi uyway nunacunaca cawallun sillacalälisha puydïnülä pulipäcuśhanta, puydïcunäñatac ćhaquillawan uyway nunanu pulipäcuśhanta.
8Ućhcucta luläcá chaymanmi quiquin palpülunman.
Pulumäśha pilacta tunïcätá culibraymi caćhülunman.
9Lumicta labräcá lumiwanmi ćhächicülunman, ñitichicülunman.
Yamtacta cuchücá yamtawanmi däñäducülunman.
10Lamu ächawan cuchulꞌa
callpa-callpawanlämi cuchunan;
chaymari afilananlä.
Chaynu yaćhaywan imactapis lulaymá mas allin.
11Manalä sunsuchiptin culibrayca caćhüluptinꞌa
¿imapäñamá bälin sunsuchiyta yaćhaśhanpis?
12Yaćhayniyücäpa limaynin maypis uyaliycunamá.
Luclüpa limayninñatacmi ichá mana allinninpä cayan.
13Paycuna mana cä limaycunawan allaycapäculmi
juyu mana allin limaycunaćhüña camacapäcun.
14Luclüpa shimillanćhümá ima limaycunapis cayan.
Ima pasanantapis manamari pipis yaćhanchu;
¿mayanmá niycunman śhamü muyuncunäćhu ima pasanantapis?
15Lucluca ashllay lulayllanwanpis sumä pishipälulmá
malcanman mayninpa cutiytapis nï tantianñachu.
16¡Ay malca, imanuylä canqui, walaśhllala mandacüniquipis cayaptin,
puydïniquicunapis achicalcuśhanpi fistachacuyllaćhu cayalcaptin!
17Maynu cushicuymi allin sumä mandacüniyu cä malcapä;
puydïnincunapis callpanchaculcänanpä micunan
ürallaćhümá micapäcun; manamá shincacuyalcanchu.
18Illa nunap wasinpa tïchun śhutuyanmi;
mana lulacü nunap wasinpis tuninmi.
19Cumbiduca maćhaycuśha canäpämi;
bïnuca cushisha canapämi; illaycäñatacmi lluy imactapis lulanapä.
20Mandacücäta śhunꞌullayquićhüpis ama jamuyaychu;
rïcüpa mana allinninta ama wasiqui lulillaćhüpis limayaychu;
yanꞌalätac limaśhayquita uyalïlul altućhu pälï ulpaycunaca willaycülunman.
Who We AreWhat We EelieveWhat We Do
2025 by iamachristian.org,Inc All rights reserved.
