1 Reyes 4 - Old Testament Quechua Wanca（QVW）

Mandacü Salomonpa puydï yanapänincuna

1Jinantin israelćhümi Salomon mandacü cala.

2Puydï yanapänincunam caycuna cala: Sadocpa chulin Azariasmi puydï sasirdütin cala.

3Sisap chulin Elihorefwan Ahiasmi isquirbïnin cala. Ahiludpa chulin Josafatmi mandacücäpa isquirbishancunap täpänin cala.

4Joiadapa chulin Benaias pilyäcunäpa puydïninmi cala. Sadocwan, Abiatarꞌa sasirdüticunam capäcula.

5Natanpa chulin Azariasmi puydïcunäpa puydïnin cala. Natanpa chulin Zabudñatacmi mandacücäpa tantiachïnin, sasirdütin cala.

6Ahisarꞌa palasyućhu imactapis licaycücämi cala. Abdap chulin Adoniramñatacmi munal mana munal luläcunäpa licänin cala.

7Jinantin israelćhu Salomonpa ćhunca ishcayniyu (12) puydïcunäpa puydïnincunam cala. Paycunam quillan-quillan camachinaculcäla mandacücäpa lluy aylluntinpa micuynincunacta jucnincä licaycunanpä.

8Chay ćhunca ishcayniyu puydïnincuna caycunam: Efrain ulꞌucunäćhuꞌa Hurpa chulin.

9Macaz, Saalbim, Bet-semes, Elon, Bet-hanan malcacunäpïtañatacmi Decarpa chulin cala.

10Arubot, Soco, jinantin Hefer lädupïtañatacmi Hesedpa chulin cala.

11Dor lädu altupïtañatacmi Abinadab; paypa walminmi Salomonpa wamla chulin Tafat cala.

12Taanac, Meguido, jinantin Bet-sean läducunapñatacmi Ahiludpa chulin Baana cala. Bet-sean cala Saretanpa puntanćhu, Jezreelpa ulapayninćhümari. Chayurá Bet-seanpïta Abel-meholacama, aśhta Jocmeampa waśha läduncamam licaycüca cala.

13Galaad lädu Ramotpïtañatacmi Geberpa chulin cala. Paymi licaycula Manasespa chulin Jairpa cä jinantin Galaad läducta, jinaman Basanćhu cä Argob läductapis. Chayćhümi süta ćhunca (60) jatućhäcama malcacuna, murällayücama, puncuncunapis brunsiwan wićhäśha-cama cala.

14Mahanaimćhüñatacmi Iddop chulin Ahinadab cala.

15Neftalićhüñatacmi Ahimaas cala. Paypa walminmi Salomonpa wamla chulin Basemat cala.

16Aserćhu, Alotćhuꞌa Husaipa chulin Baanam cala.

17Isacar ayllućhüñatacmi Paruap chulin Josafat cala.

18Benjamin ayllućhuꞌa Elap chulin Simeimi cala.

19Galaad lädućhuꞌa Urip chulin Gebermi cala. Galaad cala Amhor läducunäpa mandacünin Sehonpa, jinaman Basanpa mandacünin Ogpa allpanmi.

Paymari cay lädup puydïnin caycula.

Salomonmi sumä yaćhayniyüman cäniyüman licalin

20Awari, Judaćhu, Israelćhu nunacunaca lamarćhu aꞌunümi nisyu-nisyu capäcula. Paycunap imanpis micapäcunanpä, upyapäcunanpä cacuptinmi cushisha capäcula.

21Chayurá Salomonpa maquinćhu cala Eufrates mayupïta aśhta Filisteo nasyuncama, Egipto nasyunpa culindancamam.Gen 15.18; 2Cro 9.26. Chaymi Salomon cawsaśhancama paycuna sirbipäcula, alcabälacta pägapäcula.

22Salomon micapäcunanpämi muyun-muyun süta walanga süta paćhac (6,600) quïlu allinnin arinactawan, ćhunca quimsa walanga ishcay paćhac (13,200) quïlu arinacta apapäcü cala.

23Chaynütacmi apapäcula: wataläśhanćhu ćhunca wäca wirayäśhacunacta, pastuwan sïbäśha ishcay ćhunca (20) wäcacunacta, paćhac (100) uwishcunacta, jinaman mana fintaśha luychucunactapis, tarushcunactapis, munti capish-niläcunactapis, pälï uywacunactapis.

24Salomonmi mandacula Eufrates mayup inti ishpimunan lädu Tifsa malcäpïta aśhta Gaza malcäcama. Chayćhu mandacücunaca Salomonpa maquillanćhümi lluy capäcula. Muyülïninćhu cä malcacunäwanpis jawcamari cawsapäcula.

25Salomon cawsaśhancama Judaćhu jinaman Israelćhüpis Dan malcäpïta aśhta Beersebacama übancunacta, ïgusnincunacta talpuśhtin jawcamá cawsapäcula.

26Chaynütacmi Salomonpa carritancunacta aysananpäpis tawa walanga (4,000) cawalluncuna cacula. Sillädancunapis ćhunca ishcayniyu walangam (12,000) cacula.1Rey 10.26; 2Cro 1.14; 9.25.

27Chay ćhulaśhan puydï yanapänincunam mandacü Salomonpäwan paywan cäcunäpä quillanca micuyta apapäcula; manam imactapis pishichipäcüchu cala.

28Chaynütacmi tücaśhanćhuꞌa aysäcunäpäpis, carga apä cawallucunäpäpis siwäcunactawan päśhacunacta unanchaśhancäman apapäcula.

29Tayta Diosñatacmi tantiaytawan yaćhayta Salomonman uycula. Chaymi lamarćhu cä aꞌunu sumä yaćhaynin cacula.

30Chaymi yaćhayniyu Egipto nunacunäpïtapis, inti ishpimunan lädu nunacunäpïtapis mas-mas yaćhayniyu Salomon cacula.

31Lluy-lluypïtapis mas yaćhayniyümari cala: Ezra caśhta Etanpïpis masmi, Maholpa chulin Hemanpïta, Calcolpïta, Dardapïtapis masmi cacula. Chaymi lluy muyülïninćhu nasyuncunäćhüpis lisisha-lisisha cala.

32Quimsa walanga (3,000) tantiachicuycunactawan walanga pichayu (1,005) taquicunactam isquirbila.Prov 1.1; 10.1; 25.1; Cant 1.1.

33Chaynütacmi lantacunäpi yaćhachila Libano cedron lantapi allacuycul aśhta pilacunaćhu wiñä ulacunäpïtapis. Chaynütacmi uywacunäpïpis, pälï pishucunäpïpis, śhullwaypa pulï culucunäpïpis, imaymana challwacunäpïpis limala.

34Chaynu Salomonpa sumä yaćhayninta uyalipäcü, jinantin nasyuncunapïmari mandacücunaca śhapäcamula.