2 Reyes 13 - Old Testament Quechua Wanca（QVW）

Israel lädućhu Joacazmi mandacun

1Chay Juda lädućhu Ocoziaspa chulin Joas ishcay ćhunca quimsayu (23) wata mandacü cayaptinmi, Israel lädućhu mandacuyta allaycula Jehupa chulin Joacaz. Ćhunca anćhishniyu (17) watam Samariapi pay mandacula.

2Ñatac Tayta Diospa ñawquin mana allintam lulala Nabatpa chulin Jeroboam Israel läducunäta juchacta lulachishannu. Chay lulaynincunapi manam imaypis wanaculachu.

3Chaymi Israel läducunäpä Tayta Dios sumä-sumä piñacüla. Jinalmi Siriap mandacünin Hazaelpawan chulin Ben-adadpa maquinman Israel läducunäta achca timpupä ćhulaycüla.

4Chayćhümi Tayta Diosta Joacaz mañacula. Tayta Diosñatacmi Siriap mandacünin Israel läducunäta sumä ñacachishanta licaycul mañacuyninta uyaliycula.

5Chaymi juc salbaycüninta Tayta Dios uycula. Paymi Sirio läducunap maquinpïta juluycuptin punta cawsapäcuśhannu wasinćhu-cama jawca cawsapäcula.

6Jinaycuptinpis Jeroboampa milaynincuna Israel läducunäta mana allinta lulachishan juchacunacta manam caćhaycapäculachu. Aśhwanpa Asera mamachacta alawananpä śhalcachishan ilucta jinallam Samariaćhu caćhaycapäcula.

7Ñatac Siria lädup mandacünin Israel läducunäta llaqui-llaquicta camacaycüluptinmi Joacaz ashchay nunayüllaña cayäla: Picha ćhunca (50) sillädayüllaña, pilyananpä ćhunca (10) carritayüllaña, ćhunca walanga (10,000) ćhaquiwan pilyäniyüllaña.

8Ñatac Joacazpa mandacuyninćhu lluy lulaśhancuna, llallishancunapis Israel lädu mandacünincunap isquirbishan librunćhümari cayan.

9Joacaz wañucuptinmi awquilluncuna capäcuśhan Samariaman pampälälila. Pudirninñatacmi chulin Joas mandacü cala.

Israel lädućhu Joasmi mandacun

10Chay Juda lädućhu Joas quimsa ćhunca anćhishniyu (37) wata mandacuyaptinmi Israel lädućhu Joacazpa chulin Joas mandacuyta allaycula. Chaymi Samariapi ćhunca sütayu (16) wata mandacula.

11Ñatac Tayta Diospa ñawquin mana allintam lulala. Israel läducunäta juchapacachishan Nabatpa chulin Jeroboam mana allin lulaynincunacta manamá caćhayculachu. Aśhwanpa jinallam chaycunacta lulala.

12Ñatac Joas mandacuyninćhu lluy lulaśhancuna, llallishancunapis, Juda lädup mandacünin Amasiaswan pilyaśhancunapis Israel läducunäpa mandacünincunap isquirbishan librunćhümari cayan.

13Joas wañucuptinmi Israel läducunap mandänincuna pampaläśhan Samariaman pampälälila. Paypa pudirnin Jeroboamñam dispächunćhu mandacü cala.

Eliseom wañucun

14Ñatac Eliseo ishyayal wañuypa patanćhüña cayaptinmi Israel lädup mandacünin Joas watucuycü lila. Chayćhümi macallacuycul waꞌacula: “Taytallay, taytay, Israel läducunäpa pilyänincunapïpis, carritancunapïtapis mas-maslämi calanqui” nil.

15Niptinmi Eliseo: “Achca flïchactawan ćhächicuntinta aptiy” nin.

Nishannu mandacüca aptïluptinmi,

16Eliseo nin: “Ćhächinayquipä allichacuy” nil.

Chaynu mandacüca ćhächinanpä allichacüluptinmi manquinman Eliseopis maquinta ćhulaycul nin:

17“Inti ishpimunan lädu bintanacta quićhay” nil.

Chaynu quićhäluptinmi Eliseo: “Ćhächiy” nin.

Chaynu ćhächiptinmi Eliseo nin: “Cayꞌa Tayta Diospa salbanan flïcham. Siriap maquinpïta salbanan flïchamari. Anmi Sirio läducunäta Afecćhu llallilcul camacaycülunqui” nil.

18Chaypïta mandacücäta caśhanmi nin: “Flïchacunäta aptiy” nil.

Chaynu aptïluptinmi Eliseo nin: “Canan pampäta wipyay” nil.

Niptinmi quimsa cuticamalla pampäta mandacüca wipyalcul śhaycucuycun.

19Chaymi Tayta Diospa willacünin paypa piñäcülul nin: “Sirio läducunäta lluy-lluy camacaycunayquipä picha ütac sütacamam pampäta wipyanquiman cala. Ñatac cananꞌa quimsa cutillam llalliycunqui” nil.

20Chaypïta Eliseo wañucuptinmi pampapäcula. Ñatac watan-watanmi Moab lädupi batallunnintin armädu-cama suwacuna Israel läduman śhapämü cala.

21Chaymi juc muyunćhu Israel läducunaca wañüninta pampayalcaptin batallun suwacuna śhacayämuptin Eliseo pampaläśhancämanña jitaycälälin. Ñatac Eliseop tulluncunaman tupaycülulmi wañüśhaca cawsalcamul śhalcülun.

22Má, Joacaz mandacuśhan timpu Siriap mandacünin Hazaelmi Israel läducunäta anchap usuchila.

23Tayta Diosñatacmi Israel läducunäta llaquipaycula Abrahamman, Isaacman, Jacobman limalicuśhan-laycu. Chaymi canancama paycunacta mana camacayculachu nïtac lädunpïtapis wicapälachu.

24Siriap mandacünin Hazael wañucuptinmi chulin Ben-adadña mandacüca cala.

25Chayćhümi Ben-adadpa maquinpïta Joacazpa chulin Joas quitäla, papänin Joacazta quitaśhan lluy malcacunäta. Ben-adadwan pilyaśhanćhu quimsa cutićhümi llallïla. Chaynüpamari Israel lädup malcancunacta Joas cutichicula.