1Maynu cushicuymá mana allin lulaynincunapi
pampachaycuśha cäcunaca,
juchancunapi chuyanchaycuśha cäcunaca.
2Maynu cushicuymá juchancunacta
manaña imaypis Tayta Dios yalpalcuśhancunaca,
ingañacuycunallacta śhunꞌunćhu mana uywäcunaca.
3Chaynümi yaꞌapis mana willapacul
muyun-muyun waꞌaptí aychäpis pasaypiña jucmanyacalpula.
4Maquiquita ćhulaycamaptiquimá
tutay-muyun llasacalpamäla.
Usya timpućhu acachaycäwan
awïcänüñamá aychá muyucalpula. Selah
5Ñatac “Tayta Diosman
mana allinnïcunacta willapacuśhä”
nilmi imallactapis mana pacaycul juchäcunacta willayculac.
Jinaptïmi am pampachaycamälanqui.
6Chayurá Taytallay, chalapacü masïcuna
llaquicuyninćhu amta ayacalcämuchun.
Jinaptinmá achca-achca yacu paćhyamücäpis
paycunaman mana ćhaycunꞌachu.
7Anmá pacaycamäní canqui.
Ñacaycunäpi licaycamanqui, libraycü
taquicunallactamá muyülïnïćhüpis caycachinqui. Selah
8Tayta Diosmi nin: “Yaꞌami tantiaycachishayqui,
mayninpa linayquipäpis caminaycuśhayqui,
limapayculmi ñawilläćhu uywaycuśhayqui.
9Amari cawallunu ütac mulanu
mana tantiayniyu capäcuychu;
chay uywacunäta aśhuycachimunchic watucunawan
jaquimacunawanlämi.
Quiquillanpïtá manamá śhapämunchu” nil.
10Mana allin nunacunacá sumä-sumä nanaytamari apapäcunꞌa.
Chalapacünincunactam Tayta Dios
imaypis ama-pacha niycun.
11Am allin nunacunaca, Tayta Diosćhu sumä cushiculcay.
Am allin śhunꞌuyücuna, taquicunawan cushisha alawapäcuy.
Who We AreWhat We EelieveWhat We Do
2025 by iamachristian.org,Inc All rights reserved.
