Numeros 27 - Old Testament Quechua Wanca（QVW）

Zelofehadpa wamla chulincunaman allpacta tücachinanpämi nin

1Josepa chulinmi Manases cala, Manasespañatacmi Maquir, Maquirpañatacmi Galaad, Galaadpañatacmi Hefer, Heferpañatacmi Zelofehad. Zelofehadpa wamla chulincunam picha cala: Maala, Noa, Hogla, Milca, Tirsapis.

2Paycunam tincuna carpap puncunman lipäcula Moiseswan, sasirdüti Eleazarwan, jinaman lluy malcap puydïnincunawan limamü. Chayćhümi nin:

3“Taytá chunyäcäćhümi wañucula. Ñatac manamá Tayta Diospa cuntran Core śhalcuśhancäćhüchu, sinuꞌa quiquinpa juchanpïtam mana umri chuliyü wañucula.

4¿Mana umri chulin caśhanpachun taytäpa milaynincuna chincacunꞌa imamá? Yaꞌacunactapis papänïpa tücamänintari uycälillämay” nil.

5Niptinmi Tayta Diospa maquinman Moises ćhulaycula.

6Chaymi Tayta Dios Moisesta nin:

7“Zelofehad wamla chulincuna rasuncätam mañacuyalcan. Chayurá tiyuncunaman allpa tücachishayquita wañucü taytanmanpis tücänin allpacta uycuy. Chayćha taytancunap tücänin allpaca walmi chulincunapäña caycunꞌa.Num 36.2.

8Jinaman Israel caśhtacunäta niycamuy: ‘Mayanniquipapis walaśh chuliqui mana cayaptin wañuculcaptiquiꞌa tücäniqui wamla chuliquimanñam tücachisha canꞌa.

9Sïchuśh wamla chuliquipis mana cayaptinꞌa wawꞌi-caśhayquicunamanñam tücachisha canꞌa.

10Wawꞌi-caśhayquipis mana captinꞌa papäniquip wawꞌi-caśhancunamanñam tücachisha canꞌa.

11Sïchuśh päpäniquip wawꞌi-caśhancunapis mana captinꞌa sirca aylluyquimanñam tücachisha canꞌa’ nil. Chayurá am Moisesman camachishämannümi cay camachicuyca Israel caśhtacunäpa milaynincunapä caycunꞌa” nil.

Moisespa pudirninpämi Josueta aclaycun

12Chaypïtam Moisesta Tayta Dios nin: “Israel caśhtacunäta uycuśhá allpacta licanayquipä cay Abarim ulꞌuman ishpiy.

13Chaypi licayculꞌa cay pachapïta licunquiñam, wawꞌi-caśhayqui Aaronnüpis awquilluyquicuna caśhanman juntunacamü.

14Zin chunyäcäćhu malcaca cuntrá śhalcapäcul yacucta mañacuptinmi cullu linlicuycul mana cäsupämal chuya caynïta nï camalachilanquichu. Má, chay yalamü yacu ‘Quijacuy’ nïwanmi śhutichäśha cala; chay Cades lädu Zin chunyäninćhümari cayan”Num 20.10-13; Deut 3.23-27; 32.48-52. nil.

15Niptinmi Moises nin:

16“Cawsayta uycü Tayta Diosllay cay malcacta puśhaycunanpä juc puydïta ćhulaycuy.

17Chayćha yaluptinpis yaycuptinpis puntanninćhu caminaycüca canꞌa. Chaynüpaćh cay malcayqui uwish mana michïniyünu nï canꞌañachu”1Rey 22.17; Eze 34.5; Mat 9.36; Mar 6.34. nil.

18Niptinmi Tayta Dios nin: “Nunpa chulin JosuemiExo 24.13. callpanchacü cäsucü cayan. Payta aclaycul umanman maquiquita ćhulaycuy.

19Jinalcul sasirdüti Eleazarman jinantin malcäman puśhaycuy. Chayćhümi imacta lulananpäpis lluypa ñawquin niycunqui.

20Paymanmi parti munayniquita uycunqui jinantin Israel caśhtacunaca cäsuculcänanpä.Deut 34.9; Jos 1.16-18.

21Josueñatacmi sasirdüti Eleazarman linꞌa; Eleazarñatacmi Urim lumiwanExo 28.30; 1Sam 14.41; 28.6. Tayta Diosta tapuycunꞌa. Jinantin malcäta gïrraman linanpä Josue niptin Israelwanmi lipäcunꞌa; cutipäcunanpä niptinpis cutipäcunꞌamari” nil.

22Chaynu Tayta Dios nishanmannümi Moises lulaycula. Chaymi sasirdüti Eleazarpa, jinantin malcäpa puntanman Josueta puśhaycula.

23Jinalculmi paypa umanman maquinta Moises ćhulaycul Tayta Dios nishanmannu imactapis lulananpä niycula.