2 Cronicas 16 - Old Testament Quechua Wanca（QVW）

Mandacü Ben-adadmi Asawan limanaculcan 1Rey 15.16-22

1Chaypi quimsa ćhunca sütayu (36) wataña Judata Asa mandacuyaptinmi, Israelpa mandacünin Baasa lila paycunawan pilyamü. Chayćhümi Rama malcacta llallïla. Jinalculmi pilyänincunawan murällacunacta tacyachila mayanpis Judapi mana yalamunanpä ni yaycunanpäpis.

2Jinaptinmi Tayta Diospa alawana wasinćhu, jinaman quiquinpa palasyunćhu quïdä ürucunäta, illaycunäta willacünincunaman uycul, Siriap mandacünin Ben-adadman apächin. Damasco malcaćhümari Ben-adad yaćhala. Paytam Asa caynu nichila:

3“Taytanchiccuna limalinaculcäśhannu yaꞌanchicpis limalinacuśhun. Israel lädup mandacünin Baasaman limalicuśhayquitari mana caśhanman muyuchiy; chayćha jawcactaña caćhaycamanꞌa. Chaypämi cay ürucunäta, illaycunäta apayächimú” nil.

4Chaynu mandacü Asa nichishanta Ben-adad awniyculmi pilyänincunap puydïnincunacta Israelpa malcancunaman pilyä yaycunanpä caćhäla. Jinalmi llallïla Ijon, Dan, Abel-maim malcacunacta, jinaman Neftali ayllućhu micuycunacta ćhulananpä cä malcacunactapis.

5Chaynu waquin malcancuna camacaycüśha caśhanta yaćhälulmi mandacü Baasa, chay Rama malca pilachishanta caćhaycülaña.

6Jinaptinmi mandacü Asa, jinantin Juda lädućhu lluy cäcunäta ayalcachimul Rama malcaćhu, Baasa pilachishan lumicunäta, ilucunäta lluy apaculcäla. Chaycunawanñatacmi Geba, Mizpa malcacunäta śhalcachila.

7Chay timpum Judapa mandacünin Asaman willacü Hanani ćhaycul nin: “Tayta Diosniquiman mana chalapacul Siriap mandacüninman chalapacuśhayquipïtamari Siriap pilyänincuna maquiquipi lluptïlun.

8¿Manachun yalpanqui Etiope, Libia lädu nunacunaca nisyu-nisyu pilyänincunawan, carritancunawan, sillädancunawan śhapämuśhanta imatá? Chaynu cayalcaptinpis Tayta Diosman chalapacuptiquimari maquiquiman ćhulaycamula.

9Tayta Diosꞌa jinantin pachätam licayan llapan śhunꞌunwan chalapacünincunacta yanapänanpä. Caynu luclu-yupay lulaśhayquipïmi cananpi puntamanꞌa pilyullaćhu cacunqui” nil.

10Chaynu willacüca niptinmi, Asa sumä piñacülul carsilcäman wićhächin. Chay timputacmi waquin nunacunäta juyupa Asa usuchila.

Mandacü Asam wañucun 1Rey 15.23-24

11Ñatac Asa mandacuyninćhu lluy lulaśhancuna Juda lädu, Israel lädu mandacünincunap isquirbishan librunćhümi cayan.

12Quimsa ćhunca isunniyu (39) wata Asa mandacuyaptinñatacmi ćhaquinwan nisyu-nisyucta ishyälun. Chaynu ishyayalpis Tayta Diosta manam ashiyculachu, aśhwanpa mïdicücunämanmi chalapacula.

13Tawa ćhunca jucniyu (41) wata mandacuyninćhu Asa wañucuptinmi, awquilluncuna pampaläśhancäman pampaśha cala.

14Chacanaman chutayculmi sumä lulay yaćhäcunäpa lulaśhan imaymana pirfümicunawan pasaycula. Jinaman yalpayninwantacmi ninacta sumä-sumä latachipäcula. Jinalculmi Davidpa Malcan nishanćhu quiquin lulachicuśhan sipultüraman pampälälila.