Numeros 15 - Old Testament Quechua Wanca（QVW）

Tayta Diosman uycälinanpämi nin

1Chaypïtam Moisesta Tayta Dios nin:

2“Israel caśhtacunäta caynu nimuy: ‘Chay upäcunac allpaman yaćhapäcunayquipä yaycälälilꞌa,

3ichapis waquinnincuna Tayta Diosman cañaywan uycuyta munapäcunꞌa wäcacta ütac uwishta. Chaycuna canmanmi cañaywan uycuypis, pägaypis, limalicuśhanpi uycuypis; jinaman śhunꞌuyquipi yalamuśhanta uycuypis, ütac fistacunaćhu uycuypis. Caycunam Tayta Diosman tuqui mishqui aśhnä ćhaycunꞌa.

4Chay uycüca micuytapis Tayta Diosman uycunꞌatacmi, allinnin arinacta juc litru asaytiwan chapüśhacta.

5Jinaman Tayta Diospä uwishta uycuśhancäman ütac cañaywan uycuśhancäman jićhaywan uycunactapis yapaycunꞌam; juc litru bïnumari juc uwishpa-cama canꞌa.

6Ulu uwish captinꞌa micuna uycuytam lulaycunꞌa, tawa quïlu allinnin arinapi, litru ćhawpi asaytiwan chapüśhacta.

7Jinaman jićhaywan uycunactapis juc litru ćhawpi bïnuctam uycunꞌa. Chaymi tuqui mishqui aśhnä Tayta Diosman ćhaycunꞌa.

8Sïchuśh juc wäcacta cañaywan uyculꞌa ütac limalicuśhayquipi uyculꞌa, ütac allin cawsaśhayquipi Tayta Diosman uyculpis,

9chay wäcawan cuscactam micuytapis uycunqui, süta quïlu allinnin arinacta, ishcay litru asaytiwan chapüśhactamari.

10Chaynütacmi jićhaywan uycunactapis ishcay litru bïnucta uycunqui. Chaynu cañaywan uycuycämi Tayta Diosman tuqui mishqui aśhnä ćhaycunꞌa.

11Cay nishämannümari lulaycälinqui: wäca, ulu uwish, malta uwish, capish uycuśhayquicunäwanpis.

12Masqui maychica cacuptinpis chaynümi uycuśhayqui uywacunäwan lulaycälinqui.

13Lluy Israel caśhtacunämi cañaywan uyculꞌa cay nishämannu lulaycälinꞌa Tayta Diosman tuqui mishqui aśhnä ćhaycunanpä.

14“ ‘Sïchuśh mana Israel caśhta amcunaćhu yaćhayal ütac pasädalla cayal Tayta Diosman tuqui mishqui aśhnä ćhaycunanpä cañaywan uycuyta munalꞌa amcuna lulapäcuśhayquinümi wiñaypä lulapäcunꞌa.

15Juc camachicuyllamari amcunapäpis jinaman amcunaćhu juc caśhta yaćhäcunäpäpis canꞌa. Cay camachicuyca wiñaypämi lluy milayniquicunapä caycunꞌa. Amcunapis juc caśhtacunäpis Tayta Diospä chay cuscallamari capäcunqui.

16Chayurá juc camachicuyllam, yaćhachicuyllam canꞌa amcunapäpis amcunaćhu juc caśhta yaćhäcunäpäpis’ ”Lev 24.22. nil.

17Chaypïtam Tayta Dios nin:

18“Israel caśhtacunäta nimuy: ‘Puśhapäcuśhac allpaman yaycälälil,

19talpupäcuśhayquita micuyta allaycul Tayta Diosmanmi particta uycapäcunqui.

20Maynümi trïgucta jaluchil wamä cusichanta uycunqui, chaynümi allinnin arina chapüśhäpïpis punta chapuśhayquita Tayta Diosman uycunqui.

21Caynümi wamä allinnin arina chapuśhayquicunapi lluy milayniqui imaypis Tayta Diosman uycälinꞌa.

22-23“ ‘Tayta Dios Moisesman lluy camachishancunäta, ütac allaycuyninpi Moisespa-cama amcunapis, milayniquicunapis lulapäcunayquipä camachishancunäta, mayanllantapis mana tantial unꞌäläliptiquiꞌa caytanümari lulapäcunqui:

24Sïchuśh malcantin mana tantial juchapacäläliptinꞌa lluy malcantinmi juc wäcacta Tayta Diospä cañaywan uycälinꞌa tuqui mishqui aśhnä ćhaycunanpä. Jinaman ćhacla micuy uycuśhanman, jićhaywan uycuśhanman chuyanchaycuśha cananpäpis juc capishtam uycunꞌa.

25Sasirdütiñatacmi lluy Israel caśhtantinpä Tayta Diosman cañaywan uycuptin mana tantial juchapaculcäśhanpïta pampachaycunꞌa. Chuyanchaycuśha cananpämi Tayta Diosman uycälinancäta uycälinꞌa, jinaman uycunancätapis, cañaywan uycälinancätapis.

26Chaynu malcaca mana tantial juchapaculcäśhanpïtam lluy Israel caśhtacunäpis, chayćhu yaćhä juc caśhtacunäpis pampachäśha capäcunꞌa.

27“ ‘Sïchuśh jucllay nunalla mana tantial juchacüluptinꞌa watayu ćhina capishtam chuyanchäśha cananpä uycunꞌa.

28Chaymi sasirdütica chay mana tantial juchapacü nunäpïta Tayta Diosman cañaywan uycuptin juchan chuyanchaycuśha canꞌa.Lev 4.27-31.

29Cay camachicuyllam cayan mana tantial juchapacü Israel caśhtapäpis ütac amcunaćhu yaćhä juc caśhtapäpis.

30“ ‘Ñatac Israel caśhtapis ütac juc caśhtapis yaćhayal juchacta luläca Tayta Diostam jalutacun. Chay nunaca malcanpïta alüśhamá canꞌa.

31Tayta Diospa camachicuyninta jitapal, yaćhachicuyninta mana cäpa licaśhanpamari juchanpa wayuyninta apaycunꞌa’ ” nil.

Jamana muyuncäćhu mana jamäcäta mućhuchinanpämi nin

32Chaypi Israel caśhtacunaca chunyäcäćhu cayalcaptinmi jamana muyunćhu yamtacta jucnin pallayäta talïläliña.

33Chay talïcunämi Moisesman, Aaronman, jinantin Israel caśhtacunäman puśhälälila.

34Chayćhu imacta lulapäcunanpäpis mana camachisha cayaptinlämi carsilcällaćhülä wićhalachipäcula

35Chayćhümi Moisesta Tayta Dios nin: “Chay nunaca wañunanmi. Yaćhapäcuśhayquipi waśhaman jululcul lluy Israel caśhtacunaca tamshalälichun” nil.

36Chaynu Tayta Dios Moisesta nishanmannümi yaćhapäcuśhanpi jululcul wañunancama tamshälälila.

Müdananćhu shalshi-shalshicta jilapäcunanpämi nin

37Chaypïtam Moisesta Tayta Dios nin:

38“Israel caśhtacunäta caynu nimuy: ‘Amcunapis lluy milayniquicunapis müdanayquip manyanćhümiDeut 22.12. shalshi-shalshicta asulwan jilapäcunqui.

39Chayćha chay shalshipnincunäta amcuna licapäcul yalpapäcunqui Tayta Diospa camachishancunäta lulapäcunayquita; jinaman śhunꞌuyquicunawan licaśhayquicunawan mana ipanchapäcunayquitapis yalpapäcunqui.

40Chaynüpa yalpalćha lluy camachicuynïcunacta cäsuculcanqui. Chaynüpamari chuya malcá capäcunqui.

41Yaꞌa Tayta Diosniquim Egiptop maquinpïta julaycälimulac Diosniqui canäpä. Yaꞌamari Tayta Diosniqui cayá’ ” nil.