1Chay timpucunaćhümi Babilonia nasyunpa mandacü Merodac-baladan yaćhälun Ezequias ishyaśhanpi allinyaśhanta. (Merodac-baladanꞌa Baladanpa chulinmari cala.) Chaymi cartactawan rigälucta apachila.
2Ezequiasñatacmi chay śhamücunäta allinpä ćhasquiycul lluy ima cänincunactapis licaycachila: illaynincunacta, üruncunacta, pirfümincunacta, fïnu asaytincunacta, jinaman ćhulalä lluy armancunacta, lluy ima cänincunactapis. Palasyunćhu lluy mandacuśhanćhu cänincunactamari mana pacaycullal manya-manyapi licaycachila.
3Chaypïtam Tayta Diospa willacünin Isaias mandacü Ezequiasman lilcul nin: “¿Chay śhamü nunacunaca imactam munapäcun? ¿Maypïmi śhapämuña?” nil.
Niptinmi Ezequias: “Paycuna Babilonia calu-calu nasyunpïmi licäní śhapämuña” nin.
4Niptinmi Isaias: “¿Palasyuyquićhu imacunactamá licapäcula?” nin.
Niptinmi: “Lluy-lluy cänïcunactamá licälälin. Mana licaycälishanꞌa manamá imallapis caycunchu” nin.
5Niptinmi Isaias nin: “Sumä munayniyu Tayta Diospa nishanta canan uyaliy:
6‘Palasyuyquićhu lluy ima cäniquicunacta apacunan muyun jiꞌacaycayämunñamá; awquilluyquicuna canancama lluy juntuśhancunäta Babiloniaman apaśhañamá canꞌa. Manamá imallapis quïdaycunꞌachu; yaꞌa quiquin Tayta Diosmi niyá.
7Waquin milayniquicunactapis Babiloniamanmari prïsu puśhacunꞌa. Chayćhümi umricunäta capälunꞌa mandacücäta sirbipäcunanpä’ ” nil.
8Niptinmi Ezequias: “Tayta Dios nishanta willamäśhayquica allinmi” nin. Paymi śhunꞌunćhu nicula: “Cawsaśhäcama jawca, allinllaćh cawsaycuśhä” nil.
Who We AreWhat We EelieveWhat We Do
2025 by iamachristian.org,Inc All rights reserved.
