2 Cronicas 29 - Old Testament Quechua Wanca（QVW）

Juda lädućhu Ezequiasmi mandacun 2Rey 18.1-3

1Canan má, Ezequias ishcay ćhunca pichayu (25) watanta liyalmi mandacuyta allaycula. Paymari ishcay ćhunca isunniyu (29) wata Jerusalenpïta mandacula. Mamanñatacmi Zacariaspa chulin Abias cala.

2Ezequiaspa lulayninmi awquillun Davidpa lulayninnu Tayta Diospa ñawquin allin caycula.

3Ezequiaspa wamä wata mandacuyninpa allaycuy quillanćhümi, Tayta Diospa alawana wasinpa puncuncunacta caśhan quićhaycachil allichachila.

4Chaypïta inti ishpimunan lädu patyuman sasirdüticunätawan levitacunäta ayalcachimulmi nin:

5“Levitacuna uyalipämay, amcuna cananꞌari chuyanchaculcay. Jinaman awquilluyquicunap Tayta Diosninpa alawana wasintapis chuyanchapäcuyꞌari. Chayćhu ima anla millachicuy cäcunätapis wicapapäcuy.

6Awquillunchiccunamari Tayta Diospa cuntran śhalcucalcälil mana allincunallacta lulapäcula. Tayta Dios caśhancätapis jalutaculcul ipanchalculmari, licaytapis manaña munapäculañachu.

7Jinaman patyucunap puncuncunactapis wićhälälila, michïrucunätapis wañülächilam; insinsiuctapis manañamari lupachipäculañachu. Jinaman cañaywan uycunactapis manañamá Israelpa Tayta Diosninman uycapäculañapischu.

8Chaymari Tayta Diospa piñacuynin Juda läduman Jerusalenman ćhämula. Jinaptinmi sumä manchäśha licapayllaman, äśhalayllaman camanapä cä llaqui-llaquicta caćhaycüla. Chaycunacta amcunapis ñawiquiwanmari licapäculanqui.

9Chaycunapïtamá taytanchiccuna ispädawan wañuchisha capäcula. Jinaman walaśh wamla chulinchiccunapis, walminchiccunapis prïsu puśhaśham capäcula.

10“Chaymi cananꞌa, piñacuyninta yaꞌanchicpi aśhuchinanpä, Israelpa Tayta Diosninman limalicuśhä.

11Chayurá iju, amari mana fisyuyu-yupay cayalcaychu. Tayta Dios lulayninćhu lulapäcunayquipä, insinsiucta lupachipäcunayquipämari aclapäcuśhulanqui” nil.

12Niptinmi levitacunaca lulayta allaycapäcula. Paycunam capäcula:

Coatpa milaynincunapïta: Amasaip chulin Mahat, Azariaspa chulin Joelpis.

Merarip milaynincunapïtañatacmi: Abdip chulin Cis, Jehalelelpa chulin Azariaspis.

Gersonpa milaynincunapïtañatacmi: Zimap chulin Joa, Joap chulin Eden.

13Elizafanpap milaynincunapïñatacmi: Simriwan Jeiel.

Asafpa milaynincunapïñatacmi: Zacariaswan Matanias.

14Hemanpa milaynincunapïñatacmi: Jehielwan Simei.

Jedutunpa milaynincunapïñatacmi: Semaiaswan Uziel cala.

15Paycunam aylluncunacta juntuycul chuyanchaculcäla. Jinalculmi mandacücäta Tayta Dios camachishanmannu alawana wasiman yaycapäcula chuyanchapäcunanpä.

16Chaypïta sasirdüticunäñatacmi Tayta Diospa alawana wasinpa lulïninman yaycapäcula chuyanchapäcunanpä. Chay lulićhu lluy anlapä licaśha cäcunätam patyuman julapämula. Chaycunacta levitacunäñatacmi Cedron mayuman wicapapämula.

17Chaynu chuyanchacuyta allaycapäcula wamä quillap allaycuynin muyuncäćhümari. Chaymi pusä muyunpá Tayta Diospa alawana wasip puncuncamaña chuyanchäśha cayäla. Chaypïta Tayta Diospa lluy alawana wasicta chuyanchayta camacäla pusä muyun mastalämi. Chaymi chay quillap ćhunca sütayu (16) muyunninćhu lluyta camacäla.

18Chaypïtam mandacü Ezequiasman lilcälil nipäcun: “Ñam chuyanchälälïña: Tayta Diospa alawana wasinta, cañaywan uycuna patacta, lluy sirbichicunapa cänincunacta, jinaman Tayta Diospa tantanta ćhulanan mïsacta, lluy sirbichicunapä cänintincunactapis.

19Jinaman mandacü Acaz ipanchaycul lluy ima sirbichicunapä cäcunäta wicapaśhantapis allichayculñam chuyanchälälí. Cananꞌa Tayta Diospa uycuna patacninpa ñawpäninćhüñamari cayan” nil.

20Niptinmi mandacü Ezequias wäla-wälalla śhalcuculcul malcap puydïnincunacta juntuycul, Tayta Diospa alawana wasinman lipäcula.

21Aaronpa milaynin sasirdüticunäñatacmi uycuna patacćhu uycupäcunanpä apapäcula: anćhish malta wäcacta, anćhish carnicta, anćhish uwishtapis. Jinaman apapäcula mandacücäpa aylluncunap, Juda lädu nunacunap juchancuna pampachaycuśha cananpämi. Chaynütac Tayta Diospa alawana wasin chuyanchaycuśha cananpäpis anćhish ulu capishtam apapäcula.

22Chayćhümi sasirdüticunaca wäcacunäta wañulcachil yawarninta uycuna patacman chächuycapäcula. Chaynüllam lulaycälila carnicunäwanpis, uwishcunäwanpis.

23Chaypïtam juchaca pampachaycuśha cananpä mandacücäwan lluy juntunacüśha nunacunäpa ñawpäninman ulu capishcunätaLev 4.4. puśhaycula. Chaymi paycuna maquincunacta capishcunäpa umanman ćhulaycapäcula.

24Chaypïtam jinantin Israelpa juchan chuyanchaycuśha cananpä uycuyninwan sasirdüticunaca wañulcachil yawarninta uycuna patacman chächuycula. Mandacücämari camachila jinantin malcäpa juchanpi cañaywan uycuśhä, chuyanchaśhä cananpä.

25Chaynütacmi una-unayña Tayta Dios nichila Davidwan, mandacücäpa willacünin Gadwan, Natanwan,1Cro 25.1. levitacuna tucanan cäcunäwan alawapäcunanpä. Chaymari alawana wasiman Ezequias ćhulala, levitacunaca latillucunacta, arpacunacta, pandirïtacunacta tucapäcunanpä.

26Chaymi levitacunaca David lulachishan tucacuncunawan-cama śhäcuyalcäla, sasirdüticunäñatacmi curnitillacunäwan-cama.

27Chayćhu Ezequiasñatacmi uycuna patacman uycuśha cananpä nila. Chaynu uycuyta allacuycuptinmi Tayta Diospä taquïcunäpis taquiyta allacaycälin. Chaynütac curnitillacunawanpis jinaman Israelpa mandacünin David uśhan tucanacunawanpis tucayta allacaycälin.

28Chaynu uycuśhanca camacänancamam jinantin nunacunaca alawayninwan unꞌulayalcäla, taquïcunäñatac taquiyalcäla, curnitilla tucäcunäñatac tucayalcäla.

29Uycuyta camacäluptinñatacmi mandacüca chayćhu lluy cäcunäwan Tayta Diosta alawayninwan unꞌulacaycälila.

30Chayćhümi mandacü Ezequiaswan lluy puydïcunaca levitacunäta nin: “Davidpa, willacü Asafpa taquincunawan Tayta Diosta alawaśhun” nil. Niptinmi paycuna cushicuywan unꞌulacaycälil alawapäcula.

31Chaypïtam lluy nunacunäta Ezequias nin: “Cananꞌa Tayta Diospa japächäśhañam cayalcanqui. Chayurá alawana wasinman śhapämuy uycälinayquipä, sulpäta uycuyniquiwan uycälinayquipäpis” nil. Niptinmi nunacunaca uycunancäta uycapäcula, sulpäta uycunanpä uycunactapis uycapäculam; llapan śhunꞌucunawantacmi cañaywan uycunancätapis apapäcula.

32Chaynu uycunanpä apapämuśhan uywacunaca capäcula: anćhish ćhunca (70) wäcacuna, paćhac (100) carnicuna, ishcay paćhac (200) uwishcunam. Chaycuna cala Tayta Diosman cañaywan uycälinanpämari.

33Uycapäcuśhancunäñatacmi süta paćhac (600) wäcacuna, quimsa walanga (3,000) uwishcuna cala.

34Ñatac sasirdüticunaca ashlla capäculmi uywacunäta cañaywan uycälinanpä mana camapäculachu. Chaymi camacapäcunanpä levita ayllucunaca yanapapäcula; chaynu yanapapäcula juc sasirdüticunaca chuyanchaculcänancamamari. Levitacunacá sasirdüticunäpïpis mas puntactam chuyanchacälälí capäcula.

35Chayurá cañaywan uycunanpä cäcunaca achca-achcam cacula; allin cawsaśhanpi uycunapä cä wilacunapis, cañaywan uycuśhanćhu jićhaywan uycunanpäpis achca-achcatacmi cacula.

Chaynüpamá Tayta Diospa alawana wasinćhu caśhan sirbiyta allaycapäcula.

36Chaynu yanꞌanülla Tayta Diospa yanapayninwan camacapäcuśhanpïtamari Ezequiaswan lluy malcaca sumä cushiculcäla.