2 Samuel 13 - Old Testament Quechua Wanca（QVW）

Amnonmi panin Tamarta firsan

1Chaypi unaypïtam caynu pasäña: Davidpa chulin Absalonpam panin Tamar sumä tuquish-tuquish cacula. Chay Tamar wamlapïmi Davidpa juc walminćhu cä chulin Amnonpa śhunꞌun manaña śhunꞌuchu cala.

2Ñatac Tamar umricta manalä lisïmi cala. Chaymi Amnon chay paninwan śhunꞌun munaśhanta lulananpä sasa captin llaquicuypi ishyätucülun.

3Chay Amnonpa amigun Jonadabmi sumä atüllaña cacula. Paymi Davidpa wawꞌi-caśhan Simeapa chulin cala.

4Chay Jonadabmi Amnonta nin: “Am mandacücäpa chulinlä cayal ¿imapïtá muyun-muyun maspa jucmanyacalpunqui? ¿Ima pasaśhuśhayquitapis manachun willaycamanquiman?” nil.

Niptinmi Amnon: “Wawꞌi-caśhá Absalonpa panin Tamarpïtam śhunꞌüpis manaña śhunꞌuchu” nin.

5Niptinmi Jonadab nin: “Ishyätuculculꞌari cämayquiman ćhaćhacuycuy. Chayćha papäniqui licä śhamuptin ninqui: ‘Ama chaynu caychu paní Tamar śhamuchun yanupämänanpä. Cay quiquinćhu yanuycapamaptin alaycamaptinćha micuycuśhä’ ” nil.

6Chaymi Amnon ishyätuculcul cämanman ćhaćhacuycun. Mandacüca licänin śhamuptinñatacmi nin: “Ama chaynu caychu, paní Tamar cayman śhalcamul ishcay culpachäśha päsaśhta lulalcul quiquin sirbiycallämächun” nil.

7Niptinmi David Tamarpa wasinman willacüta caćhälun: “Tuliqui Amnonman lil micuyta yanuycapamuy” nil.

8Chaymi tulin Amnonpa wasinman lil cämanćhu jitalayäta talïlun. Chayćhümi arinacta chapuycul ñawquinćhu culpachäśha päsaśhta lulälun.

9Jinalculmi casitucta chalalcul alaycuptin Amnonñatac mana micuyta munal nunancunacta nin: “¡Caypïta lluy yalapäcuy!” nil. Niptinmi waśhaman lluy yalälälin.

10Jinaptinmi Tamarta Amnon nin: “Cämäman micuyta apaycamul quiquiqui micaycachimay” nil.

Niptinmi lulaśhan culpachäśha päsaśhta tulin Amnon caśhancäman Tamar apapula.

11Micunanpä aśhuycachiptinñatacmi Tamarta chalacülun: “Panillay śhamuy, puñuycuśhun” nil.

12Niptinmi panin Tamar nicuyan: “¡Manam, tullillay manam! Amari firsamaychu. Caytanuꞌa Israelćhu manamá lulanchicchu. Caynu millachicuytá amari lulaychu.

13Caynu pinꞌaynïwan maytamá yaꞌa lïman. Amñatacćha Israelćhu mana allinpä licaśha canquiman. Aśhwanpa mandacücäwan limamuy. Payꞌa cuscananchicpä manamá mićhacamäśhunchu” nil.

14Niptinpis Amnonꞌa mana uyalïtucuyculmi callpanman tincüta chalacuycul burläla.

15Jinaśhanpïtam Tamarta cuyaśhanpïtapis sumä-sumä, ancha-anchap ćhïnïlul: “Śhalcuculcul wayra licuy” nin.

16Niptinmi Tamar nin: “¡Tulillay, caypïta amari alapacamaychu! Alapacämalꞌa firsamäśhayquipïtapis mas mana allintaćh lulälunquiman” nil.

Niptinpis Amnonꞌa mana uyalïtucuyculmi,

17uyway nunanta ayalcamul: “Cay walmicta waśhaman alapaculcul puncucta sumäta wićhäluy” nin.

18Niptinmi rasunpa uyway nunan alapaculcul puncucta sumäta wićhäla. Ñatac Tamar imaymana culurniyu tuqui müdanawanmi ćhulacüśha cayäla. Chaynümari mandacücäpa wamla chulincuna japallanlä cayalcal müdaculcäla.

19Chaypi alapacüluptinmi Tamar llaquicuypïta umanman ućhpacunactapis jillpucülun, tuqui müdanantapis laćhyälun; umanman maquinta ćhulacuyculmi apalcaćhaypa waꞌaśhtin licun.

20Chayta tulin Absalon yaćhälulmi Tamarta nin: “¿Tuliqui Amnonchun cayta luläśhunqui? Panillay, caypïta amaña llaquicuychu tuliqui caśhan-laycuñari mayantapis amaña willaycuychu” nil. Chay tulin Absalonpa wasinćhümi Tamar jitäśhanu llaquisha quïdacula.

21Caycunacta mandacü David yaćhälulmi sumä-sumäta piñacüla. Ñatac Amnonta mayur chulin captinmi imactapis mana nilachu.

22Absalonpis wawꞌi-caśhan Amnon panin Tamarta firsaśhanpi sumä ćhïniyalpis manam imallactapis niyculachu.

Absalonmi wawꞌi-caśhan Amnonta wañuchin

23Chaypïta ishcay wata pasäluptinmi Absalonpa millwa lutünincuna lutuyalcäla Efrain lädu Baal-hazorćhu. Chaymanmi mandacücäpa lluy chulincunacta ayachila.

24Quiquin Absalonmari mandacücäman lilcul nin: “Taytay, cay nunallayquip millwa lutünincunam lutuyalcan. Chayurá am mandacücäwan lluy nunallayqui śhapämullay” nil.

25Niptinmi mandacüca nin: “Iju, manam lluy lichwanchu. Anchap gastum ampä canman” nil.

Chayćhu Absalon maynu ruygaptinpis mandacüca manam liyta munalachu. Ñatac allin caycunanpämi ichá niycula.

26Chaymi Absalon nin: “Taytay, am mana liptiquipis ruygacuc wawꞌi-caśhá Amnonllapis yaꞌawan linanpämi” nil.

Niptinmi mandacüca: “¿Imapämi pay amwan linꞌa?” nin.

27Niptinpis Absalon jicutapayaptinmi mandacüca awnila lluy chulincunapis, Amnonpis paywan lipäcunanpä.

28Absalonñatacmi uyway nunancunacta caynu yaćhächiña: “Amnon shincäśha caśhantam licapapäcunqui. Chayćhu ‘Amnonta chalay’ niptí wañuchipäcunquim. Yaꞌami niyalcac ama manchaculcaychu. Callpanchaculcay, balinti-cama capäcuy” nil.

29Chaymi Absalonpa nishanmannu nunancuna Amnonwan lulälälila. Jinaptinmi mandacücäpa juc chulincunañatac mulanman-cama sillacalcälil ayiculcan.

30Chaynu liyalcällaptinlämi Davidman willacuy ćhälun: “Mandacücäpa lluy chulincunactam Absalon wañüchin. Manam jucllanpis puchuycunchu” nil.

31Chaymi David śhalcuculcul müdananta laćhyacuyan; llaquicuypïmi pampäman pilatacuycun. Paywan cuscatacmi lluy nunancunapis müdanancunacta laćhyacuyalcan.

32Ñatac Davidpa wawꞌi-caśhan Simeap chulin Jonadabñatacmi nin: “Taytallay, manamari lluy chuliquichu wañülälin; Amnonllactamari wañülächin. Panin Tamarta firsaśhan-pachapïtamari payta wañuchinanpä Absalon unanchäla.

33Chayurá mandacü taytallay, ama quiriychu: ‘Mandacücäpa lluy chulincunam wañucun’ nishancunacta. Amnonllamari wañucun” nil.

34Absalonñatacmi ayicuña.

Ñatac chay malcacta täpä müsum licalcuśhanćhu licäña ulꞌüpa wätanta, Horonaim caminunninpa achca nuna jiꞌalpayämüta. Chaymi mandacücäman willaycü lila.

35Chayćhümi Jonadab nin: “Mandacü taytallay, cay nunallayqui nishänümari chuliquicuna śhayalcämun” nil.

36Chaynu niyta camacällaptin-pacham mandacücäpa chulincuna ćhalälimul llaqui-llaquicta waꞌaculcan. Mandacücäpis lluy uywaynintinmi apalcaćhaypa awćhuculcan.

37Absalonñatacmi pacacamü ayicula Gesur malcap mandacünin Talmaiman. Cay Talmaimi Amiudpa chulin cala. Davidñatacmi chulin Amnonpïta walan-walan waꞌacula.

38Chaynu Gesur malcaman Absalon ayiculmi quimsa wata chayćhu camula.

39Ñatac mandacü David chulin Amnonpïta cunsuylacüśhaña cayalmi chulin Absalonta licaycuypi wañupacula.