Zacarias 13 - Old Testament Quechua Wanca（QVW）

1“Chay timpućhümi pucyupïta yalamü yacuwan paꞌaculcanꞌa Davidpa milaynincuna, Jerusalenćhu yaćhäcunaca chay juchancunacta, millachicuy mana allin lulaynincunacta chuyanchaculcänanpä.

2“Chay timpućhu cay nasyunpïta taytachacunap śhutincunacta chincächiptïmá imaypis manaña yalpalcuśhachu canꞌa. Chaynütacmá artish willacücunätapis, mana allinta limachï achatucunätapis camacaycüśhä. Yaꞌa Tayta Diosmari niyá.

3“Mayanpis willacüpa pasachicücätá aśhta quiquinpa tayta mamanpis ninꞌam: ‘Tayta Diospa willacüninpänu yanꞌal pasachicuśhayquipam canan wañunqui’ nil. Chaynu willacüpänu pasachicücätá quiquinpa tayta mamanpis ispädawanmi wañüchinꞌalä canpis.

4“Chay timpućhu willacücunaca, artish willacuynincunacta willacuyta pinꞌaculcanꞌamá. Manañamari jatun millwaśh sacunninta ćhulaculcul ingañaculcanꞌañachu.

5Aśhwanpam nipäcunꞌa: ‘Yaꞌa manam willacüchu cá; uchuylläpïpis ćhaclaćhu lulacümi callá’ nil.

6Ñatac mayanpis: ‘¿Imapïmi aychayquićhu dañäduyquicuna cayan?’ nil tapuptin, payñatacmi: ‘Apanacuśhä-mäsïpa wasinćhümi dañäducüllá’ nipäcunꞌalä canpis” nil.

7Sumä munayniyu Tayta Diosmi nin:

“Am ispäda, michïnïpa cuntran śhalcuy;

apanacuśhäpa cuntran caycuy.

Michïcäta camacaycüluptiquimá

uwishcunaca wicta cayta chiꞌipäcunꞌa.

Yaꞌañatacmi uchuchä uwishcunäpa cuntran śhalcuśhä.

8Jinantin nasyunpa ishcay partinmá

camacaycüśha chincapäcunꞌa.

Jucnin partillañamari quïdapäcunꞌa.

Yaꞌa sumä munayniyu Tayta Diosmari niyá.

9Cay quïdäcunätamá illaytanu ninäćhu chulluycachishä,

üructanu chuyanchaycuśhä.

Chayćhu yaꞌacta ayacalcämaptinmi

niycuśhä ‘Malcallay’ nil.

Paycunañatacmi nipämanꞌa:

‘Yaꞌacunap Tayta Diosní anmi canqui’ ” nil.