2 Cronicas 14 - Old Testament Quechua Wanca（QVW）

Juda lädućhümi Asa mandacun 1Rey 15.8-12

1Chaypïta Abias wañucuptinmi Davidpa Malcan nishanćhu awquilluncuna caśhancäman pampapämula. Paypa pudirnin chulin Asamñam mandacüca cala. Paypa mandacuyninćhu ćhunca watam jawca cawsay caycula.

2Mandacü Asapa cawsaynin Tayta Diospa puntanćhu allin tincüninmanmi caycula.

3Payꞌa malcanpïta lluy-lluymi chincächila taytachacunacta alawapäcunanpä cä uycuna pataccunacta, lumipïta taytachacunacta; jinaman Asera mamachantapis camacaycülam.

4Chaynütacmi awquilluncunap Tayta Diosllanta ashiycälil nishancunacta, camachicuynincunacta lulaycälinanpä Juda läducunäta nila.

5Chaynüpam jinantin Juda lädup altunnin malcacunäćhu taytachacunacta alawananpä uycunacunacta, insinsiucta cañaycunapä pataccunactapis pampaman muyüchila. Jinaptinmi mandacuyninćhu jawca cawsay caycula.

6Chaynu Tayta Dios jawcayayta uycuptinmi, pay timpućhu ima pilyupis nï calachu. Chaynu caśhancamam Juda lädućhu murälläśha malcacunacta śhalcachila.

7Chay jinantin Juda nunacunätamari mandacü Asa nin: “Tayta Diosninchicta ashiycuśhanchicpïmi lluy malcacunäwan jawca cawsayta uycamanchic. Caynu maquinchicćhu caśhancama lluy malcacunäta śhalcachishun murällancunacta, täpanan türricunacta, puncuncunactapis wićhacuyü-camacta lulaśhun” nil. Chaynüpamari chay malcacunacta camacänancama allin śhalcachipäcula.

8Mandacü Asapa pilyänincuna cala: Juda partipi quimsa paćhac walangam (300,000) atajachicuyü-cama, lansayü-cama. Benjamin partipïtañatacmi ishcay paćhac pusä ćhunca walanga (280,000) atajachicuyü-cama flïchayü-cama cala. Lluypis alli-cama pilyämari capäcula.

9Chaypïta paycunap cuntran pilyämi Etiope lädu Zera lila, juc millun (1,000,000) nunancunawan, quimsa paćhac (300) carritancunawan. Jinalmi Maresa malcäcama ćhäla.

10Chaymi pilyapäcunanpä Asa yalapäcul, Maresap lädunćhu cä Sefata pampaman lluy ćhulanacälälila.

11Chayćhümi Tayta Diosninta mandacü Asa mañacun: “Taytay, amllamá pishi callpayücätapis sumä munayniyücätapis yanapaycunqui. Tayta Diosllay yanapaycälillämayꞌari. Amllamanmari chalapaculcá. Ampa pudirniquitacmi paycunawan pilyä śhayalcämú. Taytallay, anmi Tayta Diosní canqui. Amta manamá cay nunacunälla llallishunquimanchu” nil.

12Chaymi mandacü Asactawan lluy Judata Tayta Dios llalliycachila. Jinaptinmi Etiope läducunaca ayiculcäla.

13Chaynüpam Asa lluy pilyänincunawan Gerarcama aticulcan. Quiquin Tayta Dios pilyänincunawan camacaycüluptinmi jucllayllapis cawsayniyu nï quïdalachu. Jinaptinmi Juda läducunaca lluy cänincunacta apaculcäla.

14Chaypïta Gerar malcap muyülïninćhu cä malcacunaca Tayta Dios lluy lulaśhancunacta yaćhälälilmi chucchucuyalcäla. Chaynu cayalcaptinmi Juda läducunaca yaycaycälil lluy ima cänincunactapis apaculcäla.

15Chaynütacmi canćhanpi-canćhanpi cä uywacunäman yaycuycul achca-achca uwishcunactawan camïllucunacta aticulcäla. Jinalculmi Jerusalenman cuticulcäla.