1Niptinmi Teman lädu Elifaz nin:
2“¿Yaćhayniyüca uman chalaśhan limaycunawanchun liman imatá?
¿Waywap juntäśhanüpis yanꞌalcunallactachun äśhaycaćhan imamá?
3¿Yanꞌal limaycunallawanchun chalanacun imatá?
¿Mana cäcunallactachun liman imamá?
4Tayta Diosta mana manchacuptiquimari,
juccunapis payta mana manchaculcanchu.
5Pasaypi mana allin tantiayniquimari caycunacta
pinsachishunqui, casquicuycunawan limachishunqui.
6Quiquiquip shimillayquim cunca cuchuyniqui cayan;
manamá yaꞌapachu. Quiquiquip shimillayquimari cuntrayquita limayan.
7“Am, ¿Adanpïta mas puntactachun näsilanqui imatá?
¿Ulꞌucunäpi mas puntactachun lulaśha calanqui imamá?
8¿Tayta Dios lluy puydïnincunawan anyapäśhanta am yaćhayanquichun imatá?
¿Amllachun lluyta yaćhäca cacuyanqui imamá?
9¿Ima mastamá am yaćhanqui yaꞌacuna yaćhapäcuśhäpi?
¿Ima mastamá am tantianqui yaꞌacuna sumä tantiapäcuśhäpi?
10Lluyta tantiä yaśhacunäpis yaꞌacunanümari tantiapäcun.
Taytayquipïpis mas punta cawsäcunäpis chaynümá tantiapäcun.
11“¿Quiquin Tayta Dios cunsuylaycuśhuśhayquica, manachun imapis ampá imamá?
¿Cuyacuywan limapaycuśhuśhayquiwanpis manachun jawca canqui imamá?
12¿Imapïmi piñacuyniquiwan apachicuyanqui?
¿Imapïmi nana-nanay ñawiquiwan licacuyanqui?
13¿Imapïmi Tayta Dioswan piñacunqui?
¿Imapïmi shimiqui chalaśhanta limanqui?
14¿Mayan nunallá, chuyapä licacunmanmá?
¿Nunallapi näsïca juchannä mayanllapis caycunmanchun imamá?
15Aśhta anjilnincunamanpis Tayta Diosꞌa manamari chalapacunchu.
Paypa ñawquinćhuꞌa sïlucunäpis manamá chuyachu.
16Chaylächun pasaypi juchasapa anla nunaca,
mana allin lulaypi yacunäśhanu wañupacuyäca, ¿allin caycunman imamá?
17“Canan sumäta uyaliycamayña;
cawsaynïćhu lluy licaśhätam willaycuśhayqui.
18Yaćhaysapacunäpä awquilluncuna imallactapis
mana pacaycullal lluy yaćhachishancunätam niycuśhayqui.
19Cay malcanchicman allpacta uycuśhan-pachapïta yaćhaycachishancätamari tantiaycachishayqui;
manamari juc yaćhaycunawan jucllachäśhactachu willaycuśhayqui.
20“Awari, mana allin nunaca pasaypi ñacaycunallaćhümá cawsan.
Juyu nunäpa watancuna fintaśhallañam cayan.
21Paycunap linlincuna manchacuycunallactam uyalin;
jawca cayaptinpis suwacunam suwalpälälin.
22Tutawyaycäpïta yaluyta wañupacuptinpis
ispädawan wañuchïninpis janallanćhüñam cacuyan.
23Wisculcunäpä micunannüñamá taplaycaćhayan.
Camacaycüśha cananpä muyunca jiꞌacaycayämuśhanta yaćhapäcunñamá.
24Ñacaycäwan llaquicuycämi jawcactachu manaña caycachin.
Camacaycunanpä mandacü śhamücäta alcäcänümari cayan.
25Chaynu pasan Tayta Diospa
cuntran maquinta pallalcücätam,
sumä munayniyücäpa cuntran nunatucücätam,
26atajachicunwan atajachicüśha
Tayta Diospa cuntran allintucüśha śhalcücätam.
27“Masqui cäran lunluy-lunluy cayaptinpis,
patansi wira-cayninwan śhaśhay-śhaśhay cayaptinpis,
28pulumäśha malcacunaćhümá yaćhanꞌa,
cućhpanayä chunyäśha wasicunaćhümari yaćhanꞌa.
29Manañamá rïcuyanꞌañachu;
ima cäninpis manañamá pasaypipächu canꞌa,
manañamá imanpis milanꞌañachu.
30Tutawyaycäpïta manañamá ayinꞌañachu,
pallaynincunacta ninämi camacaycülunꞌa,
Tayta Diospa pücayninmi päśhactanu payta apacunꞌa.
31Yanꞌalcunäman amari chalapacuchunchu.
Chaycunapi yanꞌal mana cäcunallactamá taliycunꞌa.
32Manaläpis timpunćhümi cuchüśha canꞌa.
Pallaynincunapis manañamá chillquimunꞌañachu.
33Manalä puꞌul palpamü übanümi canꞌa.
Waytayćhu cayal palpamü ulïbus lantanümi canꞌa.
34Mana allin nunacunaca mana milayniyümá capäcunꞌa.
Artillanwan ingañacuynincunawan wasinta juntachishancunäpis ninap camacaycüśhamá canꞌa.
35Mana allinllactam patalayalcan,
ingañacuyllam patanćhu puꞌuyalcan,
juyucunallactamá waćhapäcunpis” nil.
Who We AreWhat We EelieveWhat We Do
2025 by iamachristian.org,Inc All rights reserved.
