Isaias 56 - Old Testament Quechua Wanca（QVW）

Lluy salbaycuśha cananpämi Tayta Dios nin

1 Tayta Diosmi nin:

“Tincüllanman lluyta licaycäliy;

allincällacta lluywan lulaycäliy.

Salbaycunäcämi jananchicćhüña cacuyan;

tincüninman licaycuynïmi camalaycachishaña canꞌa.

2Maynu cushicuymi camachishäcunacta

mana jucmanyällal cäsucü nunäpä,

maynu cushicuymi jamana muyunta allinpä licaycul mana jalutacü nunäpä,

jinaman mana allin lulaycunapïta laquicü nunäpä.

3“Tayta Diosman chalapacü mana Israel

caśhta nunaca ama niyächunchu:

‘Malcanpïtaćh Tayta Dios laquïmanꞌa’ nil.

Capäśha nunäpis amatac niyächunchu:

‘Mana milayniyu chaquïsha lantam cayá’ ” nil.

4Chaymari Tayta Dios nin:

“Sïchuśh capäśha nunaca jamana muyuncäćhu

jamaptinꞌa, munaśhäcunacta lulaptinꞌa,

limalicuśhämannu cawsaycuptinꞌa,

5walaśh-wamla chulicunacta uycunäpïtá

mas allinnintalämi uycuśhäpis.

Wasi lulip pilancunaćhülämá śhutinta lulaycachishä;

mana chincä wiñaypa cä śhutictalämá uycuśhäpis.

6“Sïchuśh mana Israel lädu nunapis

yaꞌacta chalapacamal cuyaywan sirbimaptinꞌa,

mana jalutacullal jamana muyuncäćhüpis

jamaycuptinꞌa, limalicuśhämanpis chalapacuptinꞌa,

7chuya ulꞌümanmi puśhaycuśhä.

Mañacamänan wasïćhümari sumä-sumä cushicuytapis uycuśhä.

Uycuna patacnïćhümi alawayninwan ütac

pampachaycunäpä uycamäśhantawan

cañaycapamäśhantapis ćhasquiycuśhä.

Chay alawana wasí yaꞌallawan

limana wasim lluy nasyuncunapä canꞌa” nil.

8Chiꞌisha cä israelcunäta juntuycamü

sumä munayniyu Tayta Diosmari nin:

“Cutichimuśhá malcäman, juc caśhta

nunacunätapis juntuycamuśhälämi” nil.Mana allin puydïcunätam anyapan

9Tayta Diosmi nin:

“Ulꞌucunäćhu cä munti uywacuna,

munticunäćhu cä chucaru uywacuna,

śhapämuy malcäta camacaycü.

10Malcäpa täpänincuna pasaypi aplamá,

tullu uma-camamá.

Paycuna caniytapis mana atipä

upa allꞌucunänümá;

imaypis anćhalayalcä aywićhyayalcä-camamá;

puñuyllapïmá wañupaculcanpis.

11Micuypi wañuyä allꞌucunänümá

imawanpis mana maćhaycälinchu.

Mana tantiayniyu michïcunämá;

uman chalaśhanćhümi taplaycaćhapäcun;

quiquinpä munayllantamá ashipäcunpis.

12Paycuna nipäcunlämi: ‘Śhapämuy; bïnucta upyacuśhun;

puꞌuśha aswacunacta shincananchiccama upyacuśhun.

Canan muyun lulaśhanchicpïta

mas allinlämi wala muyunꞌa canꞌapis’ ” nil.