2 Samuel 3 - Old Testament Quechua Wanca（QVW）

1Chaynu Saulman śhalcücunämi Davidman śhalcücunäwan achca timpu pilyućhu capäcula. Saulpa mandacuyninꞌa masta-mastam chincalpuyäla; Davidpañatacmi ichá masta-masta tacyalpuyäla.

Hebron malcaćhu cä Davidpa chulincuna 1Cro 3.1-4

2Chaymari Hebron lädućhu David cayaptin caycuna chulincuna cala: Mayur chulinmi Amnon cala; payꞌa Jezreel lädu walmin Ahinoampa wawinmi.

3Atimü ishcaycäñatacmi Quileab; payꞌa Nabalpi japanyäśha Carmel lädu Abigailpa wawinmi. Quimsäñatacmi Absalon; payꞌa Gesur malcap mandacü Talmaipa chulin Maacap wawinmi.

4Jina atimü tawäñatacmi Adonias; payꞌa Haguitpa wawinmi. Pichäñatacmi Sefatias; payꞌa Abitalpa wawinmi.

5Sütäñatacmi Itream; payꞌa Eglap wawinmi. Chay süta chulincunamari Davidpa chulincuna Hebron lädućhu näsïcunaca capäcula.

Davidwanmi Abner limalinaculcan

6Chay Davidman śhalcücunaca Saulman śhalcücunäwan pilyapäcuśhan timpućhümi, Saul partićhuꞌa Abnertaña mas allinpä licapäcula.

7Ñatac Saulpa uywanacuśhan walminmi Ajapa wamla chulin Rizpa cala. Chaymi Abnerta Is-boset tumpacuyan: “¿¡Imapïtá papäní Saulpa uywanacuśhan walminwan puñülanqui!?” nil.

8Niptinmi Abner sumä-sumäta piñacülul nin: “¿¡Pasaypi allꞌuchun Judapa cayá imatá!? Canancamapis taytayqui Saulpa milaynincunacta, apanacuśhancunactapis manchacuywanmi, llaquipaywanmi sirbiyculá. Amtapis manatacmá Davidpa maquinman ćhulayculacchu. Chaychun canan chay walmiwan juchacülunquim niyämanquimanlä canpis.

9Cananmi ichá Davidta yanapäśha Tayta Dios limalicuśhan lulacacunanpä. Chaynu mana lulaycuptiꞌa Tayta Dios sumä-sumäta mućhuycachimächun.

10Tayta Diosmari Saul ayllupïta mandacuyninta quitalcul Davidman uycunꞌa jinantin Israel nunacunätawan Juda nunacunäta mandananpä, Dan malcapïta aśhta Beersebacama” nil.

11Niptinmi Is-bosetñatac Abnerta manchacul imallactapis mana nilachu.

12Chaypïtam Abner willacücunacta Davidman caćhälun cay nil: “¿¡Mayanpamá cay allpacunaca!? Ampamari. Cananꞌari limalinacuśhun; yaꞌami yanapäśhayqui jinantin Israel nunacunaca amllactaña mandacüninpä licapäcuśhunayquipä” nin.

13Niptinmi David: “Allinmi; limalinacuśhunꞌari. Ñatac caytalämi lulaycunqui. Śhamulꞌa Saulpa walmi chulin Micalta puśhacuśham śhamunqui. Mana puśhamulꞌa amañamá ancuycamunquipischu” nin.

14Jinaman David willacücunactam Saulpa chulin Is-bosetman caćhälun cay nil: “Paćhac (100) Filisteo läducunap umri cayninpa utachancunawanmi walmí Micalman yaycapaculá. Chay walmïtari cutiycachimay” nin.

15Niptinmi wayapan Paltielpïta Micalta Is-boset quitächimula. Laispa chulinmi Paltiel cala.

16Chaynu puśhacuptinmi wayapan Paltiel waꞌaśhtin atila Bahurimcama. Chayćhu Abner “Cuticuyña” niptinmi Paltiel cuticula.

17Chaypïtam Israelpa yaśhancunacta Abner nin: “Unaypïñam mandacüniqui David cananta munapayalcanqui.

18Cananꞌari mandacüniquipä ćhulapäcuy. Tayta Diosmari Davidta nin: ‘Sirbïní Davidwanmi Filisteo läducunap maquinpïta, lluy ćhïnicünincunap maquinpïta Israel malcäta libraycuśhä’ ” nil.

19Chaynütacmi Benjamin ayllucunätapis Abner limapäla. Chaypïtam lluy israelcunäwan Benjamin ayllucunaca ima lulayta munapäcuśhantapis Davidman willaycü Hebronman lila.

20Chay David caśhan Hebronmanmi Abner ishcay ćhunca nunancunawan ćhälälin. Jinaptinmi paycunapä David cumbiducta lulaycachila.

21Chayćhümi Davidta Abner nin: “Mandacü Taytallay, awniycamay jinantin Israelta juntuycuptí amwan limaliculcänanpä. Chaynüpaćh mandacuyniqui munaśhayquimannu caycunꞌa” nil.

Chaypïta David “jamallá” niptinmi Abner jawcalla licula.

Abnertam Joab wañuchin

22Ñatac pilyapäcuśhanpïmi Davidpa nunancuna Joabwan cutiyalcämula. Chaymi ćhïnicünincunacta lluy waycapämuśhanta apayalcämuña. Ñatac Hebronćhu Abner manañam Davidwan calañachu. David jamallá niycuptinmi jawcallaña licula.

23Chaynu Joab pilyänintin ćhämuptinmi willaycäläliña Nerpa chulin Abner watucünin mandacücäman śhamuśhanta. Jinaman jawcallaña cuticuśhantapis.

24Chaymi mandacücäman Joab lilcul nin: “¡Chayurá mandacücäta licächun Abner śhamuña! ¿Imanuypatá jawcallacta caćhaycuyanquiman?

25¡Taytay, am lisinquiñamari Nerpa chulin Abner imanuy caśhantapis! Rasunpa artillanwanćha śhamula ima lulaśhayquitapis, lulanayquitapis yaćhapäśhunayqui-laycullaćh” nil.

26Chaynu Davidwan limaśhanpïmi Joab caćhälun willacüninta Abnerman. Paycunañatacmi Sira püsüpïtaña Abnerta cutïlächimun. Ñatac manam imallactapis Davidta yaćhachilachu.

27Chaynu Hebron läduman Abner cutïmuptinmi Joab puśhälun malcap puncunpa juc lädunman, ishcayllan limananpänu. Chayćhümi pataćhu tucsïluptin Abner wañucun. Chaynüpam wawꞌi-caśhan Asaelta wañuchishanpïta Joab cutichicüla.

28Chaypïta David yaćhälulmi nin: “Tayta Diospa ñawpäninćhu yaꞌapis malcäpis Nerpa chulin Abnerpa wañuyninpïta manamari juchayüchu capäcú.

29Cay wañuypïta Joab lluy aylluntin mućhuchisha capäcuchun. Paypa aylluncuna imaypis caycälichun yawarpa janallanćhu, lipra ishyaywan, wishtu, juyu wañuywan wañupäcuchun, micuy wanayćhüpis capäcuchun” nil.

30Chaynüpamari Joabwan Abisai wañüchila Abnerta, Gabaon pilyućhu wawꞌi-caśhan Asaelta wañuchishanpi.

31Chaypïtam Joabtawan paywan lluy cäcunäta David nin: “Llaquicuypïta müdanayquita laćhyapäcuy, shicacü müdanawan müdaculcay, Abnerpïta waꞌaculcay” nil. Mandacü Davidñatacmi ayap ipanta lila.

32Hebronmanmi Abner pampaśha cala. Chay pampaśhanpa puntanćhümi mandacüca alli-allicta awćhucula. Chaynütacmi jinantin malcäpis awćhuculcäla.

33Chayćhümi mandacüca cay aya taquicta taquila:

“¿Imapïtam Abner caynüpa

wañunan cala?

34¡Maquiquicuna manamá ćhänäśhachu cala.

Ćhaquiquicunapis manamá cadinäśhachu cala!

¡Wañuchicücunap maquinman palpücänümi palpülanqui!” nil.

Lluy malcaca mastalämi waꞌaculcäla.

35Chayćhümi Davidman lluy aśhuycälil imallactapis micuycunanpä ruygapäcula. Davidñatacmi limalicula cay nil: “Intica manalä jiꞌalpuptin tantacta ütac ima micuyllactapis micüluptiꞌa Tayta Dios sumä mućhuycachimächun” nin.

36Chaynu nishanta jinantin malcaca tantiälälilmi allin jawca caycälila. Mandacü Davidpa ima lulaśhanpis malcäpa śhunꞌunpämari caycula.

37Chay muyunmari jinantin Judapis, Israelpis tantiapäcula Nerpa chulin Abnerpa wañuyninpi mandacü David mana juchayu rasunpa caśhanta.

38Chaypïtam mandacüca nunancunacta nin: “Yaćhapäcushayquinüpis Israelćhu allinnin nuna, puydïnin nunam canan wañucun.

39Masqui Tayta Diospa japächaśhan mandacü yaꞌa cayalpis manam ima lulaytapis atipächu, chay Sarviap chulincuna lumi śhunꞌu munaysapa capäcuśhan-laycu. ¡Chay mana allin juyu wañuchïcäta tincüninman Tayta Diosꞌari mućhuycachichun!” nil.