1Tiro malca imanuypis cananpämi, cay willacuyta ćhasquilá:
¡Tarsis lädu barcucta puśhäcuna, awćhupäcuy!
¡Tiro lädu camacaycüśhamá cayan!
¡Barcucuna ćhäpäcunancäpis pampaman muyüchishañamá cayan!
Manamá mayman yaycuycunallanpäpis canñachu.
Chipre lädućhu uyalishancänümari pampaman muyüchisha Tiro cayan.
2Lamar patanćhu yaćhäcuna,
Sidon lädu nigusyanticuna upällañari llaquiculcay.
Nigusyantiquicunamá cutiticlaylla lamarcäta chimpapäcula.
3Sijor lädup trïguncunacta, Nilo lädup cusichancunacta
sumä-cama yacunpa apamulmi, lluy nasyuncunaman lanticulanqui.
Chaynüpam am Tiro läducuna sumä cäniyüman licalïlälilanqui.
4Ñatac cananꞌa, Sidon malca, sumä pinꞌacüśha capäcuy.
Tiro sumä malca barcu puśhäcunäpa sigüru caśhancämá camacaycüśha cayan;
chay quiquin lamarcäpis niyanꞌamá:
“Imaypis mana waćhacünüñamá cayá;
imaypis dulurta mana lisïnüñamá cayá.
Walaśh wawictapis mana ishpichïnüñamá cayá,
nï wamla wawictapis wiñachïnüñamá cayá” nil.
5Cay Tiro malcap ñacayninpïta Egiptoman willacuy
ćhämuptinmari sumä-sumäta llaquiculcanꞌa.
6Canan má, Tarsis läducta willaycäliy.
Lamar patanćhu am yaćhäcuna awćhupäcuy.
7¿Manachun achca-achca wata
cushicuyllaćhu cawsä malca cala imamá?
Ćhaquin apaśhancunaćhümá
muśhü malcacunacta śhalcahipäcula.
8Nasyuncunaman mandacüta ćhulaycü Tiro malca,
¿caynu ñacachisha cananpä mayantan nila?
Lluy nigusyantin allinpä licaśha puydïcunamá capäcula;
lanticünincunapis lisisha lisisha-camamá capäcula.
9Quiquin sumä munayniyu Tayta Diosmari nila,
lluy nunatucücunäta pampaman muyuchinanpä;
jinantin pachäćhu puydïcunäta uyshulächinanpä.
10Tarsis lädu nunacuna, manañamá
barcuyquicunacta śhaycachinayquipä canñachu.
Chayurá Nilo mayup patanćhu
talpucücunänüñari talpuculcay.
11 Tayta Diosmá lamarcäman maquinta ćhulaycülun;
lluy nasyuncunätamá chucchuyman ćhulälun.
Canaan lädup sumä-cama lulaśhancuna
pampaman muyuchisha cananpämá camächin.
12Sidontam caynu nin: “Sidon malca,
usuchisha wamla, manañamá cushicuyta talinquiñachu.
Masqui śhalcuculcul Chipre läduman pasalpis,
chayćhu manañamá jamaycuyta talinquiñachu” nil.
13Caldeo läducta licapäcuyꞌari.
Chay malca manañamá canñachu.
Chunyäcäćhu cä chucaru uywacuna cananpäñamá,
Asiria nasyun muyüchin.
Paycunamá ishpinacunacta lulacuycul yaycälälin;
murällancunacta pampaman muyüchin;
malcactapis mana caśhanmanmá licalïchin.
14¡Tarsis lädu barcucta puśhäcuna awćhupäcuy!
Sumä-cama chalapacuśhayquicunämá pampaman muyüchishaña cayan.
15Chay timpucuna, Tiro malca anćhish ćhunca (70) wata jitäśham canꞌa. Mandacü cawsaśhannu anćhish ćhunca (70) wata pasäluptinmi ichá watica walmipä taquishannu, Tiro malcapäpis taquinꞌa:
16“Am, unꞌäśhaña watica walmi,
arpacta apticulcul jinantin malcacta muyumuy.
Tuqui-tuquicta tucaycuy,
mishqui-mishquicta taquiycuy;
ichaläpis yalpaśha canquiman” nil.
17Chaynümi chay anćhish ćhunca (70) watap camacayninćhu Tayta Dios Tiro malcacta watucuycü śhamunꞌa. Ñatac chay malcacá caśhantacmi nigusyüllaćhu śhunꞌun cayaptin jinantin allpäćhu cä nasyuncunäwan caśhan waticacunꞌa.
18Ñatac lluy gänaśhancunacta manamá quiquinpächu ćhulaculcanꞌa sinuꞌa Tayta Diospämi japächaycuśha canꞌa. Tayta Diospa sirbïnincuna allinta micapäcunanpä, alli-cama müdanacunawan müdaculcänanpämari uycuśha canꞌa.
Who We AreWhat We EelieveWhat We Do
2025 by iamachristian.org,Inc All rights reserved.
