2 Reyes 18 - Old Testament Quechua Wanca（QVW）

Juda lädućhu Ezequiasmi mandacun 2Cro 29.1-2

1Canan má, Israel lädućhu Elapa chulin Oseas quimsa wataña mandacuyaptinmi, Juda lädućhu mandacuyta allaycula Acazpa chulin Ezequias.

2Pay ishcay ćhunca pichayu (25) watanta liyalmi mandacuyta allaycula. Paymari ishcay ćhunca isunniyu (29) wata Jerusalenpïta mandacula. Mamanñatacmi Zacariaspa chulin Abi cala.

3Cay Ezequiaspa lulayninmi awquillun Davidpa lulayninnu Tayta Diospa ñawquin allin caycula.

4Paymi altunnincunaćhu uycunacunacta tunïla, lumipi taytachancunactapis paquïla, mamacha Aserap liträtuncunactapis amshüla. Jinaman Moises lulachishan brunsipi culibraycätapis nipäcuśhan puntanćhu taytachamannu Israel läducunaca insinsiucta lupachipäcuptinmari.

5Ezequiasꞌa, Israelpa Tayta Diosllamanmi chalapacuyninta ćhulaycula. Paynuꞌa puntactapis nï ipactapis Juda lädućhu lluy mandacücunäpïta manamari juc calachu.

6Payꞌa Tayta Diosllaman masïsu chalapaculmi mana caćhayculachu. Aśhwanpa Tayta Dios Moisesman camachicuy uycuśhancunätamari lulaycula.

7Chaymi Ezequiaswan Tayta Dios cawsaycuptin ima lulaśhanpis allin yaluycula.

Chaypïta Asiriap mandacüninpa cuntran Ezequias śhalculculmi maquinćhüñachu nï sirbila.

8Chaynütacmi Filisteo läducunäta Gazacama lluy llallïla, türri täpänincunactapis, sumä murällaśha malcancunactapis.

9Chaynu mandacü Ezequias tawa wataña mandacuyaptinmi, jinaman Israel lädućhu Elapa chulin Oseaspis anćhish wataña mandacuyaptinmi, Asiriap mandacünin Salmanasar Samaria malcaman lilcul lluy cunćhacuycula.

10Jinalmi quimsa watactalä llallïla. Chayurá Ezequias süta wataña mandacuyaptin, jinaman Israel lädućhüpis isun wataña Oseas mandacuyaptinlämari Samaria malcacta pudiracuycula.

11Jinalculmi mandacü Salmanasar, Israel läducunäta Asiriaman prïsu puśhachimula. Chayćhümi ćhulala Halah malcaman, Habor mayup patanćhu cä Gozan malcaman. Chaynütac Medo läducunäpa malcancunamanpis chayćhu yaćhapäcunanpä ćhulala.

12Chaynu Israel läducunäta pasala Tayta Diosninta mana cäsucuycul limalicuśhantapis jalutacuśhanpïmi. Manamá Tayta Diospa nunan Moises camachishancunactapis uyaliculcälachu nï lulaymanpis ćhulapäculachu.

Juda läductam mandacü Senaquerib pudiracuycun 2Cro 32.1-19; Isa 36.1-22

13Chaynu ćhunca tawayu (14) wata Ezequias mandacü cayaptinmi Asiria lädup mandacünin Senaquerib, Juda lädu sumä murälläśhaman śhalcamul lluy malcacunacta pudiracuycula.

14Chaymi Asiriap mandacüninta Laquis malcaćhu cayaptin, Juda lädup mandacünin Ezequias nichimula: “Mana allintam lulälú. Cay malcäpïta liculcaptiquiꞌa, ayca nimäśhayquitapis pägaśhayquim” nil.

Niptinmi Asiriap mandacünin pägachila, Juda lädup mandacünin Ezequiasta isun walanga isun paćhac (9,900) quïlu illayta, isun paćhac isun ćhunca (990) quïlu üructa.

15Chaymi Ezequias Tayta Diospa alawana wasinćhu, jinaman palasyućhu lluy illay cäcunäta uycula.

16Chayćhümari Ezequias Tayta Diospa alawana wasip puncuncunaman, marcuncunaman quiquin laꞌachishan ürucunäta julalcachil Asiriap mandacüninman uycüla.

17Chaypïta Laquis malcapi Asiriap mandacüninmi, Jerusalenman caćhala pilyänincunap puydïninta, yanapäninpa puydïninta, bïnu sirbïnincunap puydïninta, jinaman batallun pilyänintinta mandacü Ezequiaswan limamunanpä. Paycunam Jerusalenman ćhaycul janay lädu istanquipi śhamü siquia läduman ćhulanacälälila. Chay istanqui cayan “Täśhäcäpa ćhaclanman” nishan lï caminućhümi.

18Chaypi mandacücäta ayachipäcuptinmi caćhamula Hilciaspa chulin mandacücäpa yanapänin Eliaquimta, jinaman isquirbïnin Sebnata, chaynütac Asafpa chulin isquirbïnin Joatapis.

19Paycuna Ezequiasta nipämunanpämi, Asiria läducunäpa bïnu sirbï puydïnin nin: “Asiriap sumä mandacüninmi nin: ‘¿¡Imamantá sumä chalapacuyanqui!?

20¿¡Pilyućhu limapäśhallanchicwanchun llallinchic imatá!? Yaćhaywan imactapis mana manchalillal pilyaywanmari llallinchic. Chayurá ¿imaman chalapacultan cuntrá śhalcucuyanqui?

21Yaćhayämá Egipto yanapäśhunayquipä chalapacuśhayquita. Egiptoꞌa waꞌachäśha śhuꞌuśhpa aśhtillannüllamá; chaymá chalapacüninpa maquinta ćhiplälul pasälun. Chaynümari chalapacünincunapä mandacüca cayan. Chaynümari Egiptop mandacüninca cayan.

22“ ‘Ñatac amcuna nipämanquićh: “Tayta Diosnïmanmi yaꞌacuna chalapaculcá” nil. Chaychun ¿altu ulꞌucunäćhu taytachayquip uycunancunacta Ezequias lluy chincächila? ¿¡Manachun Juda lädućhu, Jerusalenćhu cäcunäta cay Jerusalenćhu cä uycuna patacllaćhüñam alawapäcunqui nila imamá!?’ nil.

23“Canan má, Asiria nasyunpa mandacünïwanꞌari canan limanaculcay. Ishcay walanga (2,000) cawallucta yaꞌa uycucmanmi, chaychica sillädacunacta talimunayqui captinꞌa.

24Mandacüní Asirio läducunap pishi callpa puydïllantapis mana manchayächilchun, ¿Egiptopïlä cawallucunactawan sillänincunacta taliyta pinsayanquiman imamá?

25Icha ¿Tayta Dios mana niycamaptinchun cay nasyunta camacaycunäpä śhayalcämú imatá? Tayta Diosmari nimäla, cay nasyunman yaycuycul camacaycünäpäpis” nil.

26Niptinmi chay puydïcäta Hilciaspa chulin Eliaquim, Sebna, Joa nipäcula: “Ama chaynu caychu, murällap jananćhu cä nunacunaca uyaliyalcaptinꞌa, Juda lädup limayninćhuꞌa amari limapapämaychu. Arameo limayćhuꞌari limapapällämay; chay limayćhuꞌa tantiapäcuśhämari” nil.

27Niptinmi Asirio lädup puydïninca nin: “¿Taytay, amllactawan puydïllayquita niycunäpächun mandäní caćhamäla imamá? Murällap jananćhu cä lluy nunacunätapis niycunäpämari caćhamäla. Paycunapis amcunapis quiquiquip ismayniquitamá micapäcunqui; ishpayniquitamá upyapäcunquipis” nil.

28Nilculmi pilyäcunap puydïnin śhalculcul, callpa-callpawan apalcaćhaypa nila, Juda lädup limayninćhu: “Asiriap sumä jatun mandänin nishanta uyalipäcuy:

29‘Mandacü Ezequiaswan ama ingañachicuyalcaychu; maquïpïta pay manamá imaypis libraycälishunquimanchu.

30Ezequiasꞌa Tayta Diosman chalapacachiyta jicutapäcuśhunquim: “Rasunpa Tayta Dios libraycamäśhunmi. Asiriap mandacüninpa maquinman, malcanchic ćhänanta pay manamá munanꞌachu” nil. Chay nishanwan amari awnichicuyaychu.

31Ezequiasta amari cäsupäcuychu. Asiriap mandacüninmi caynu niyalcäśhunqui: “Cay nishäta awnipäcuptiquiꞌa amcunawan manañamá pilyaśhächu. Maquïman ćhulacalcämuptiquiꞌa üba, ïgus lantayquicunapïtamá micapäcunqui; püsuyquicunapïmá yacuctapis upyapäcunqui.

32Chaypïta amcunap malcayquimannu cä allpamanmi puśhapäcuśhayqui: trïgucuna, üba lantacuna, tantacuna, bïnucuna cä malcaman, jinaman ulïbus asaytiwan mishquilla cä malcamanmari. Chayćhu allin cawsapäculmi mana wañupäcunquichu. Ezequiastá amari cäsupäcuychu. Yanꞌalätac ingañayalcäśhunquiman Tayta Dios libraycamäśhunmá nil.

33¿¡Asiriap mandacüninpa maquinpïta mayanllan malcallactapis taytachancuna librayculachun imatá!?

34¿Hamatpa, Arfadpa taytachancuna mayćhütá cayalcan? ¿Mayćhümá Sefarvaimpa, Henap, Ivap taytachancunapis cayalcan? ¿Chay taytachancuna maquïpïta Samariacta libraycuyta atipapäculachun imamá?

35¿Cay malcacunap mayannin taytachallanꞌa maquïpïta malcanta librayculachun imamá? Chayurá ¿imanuypatan maquïpïta Jerusalenta Tayta Dioslla libraycunman?” ’ ” nil.

36Niptin malcäñatacmi uyaliyllaman camäśha juc shimillactapis nï limalcapäculachu. Mandacü Ezequiasmari mayanpis mana limalcunanpä camachila.

37Jinaptinmi Hilciaspa chulin palasyućhu puydï yanapä Eliaquim, jinaman isquirbïnin Sebna, chaynütac Asafpa chulin mandacüpa sicritariu Joa, sumä llaquisha müdanantapis laćhyäśha śhapämula Ezequiasman. Chayćhümari willaycälila Asiriap pilyänincunap puydïnin ima nishantapis.