Ester 9 - Old Testament Quechua Wanca（QVW）

Israelcunämi llallipäcun

1Chay mandacüca camachishancämi lulaśha canan cala, Adar nishan ćhunca ishcayniyu (12) quillap ćhunca quimsayu (13) muyunninćhu. Chay muyunllatacmá ćhïnicünincunapis israelcunäta camacaycünanpä cacuyäla. Chaynu cacuyalcaptinpis quiquincunactamá lluy ticlapälun.

2Asuero mandacuśhan lluy malcacunäćhümari israelcunaca yaćhapäcuśhanćhu-cama juntunacüśha cayalcäla wañuchiyta munäcunäwan pilyapäcunanpä. Ñatac israelcunäta lluy malcacunapis manchälälilmi mana mayanninpis allaycapäculachu.

3Jinaman lluy jatućhä malcacunap puydïnincuna, yanapänincuna, sirbïnincuna, licaycünincunapis Mardoqueocta manchaculcalmi israelcunäta yanapapäcula.

4Mardoqueomari palasyućhu allinnin puydïman licalïla. Chaymi jinantin malcacunaćhu lisisha-lisisha cayal muyun-muyunpa, mas munayniyüman muyula.

5Chay muyun ćhämuptinñatacmari israelcunaca lluy ćhïnicünincunacta ispädawan wañulcachil camacaycüla; munaśhantamari ćhïnicünincunawan lulälälila.

6Jatun malca Susallaćhülämi picha paćhac (500) wayapacunacta wañülächila.

7-10Jinaman israelcunäpa ćhïnicünin Hamedatapa chulin Amanpa ćhunca chulincunactapis wañulächilamá: Parsandata, Dalfonta, Aspatacta, Poratacta, Adaliacta, Aridatacta, Parmasta, Arisaita, Aridaita, Vaizatactapis. Ñatac imapis cänincunactá manamá tupaycälilachu.

11Chay muyunllatacmi Susa malcällaćhülä chaychica nunacta wañuchipäcuśhanta mandacücäman willaycälälila.

12Chaymi mama Esterta mandacüca nin: “Cay Susa malcällaćhüla picha paćhac (500) wayapacunactawan Amanpa ćhunca chulincunacta wañuyalcächilꞌa, ¿jinantin malcacunäćhuꞌa imactañaćh lulälälin? Canan ¿ima mastam munanqui? Ima munaśhayquitapis, mañamäśhayquitapis uycuśhayquimari” nil.

13Niptinmi Ester: “Tayta mandacü, allinpä licayculꞌa, canan muyun israelcunäpa cuntran śhalcücunäta wañuchishannülla wala muyunpis cay Susa malcaćhu yapa lulaycuśha cachun. Jinaman Amanpa ćhunca chulincunapis iluman walcäśha cachun” nil.

14Chay mañacuśhantanüllamá Susa malcaćhu mandacüca lulaycula. Chaymi Amanpa ćhuncantin wañüśha chulincunacta walcächila.

15Chaynütacmi Adar quillap ćhunca tawayu (14) muyunninćhu Susa malcaćhu israelcunaca quimsa paćhac (300) mas wayapacunacta yapa wañülächila. Cänincunactañatacmi ichá nï duyñuchaculcälachu.

16Chaynütacmi juc malcacunäćhu yaćhä israelcunäpis ćhïnicünincunapi difindiculcänanpä juntunacüśha cayalcäla. Chayćhümi paycunapis anćhish ćhunca pichayu walanga (75,000) ćhïnicünincunacta wañülächila. Cänincunactañatacmi ichá nï yataycapäculachu.

17Lluy caycuna Adar quillap ćhunca quimsayu (13) muyunninćhümari pasala. Chay walantin ćhunca tawayu (14) muyuncäćhüñatacmi jamapäcul cushicuypi fistachaculcäla.

18Ñatac Susa malcaćhu yaćhä israelcunaca ćhunca quimsayu (13), ćhunca tawayu (14) muyuncunäćhu difindiculcänanpä juntunacüśha capäculmi, jamapäcul cushicuypi fistachaculcäla ćhunca pichayu (15) muyuncäćhülä.

19Chay mana murällayu tacsha malcacunaćhu yaćhä israelcunaca Adar quillap ćhunca quimsayu (13) muyunninćhu difindiculcäśhanpïmi ćhunca tawayu (14) muyunninćhu cushicuypi fistachaculcäla; jinaman jucnin-jucninmi imactapis uycunaculcäla. Chaynümari canancamapis lulapäcun.

Purim nishan fistacta lulapäcunanpämi tacyalpachin

20Cay pasaśhancunacta Mardoqueo isquirbiycachilmi, mandacü Asuero mandaśhan jatun malcacunäćhu yaćhä israelcunäman cartacta apachila, masqui calu ütac sirca cacuptinpis.

21Chay isquirbishanćhümi limala ćhunca tawayu (14), ćhunca pichayu (15) muyuncunäćhu watan-watanpis juc fistacta lulapäcunanpä.

22Chay muyuncunäćhümari ćhïnicünincunapïta israelcunaca libraycuśha capäcula; chay quillaćhütacmi llaquicuyninpis cushicuyman muyuycula, waꞌacuyninpis fistachacuyman ticlaycula. Chaymi chay muyuncunäćhu cushicuypi fistachaculcänan, jucnin-jucnin micuycunacta uycunaculcänan, jinaman wacchacunämanpis uycapäcunan cala.

23Chayurá Mardoqueo nishanmannu israelcunaca fistacta lulayta allaycapäculmi custumrinmanña muyülächila.

24Má yalpalcuśhun, chay muyunćhu israelcunäpa ćhïnicünin Hamedatapa chulin Agag caśhta Amanmi, israelcunäta camacaycüluyta munala. Chaynu wañulcachil camacaycünanpämari Pur nishanta chüsala. nishanwan chüsaśhanpïtamari chay muyuncunacta Purim nipäcula.

Chayurá Mardoqueo isquirbishannu quiquincunapis licaśhannu pasaśhannu,

27israelcunaca tacyachipäcula paycunapis, milaynincunapis, jinaman paycunaman jucllachacücunäpis mana unꞌapäcunanpämari. Chaymi cay ishcay muyun fistacta watan-watan unanchaśhan muyuncunäćhu lulapäcü cala.

28Chay muyuncunacta yalpapäcunanpämari lluy ayllucunaca jatun tacsha malcacunäćhüpis, milaynincunapis lulapäcunan cala. Chaynüpam Purim fistacta israelcunäpis milaynincunapis mana unꞌallal lulapäcunan cayan.

29Chaypämari Abihailpa wamla chulin mama Esterwan Israel lädu Mardoqueo juc camachicuyta isquirbila, Purim fistaca lulaycuśha cananpä.

30Chaytam Asuero mandacuśhan paćhac ishcay ćhunca anćhishniyu (127) jatun malcacunäman apächila, cuyacuywan allin limaywan isquirbïshacta.

31Chayćhu isquirbïsha cala Israel lädu Mardoqueowan Ester camachishanmannu unanchaśhan muyuncunäćhu Purim fistacta lulapäcunanpämari. Chaynütac imanuypa ayunapäcunanpäpis, waꞌapäcunanpäpis nilatacmi.

32Chaynüpamá Ester camachila Purim fistacta lulapäcunanpä. Lluy caycuna juc librumanmari isquirbïsha cala.