Deuteronomio 22 - Old Testament Quechua Wanca（QVW）

1“Sïchuśh malca-masiquip chincäśha wäcanta ütac uwishninta licälulꞌa ama upatucuycuychu. Aśhwanpa nunanman cutïchipuy.

2Sïchuśh chay uywacunap nunan mana bisinuyqui captin ütac mayanpa caśhantapis mana yaćhalꞌa, duyñun ashimunancama wasiquićhümi uywanqui. Licalïmuptinñamari cutiycächinqui.

3Chaynümi lulaycunqui malca-masiquip aśhnunta, müdananta, imantapis jitacüśhanta talïlul. Amari upatucuycuychu.

4“Sïchuśh malca-masiquip aśhnun ütac wäcan caminüćhu cućhpäluptin śhalcachïshïluy. Amari upatucuycuychu.

5“Chaynütacmi wayapacunaca walmip müdananwan ama müdaculcanꞌachu; nïtac walmicunäpis wayapap müdananwan müdaculcanmanchu. Chaynu müdacücunäta Tayta Diosniqui millachicunmari.

6“Sïchuśh puliyal jaćhäćhu ütac pampäćhu ishnacta talïluptiqui, luntunta ütac mallwanta maman üllalayaptin amari mallwäta mamantinta apaychu.

7Mallwällacta apacul mamantá caćhaycüluy. Chaynüpaćh achca wata cawsal cushisha canqui.

8“Mayanpis muśhü wasicta lulalꞌa altuśhninpa lluy muyülïninta atajananpä pilanquim. Jinaptiquim manaña mayanpis palpunꞌachu, ni wañunꞌachu. Chayćha lluy aylluyquipis wañuypïta manaña juchachäśhañachu canꞌa.

9“Mayanniquipis üba ćhaclayquiman amam juccunactá talpupäcunquichu. Chaynu lulälulꞌa, chay talpuśhayquicunätawan üba lantayquicunacta Tayta Diosllapäñam japächapäcunqui.

10“Amamá wäcactawan aśhnucta mataycachil äranquichu.

11“Amatacmi lïnuctawan millwacta jucllachaycul luläśha müdanawan müdacunquichu.

12“Müdanayquip tawan isquinanćhümi shallshi-sallshinta lulanqui.Casaracunanpä imanuy capäcunanpämi nin

13“Sïchuśh juc umri walmiwan casaracülul puñupäcunꞌa; chaypïta manaña munätucuyninwan,

14yanꞌal tumpanꞌa: ‘Cay walmiwan puñuyculmi tantialú umricta lisïña caśhanta’ nil.

15Chaynu captin wamläpa maman taytanñatacmi malcap puncunćhu cä yaśhacunäman umricta manalä lisï camalachicunta apaculcul lipäcunꞌa.

16Chayćhümi wamlap taytan yaśhacunäta nipäcunꞌa: ‘Walmi chulïta cay umriwan casarächiptïmi canan mana allinpaña lican.

17Jinalmi pinꞌayman ćhulayninwan liman: “Cay chuliqui umricta lisïñam caña” nil. Ñatac cayꞌari umricta rasunpa manalä lisï camalachicunta licapäcuy’ nil. Chaynu taytancuna nilculmi malcap yaśhancunacta puñupäcuśhan säbanacta licachipäcunꞌa.

18Niptinmi malcap yaśhancuna chay umricta chalalcälil lawćhälälinꞌa.

19Jinaman umricta manalä lisï Israel caśhta wamlacta pinꞌayman ćhulaśhanpïtam wamlap taytancunaman paćhac (100) illayta päganꞌa. Jinalcul walminpïta manam laquicunmanchu; aśhwanpam cawsaśhancama cusca capäcunꞌa.

20“Ñatac umricta lisï wamla rasunpa captinꞌa,

21taytanpa wasin puncunman jululculmi malcaca tamshaywan wañülächinꞌa. Caynu lulaśha canꞌa Israel malcaćhu millachicuyta lulaśhanpam, jinaman taytanpa wasinćhu ipanchaśhanpam. Chaynüpamari amcunaćhu cä mana allincäta chincachipäcunqui.

22“Chaynütac wayapayu walmiwan juc umri puñuyal talichicülulꞌa pulanmi wañuchisha capäcunꞌa. Umrïpis walmïpis wañuchishamari capäcunꞌa. Chaynüpam Israel caśhtacunäćhu cä mana allincäta chincachipäcunqui.

23“Sïchuśh umricta manalä lisï wamla casaraculcänanpä limaśha cayal, juc umriwan puñüläliptinꞌa,

24malcap puncunmnan puśhalculmi tamshaywan pulan wañuchisha capäcunꞌa;

30“Manatacmá mayanpis papäninpa walminwan canmanchu. Chaynu lulalꞌa papänintam jalutacuyan.