Zacarias 11 - Old Testament Quechua Wanca（QVW）

1Má, Libano lädu puncuyquicunacta quićhaycuy,

cedro iluyquicunacta ninaca camacaycünanpä.

2Cedro ilucunaca cućhpaśhanpïta,

am cipres ilucunaca awćhupäcuy;

sumä allinnin ilucunämari cućhpälälin.

Sumä munticunaca camacaycüśha caśhanpïta,

Basan lädućhu encina ilucuna apalcaćhapäcuy.

3Tuqui-tuqui pastucunaca camacaycüśha caśhanpïtamá

michïcunäpis apalcaćhayalcan.

Jordan muntipis pampaman lluy muyüchisha captinmá

liyuncunäpis awćhuyalcan.

Ishcay licchä michïcunapïmi nin

4 Tayta Diosnïmi nin: “Wañuchinapä cä uwishcunäta michimuy.

5Lantïcunaca mana llaquipaycul uwishcunäta wañuchishanpi manamá mućhuycachishachu cayalcan. Lanticücäpis: ‘Sulpay callächun, Tayta Dios allinpä licaycamaptinmi rïcuyälú’ ninlämi canpis. Aśhta michïnincunapis uwishnincunacta manamari llaquipaycunchu.

6Chayurá cay allpäćhu yaćhäcunäta yaꞌapis manamá llaquipaycuśhächu. Aśhwanpa nuna-masinpa maquinman, mandacücäpa maquinmanmi ćhulaycüśhä. Jinaptí chay allpanta camacaycuptinpis yaꞌa manañamá salbaycuśhächu. Yaꞌa Tayta Diosmari niyá” nil.

7Chaymari wañuchinanpäña caśhan sumä llaquisha cä uwishcunäta sumäpa michiyculá. Michinäpämari ishcay garuticta chalacuyculá: Jucnintam “Llaquipayniyüwan” śhutichalá, juccätañatacmi “Jucllachäca” nishanwan. Chaycunawanmari uwishcunäta michiyculá.

8Jinalmi juc quillallaćhu chay quimsa michïcunacta alapacülá. Ñatac uwishcunaca anchapñamari ćhïnicamäla, yaꞌapis anchapñatacmi amïlá.

9Chayćhumi nilá: “Manañam mastá michiśhäñachu. Wañunanpä cäcá wañuchunña. Mayanpis wañuchiyta munäcá wañuchichunña. Quïdäcunäpis quiquin-pulaña micunaculcächun” nil.

10Nilculmi “Llaquipayniyüwan” śhutichaśhá garuticta aptilcul paquïlú. Chaynüpamari lluy malcacunäman limalicuśhancäta paquïlá.

11Chay muyunmá Tayta Dios limalicuśhanca mana cäman muyüla. Chayćhu paquishäta uwish ñacäcunaca licapäculmi tantiälälin quiquin Tayta Dios limapämäśhanta.

12Chayćhümi paycunacta nilá: “Michishäpïta pägayta munamalꞌa pägaycamayꞌari; mana munalꞌa ama pägamaychu” nil. Niptïmi quimsa ćhunca (30) illayta tupuycul uycamäla.

13Chaynu pägaycamaptinmi Tayta Dios niman: “¿¡Allintamá ćhaninchaycaman aw!? Chay illaycäta alawana wasïman wicapaycämuy” nil. Nimaptinmi chay quimsa ćhunca (30) illaycäta chalalcul Tayta Diospa alawana wasinćhu cä illay juntunanman wicapaycülá.

14Chaypïtam “Jucllachä” nishá garutictapis paquïlú. Chaynüpamari Judawan Israel juclla caśhanca paquïsha cala.

15Chayćhümi Tayta Dios niman: “Cananꞌa má, mana allin michïnu caycuy.

16Cananꞌa cay malcaman imactapis mana ucü michïtamá ćhulaycüśhä. Chaymi chincäśhacunäta jitälunꞌaña, uchuchäcunällactapis manaña ashiycunꞌachu, ishyäcunäta manaña jampiycunꞌachu, allin uwishcunätapis manañam micachinꞌañapischu. Aśhwanpam shilluncunactapis paquiypa pawalcul wirannincunacta micucülunꞌa” nil.

17¡Ash imanuylä canꞌa

uwishnincunacta jitä mana bälï michïca!

¡Ispädawan cuchüśha maquin cachun!

¡Allï ñawinpis ispädawan tucsïsha cachun!

¡Liclan wañüśha cachun!

¡Allï ñawinpis pasaypi apläśha cachun!