2 Reyes 12 - Old Testament Quechua Wanca（QVW）

Juda lädućhu Joasmi mandacun 2Cro 24.1-27

1Chay Samariaćhu anćhish wataña Jehu mandacü cayaptinmi Jerusalen malcapi Joas mandacuyta allaycula. Paymi tawa ćhunca (40) wata mandacula. Mamanmi Beerseba lädu Sibia śhutiyu cala.

2Sasirdüti Joiada yaćhachishancätanüllamari Tayta Diospa ñawquin imaypis allincällacta Joas lulaycula.

3Chaynu cayalpis taytachacunaman uycunapä altunnin ulꞌucunäćhu cäcunäta manamá chincachilachu. Chayman nunacunaca jinallamá uycapäcula, insinsiucunactapis cañaycapäcula.

4Juc muyunćhümi sasirdüticunäta Joas nin: “Tayta Diospa illay japächapäcuśhanta alawana wasiman nunacunaca apapäcamunꞌamá: alcabäla upäcuśhanta, limalicuśhanta, śhunꞌunpi yalamuśhantapis. Chay apapäcamuśhancunacta juntapäcunquim.Exo 30.11-16.

5Chay illaycunactam sasirdüticunaca juntüniquipi-cama julapäcunqui alawana wasićhu allichaypä cäcäta allichachinayquipä” nil.

6Ñatac ishcay ćhunca quimsayu (23) wataña Joas mandacuyaptinpis sasirdüticunaca alawana wasip laꞌalaśhancunacta manam allichachipäculachu.

7Chaymi sasirdüti Joiadatawan juc sasirdüticunäta mandacüca ayalcul nicuyan: “¿¡Imapïtamá alawana wasicta mana allichachipäculanquichu!? Cananpi puntaman juntüniquicunapi amañam illayta ćhasquipäcunquichu; uywayalcalꞌa alawana wasicta allichachinanpäña uycapäcuy” nil.

8Chaymi sasirdüticunaca awnipäcula illaycäta manaña ćhasquipäcunanpä; jinaman alawana wasicta allichachiypis manañamá paypa maquinćhüñachu cala.

9Puydï sasirdüti Joiadañatacmi illay utuna cäjap täpanta ućhcüla. Jinalculmi uycuna patacpa lädunman ćhulaycula. Chayurá Tayta Diospa alawana wasinman yaycuptinꞌa allï lädućhümi cayäla. Chay puncucta täpä sasirdüticunäñatacmi alawana wasiman nunacunaca apapämuśhan illaycunäta chay cäjaman ćhulapäcula.

10Cäjaman illayca juntäluptinñatacmi mandacücäpa isquirbïninwan puydï sasirdütica Tayta Diospa alawana wasinman lipäcula julapäcamü. Chayćhu ayca illay caśhantapis licaycapäculmi ćhulapäcula.

11Ayca caśhantapis yaćhayculñam Tayta Diospa alawana wasinta allichananpä licäcunäman illayta uycapäcula. Paycunañatacmi aläja luläcunäman, allichäcunäman uycula.

12Chaynütacmi albañilcunäman, lumi labräcunämanpis uycula. Jinaman ilucunactapis, labrananpä cä lumicunactapis chaywantacmi lantila. Chaynu Tayta Diospa alawana wasinpa imancunactapis allichachinanpämari chay illayca cala.

13Ñatac Tayta Diospa alawana wasinman apapäcuśhan illaycunäwan manam illaypi bäsuncunacta, micha cuchucuncunacta, tasuncunacta, curnitillancunacta, nïtac illaypi ürupi cä ima sirbichicunactapis lulapäcunanpächu cala.

14Sinuꞌa alawana wasicta allichäcunämanmi uycapäcula allichachipäcunanpä.

15Ñatac allichachinanpä licäcunaca allin chalapacuna nuna capäcuptinmi pägananpä illay uśhancunäpi imanuy caśhantapis manaña mañapäcüchu cala.

16Juchancunapi, mana allin lulaśhancunapi upäcuśhan illaycunätañatacmi ichá sasirdüticunäpa captin alawana wasimanLev 7.7. nï apapäculachu.

17Chay tinpum Gat malcacta Siriap mandacünin Hazael pilyä yaycuycul pudiracuycula. Jinalculmi Jerusalenmanñatac Hazael pasacula.

18Chayta yaćhälulmi Juda lädup mandacünin Joas lluy juntüchila punta mandacü-masin Josafat, Joram, Ocoziaspis Tayta Diospa japächaśhan lluy cänincunacta. Chaynütacmi quiquin japächaśhantapis juntuchila. Jinaman alawana wasićhu, palasyućhu ürupi cä lluy cänincunactapis juntuchilamari. Lluy caycunacta juntuycachilmi Siriap mandacünin Hazaelman apachila. Jinaptinmi Jerusalenman manaña yaycul Hazael licula.

19Ñatac Joas mandacuyninćhu lluy lulaśhancuna Juda lädu mandacünincunap isquirbishan librunćhümi cayan.

20Mandacü Joasta puydï yanapänincunallam cuntran śhalcalcälil Sila malcaman liyaptin Bet-miloćhu wañülächila.

21Chay wañuchï yanapänincuna capäcula: Simeatpa chulin Josacar, Somerpa chulin Jozabadmi. Wañucuptinmi awquilluncuna pampaläśhan Davidpa Malcan nishanman pampälälila. Paypa pudirnin chulin Amasiasmi mandacü cala.