Ezequiel 42 - Old Testament Quechua Wanca（QVW）

Sasirdüticunäpa cuartuncuna

1Chaypïta nurti lädućhu cä waśha patyumanmi puśhäman. Jinalmi chay jäcücäpa chimpanćhu cä cuartucunäman ćhächiman. Caymi nurti lädunćhu caña, alawana wasip matänin cuartu lädunćhu, patyup chimpanćhu.

2Chay nurti lädućhu cä wasica picha ćhunca (50) mitrum largunman caña; anchunmanñatacmi ishcay ćhunca pichayu (25) mitru caña.

3Chay juc lädunñatacmi luli patyu läduman licalayäña; anchunmanmi ćhunca (10) mitru caña. Jucnin lädunñatacmi waśha lädu patyuman, chay läja lumiwan laꞌaśha pampaman licalayäña. Chaycuna quimsa altuśhniyü-camam capäcuña.

4Chay cuartucunap chimpanćhu jäcuyämi caña. Chaypa anchunmi picha mitru caña; largunñatacmi picha ćhunca (50) mitru caña. Chay jäcüca nurti lädumanmi yalupäcuña.

5Chay altuśhćhu cä cuartucunaca mas tacshallam lulinćhu cä cuartucunäpi capäcuña. Chaynu mas tacshalla caña balcunnincuna captinmi.

6Chay wasi quimsa altuśhniyümi caña. Ñatac patyućhu cäcunäpänüchu sulïrancuna manamá caña. Chaymi quimsa cä altuśhca mas tacshalla caña, chay juc altuśhcunäpïtá.

7-8Waśha lädu patyuman licalayä pilañatacmi ishcay ćhunca pichayu (25) mitru largunman caña. Chay chimpa läduman cäcäpis ishcay ćhunca pichayu (25) mitrutacmi caña. Chayurá chay alawana wasi läduman licalayä pilaca lluy caña picha ćhunca (50) mitrum.

9Chay cuartucunaman inti yalamunan lädućhu cä waśha patyupmi yaycunan caña.

10Chaynütacmi sur lädućhüpis cuartucuna caña. Chaycuna alawana wasip matäninćhu cuartucunap chimpallanćhümi caña, chay jäcücäpa chimpallanćhu.

11Chay cuartucunapapis pasadïsun nurti lädućhu cäcänüllam caña. Chay cuartucunaca nurti lädućhu tupuśhancänüllamari anchunmanpis, largunmanpis, yaycunancuna, yalunancunapis caña.

12Sur lädućhu cä cuartucunaman yaycunanpämi pasadïsup allaycuyninćhu puncu caña. Chay puncu inti ishpimunan lädumanmi licalayäña.

13Chayćhümi chay nunaca niman: “Nurti lädućhu, sur lädućhu cä cuartucunaca chuya cuartucunam. Chayćhümi Tayta Diosman uycunacunacta uycälï sasirdüticunaca chay chuya uycuśhancunapi micapäcunꞌa. Chay sityu chuya captinmari chayman ćhulapäcunꞌa: ćhacla micuy uycuśhancunäta, mana allin lulaśhanpi uycuśhancunäta, juchanpi uycuśhancunätapis.

14Alawana wasićhu waśha patyuman manalä yalulmi sasirdüticunaca sirbipäcunanpä cä müdanancunacta cambiaculcanꞌa. Chay müdanancuna chuya captinmi waśhaman yalapäcul nunacunäman aśhuycunanpä juc müdanawan ćhulaculcänan” nil.

15Chay alawana wasip lulintawan patyunta tupuyta camacalculmi inti yalamunan lädu sawanpa yalächiman. Jinalculmi waśha lädu lluy muyülïnin murällanta tupuña.

16Chay tupunapä cä śhuꞌuśhwan inti yalamunan läducta tupuptinmi ishcay paćhac picha ćhunca (250) mitru caña.

17Nurti läducta tupuptinpis ishcay paćhac picha ćhunca (250) mitrum chaypis caña.

18Chaypi sur läducta tupuptinmi ishcay paćhac picha ćhunca (250) mitru chaypis caña.

19Chaypi inti yaycunan läducta tupuptinmi ishcay paćhac picha ćhunca (250) mitrutac chaypis caña.

20Chayurá chay murällancuna largunmanpis anchunmanpis ishcay paćhac picha ćhunca (250) mitru-camam caña. Chay murällam Chuya Sityucta mana allin sityupïta laquiña.