1Ñatac Aaronpa chulin Nadabwan Abiumi quiquillancunapi insinsiu cañacucta apticalcälil, chayman insinsiucta ćhulaycälil ninacta walalcachil Tayta Diospä cañaywan uycapäcula. Chaynu lulapäcula mana mayanpapis niycuśhamari.
2Jinaptinmi quiquin Tayta Diospi juc nina yalalcamul lluy camacaycülun. Chaynüpamá Tayta Diospa ñawpäninćhu wañuculcäla.
3Chaypïtam Aaronta Moises nin: “Caypïmi Tayta Dios limala cay nil: ‘Yaꞌaman aśhuycamücunätam chuya caśhäta camalachicuśhä. Lluy Israel caśhtacunätamari sumä caynïta camalachicuśha’ nin” nil. Aaronñatacmi mastá manaña imactapis nilachu.
4Chaypïmi Moises ayälun Aaronpa tiyun Uzielpa chulin Misaeltawan Elzafanta. Jinalculmi nin: “Cay carpapïta wañüśha aylluyquicunacta julupäcuy. Cay yaćhaśhanchiccäpi caluman apapäcuy” nil.
5Chaynu Moises nishannu śhalcamulmi yaćhapäcuśhanpi caluman müdanancunallactawan julälälila.
6Chaypïtam Aarontawan chulin Eleazarta, Itamarta Moises nin: “Jinantin malcantinpa Tayta Dios piñacülunman, jinaman amcunapis wañüläli imanquiman. Chaymi llaquicuypïta ama cala-umaculcanquichu, nïtac müdanayquitapis laćhyapäcunquichu. Ñatac lluy Israel caśhta-masiquicunam ichá llaquiculcanꞌa Tayta Dios ninawan camacaycüśhanpïta.
7Mana wañupäcunayquipä amatacmari aśhupäcunquichu cay tincuna carpap puncunpïta. Amcuna Tayta Diospa asaytinwan japächäśham cayalcanqui” nil. Chaynu Moises nishantanümari paycuna lluy lulapäcula.
Sasirdütica carpaćhu imanuypapis sirbipäcunanpämi nin8Chaypïtam Aaronta Tayta Dios nin:
9“Tincuna carpaman yaycamul amam ampis nï chuliquicunapis bïnucta nï trägucta upyapäcunquichu. Chayta lulal yanꞌalmi wañuyta talipäcunquiman. Cay camachicuy wiñaypämari lluy milayniquicunapä canꞌa.
10Chaynüpam yaćhapäcunqui mayannin allin caśhanta ütac mana allin caśhantapis; mayannin chuya caśhanta ütac anla caśhantapis.
11Cay camachicuycunacta Moisespacama Tayta Dios upäcuśhuśhayquicunacta lluy Israel caśhtacunämanmi yaćhachipäcunqui” nil.
12Chaypïtam Aaronpa puchü chulin Eleazartawan Itamarta Moises nin: “Tayta Diospa ćhacla micuyta cañaywan uycuśhayquipi puchüninta micapäcuy. Chay sumä chuya captinmi micapäcunqui mana libadürayüta uycuna pataccäpa lädullanćhu.
13Chaynu cananpämari camachisha cala: Tayta Diospä cañaywan uycuśhayquicunäpi ampa chuliquipäwan japächäśha captinmi Chuya Sityućhu micapäcunqui.Lev 6.14-18.
14Chaynütacmi ampis, walaśh wamla chuliquicunapis Chuya Sityućhu micapäcunqui: altuman pallalcul uycuśhan pïchuctawan, tücäniqui cä caćhpacta. Chay Israel caśhtacunaca allin cawsaśhanpi uycapäcuśhancunämari amcunapä caycunꞌa.
15Ñatac caćhpanwan pïchunꞌa cañaywan uycuśhä cä wilawan cuscam altuman pallalcul Tayta Diosman uycuśhä canꞌa. Chaynu lluy milayniquicunapis lulapäcunayquipä quiquin Tayta Diosmari camachin” nil.
16Chaypïtam chuyanchaśha cananpä apapämuśhan capishcäpi Moises tapucuyan. Paycunañatacmi, ¡lluy cañäläliña! Jinaptinmi Aaronpa puchü chulin Eleazarpäwan Itamarpä Moises piñacülun. Chaymi paycunacta nin:
17“¿Imapïtá chuyanchaycuśha cananpä uycuśhä aychacta unanchaśha sityućhu mana micapäculanquichu? Chayꞌa chuyamari; malcap juchanpi uycuśhamari cala.Lev 6.24-26. Chaywanmi Tayta Dios amcunactapis, malcactapis chuyanchaycü cala.
18Yawarninta chay carpap lulïninman mana apaycuyalꞌa, micapäcunquiman cala japächäśha Chuya Sityućhüćha” nil.
19Niptinmi Moisesta Aaron nin: “Licay, cananlä chulïcuna chuyanchaycuśha cananpä uycuyalcaptinchun, cañaywan uycunactapis Tayta Diosta uycuyalcaptinchun, yaꞌacunacta caycuna pasacayalcäman. Sïchuśh chuyanchaycuśha cananpä uycuśhanta canan yaꞌa micüluptí ¿Tayta Diospä allinchućh canman?” nil.
20Chaynu Aaron niptinmi Moises awnilaña.
Who We AreWhat We EelieveWhat We Do
2025 by iamachristian.org,Inc All rights reserved.
