Levitico 18 - Old Testament Quechua Wanca（QVW）

Ayllullanwan mana cuscananpämi nin

1Chaypïtam Moisesta Tayta Dios nin:

2“Caycunacta Israel caśhtacunäta nimuy: Yaꞌami quiquin Tayta Diosnin cayá.

3“Punta yaćhapäcuśhayqui Egipto malcäpa lulaynincunacta amam atichipäcunquichu. Amatacmi puśhaśhá Canaan malcäpa lulaynincunactapis atichipäcunquichu, nïtac yaćhachicuyninmannüpis pulipäcunquichu.

4“Yaꞌamari Tayta Diosniqui cayá. Chaymi camachicuynïmannu lulaycälinqui; yaćhachicuynïmannu puliycälilmi munaśhänu cawsaycälinquipis.

5“Yaꞌamari Tayta Diosniqui cayá. Chayurá camachicuynïta, yaćhachicuynïta lulaycäliy. Mayanpis lulaycücá cawsanꞌamari.

6“Manam mayan wayapapis ayllullanćhu cä walmiwanꞌa canmanchu. Yaꞌamari Tayta Diosniqui cayá.

7“Mamayquiwan cacul papäniquita ama jalutacuychu. Chaytá manam lulanquimanchu mamayqui caśhanpa.

8“Papäniquita ama jalutacuychu walminwan cacul. Chayta lulalꞌa quiquin papäniquiwan lulayänümi cayanqui.

9“Amam paniquiwanꞌa canquichu. Masqui taytallapi ütac mamallapi cacuptinpis, masqui wasiquićhu ütac calućhu näsiptinpis paywan manam canquimanchu.

10“Amam willcayquiwanꞌa canquichu, masqui walaśh ütac wamla chuliquip cacuptinpis. Chayta lulalꞌa quiquiquimari pinꞌayman ćhulacuyanqui.

11“Amam papäniquip juc walminpa wawinwanꞌa canquichu. Payꞌa papäniquip chulin paniquimari.

12“Amam papäniquip paninwanꞌa canquichu. Payꞌa papäniquip ayllunmari.

13“Amam mamayquip ñañanwan canquichu; payꞌa mamayquip ayllunmari.

14“Papäniquip wawꞌi-caśhanta ama pinꞌayman ćhulaychu walminwan cacul; payꞌa tiyayquimari.

15“Amam llumchuyniquiwan canquichu. Payꞌa chuliquip walmin caśhanpam mana canquimanchu.

16“Amam wawꞌi-caśhayquip walminwan canquichu. Payꞌa cuñädayquimari.

17“Amatacmi walmi cuscaśhayquip walmi wawinwan canquimanchu, nïtac willcanwanpis, masqui walaśh ütac wamla wawin cacuptinpis. Chaynu ayllupulalla caśhanpam millachicuy jucha cayan.

18“Amam walmiqui cawsaśhancama ñañanwan casaracunquichu nïtac canquimanchu, ñañapula mana ćhïninaculcänanpä.

19“Walmica quilla ishyacuyninćhu cayaptinꞌa amam paywan canquichu.

20“Amam nuna-masiquip walminwanꞌa canquimanchu. Chayta lulalꞌa quiquiquitamari anlaman muyuchicuyanqui.

21“Amatac taytacha Molocman mayannin chuliquitapis cañaywan uycunquichu. Chaynu lulayniquiwan Tayta Diosta ama jalutacuyaychu.

23“Amam ima uywawanpis canquichu. Chay lulaśhayquiwan amari anlaman muyuchicuychu. Chaynütacmi walmipis ima uywawanpis ama canꞌachu. Chay lulay sumä millachicuy anla lulaymi.

24“Caycunawan anlaman ama muyuchiculcaychu. Caycunacta lulayninwanmari anlamam muyülälila amcunap ñawpäniquipi alapacunäpa cä malcacunaca.

25Jinaman malcanpis anlamanmi muyüla. Chaymi chay mana allinnincunapi mućhuycachiptí malcaca nunacunacta ätümula.

26Ñatac am Israel caśhtacunaca cay camachicuynïcunacta, yaćhachicuynïcunactam lulaycälinqui. Chayurá amcunapis nïtac amcunaćhu yaćhä mana Israel caśhtacunäpis cay millachicuy anla lulaycunäta amam lulapäcunquichu.

27Cay millachicuy anla lulaycunactamari cay yaycapäcunayqui malcaćhu cäcunaca lulapäcula. Chaymari malcaca anlaman muyüla.

28Ñatac amcuna mana allincäwan cay malcacta anlachipäcuptiquiꞌa punta yaćhäcunätanüćha ätülälishunqui.

29Chaynütacmi cay millachicuy anla mana allin lulaycunacta luläcunätá malcapi wicapäśhä canꞌa.

30Chayurá cay yaćhachicuynïcunacta lulayman ćhulapäcuy; amatac chay malca yaycapäcunayquip mana allin millachicuy anla lulaynincunactá lulapäcuychu, nïtac paypa cawsan anlaman muyuchicuyalcaychu. Yaꞌamari Tayta Diosniqui cayá” nil.