Exodo 38 - Old Testament Quechua Wanca（QVW）

Uycuna patactawan maqui päcunactam lulapäcun Exo 27.1-8

1Chaynütacmi acacia ilupïta cañaywan uycuna patacta lulala. Tawan lädu cala ishcay mitruyu ćhawpincamam (2.5); altunñatacmi juc mitru ćhawpin (1.5) cala.

2Chay uycuna pataccällapïtam tawan isquinanćhu-cama lulala śhäcuyä wälactanu. Chaycuna juc ilullapïta luläśham cala. Brunsiwantacmi lluy uycuna pataccäta laꞌala.

3Chaynütacmi chay uycuna pataccäpa ućhpa ćhulacunta, pälanta, tasunninta, tinidurninta, śhanśha ćhulacuntapis lulala. Lluy chaycunactam brunsipïta lulala.

4Chaynütacmi mällactanu brunsipïta lulala. Chaytam uycuna patacpa śhunꞌunman ćhulala. Jinaman uycuna pataccäpa ćhawpinćhümi cala.

5Chaynütacmi chaypa tawan isquinanćhu brunsipïta tawa linlicunactapis lulala. Chaypam bäracunäta pasachila.

6Chaynütacmi acacia ilupïta brunsiwan laꞌaśha ishcay bärantapis lulala.

7Chay bärancunacta linli cäcunäpam pasachila. Chaycunam uycuna patacta wicpi caypi apanapä cala. Uycuna patacpa lulïninꞌa jäcuyämi cala. Wätancunañatacmi ilupïta cala.

8Chaynütacmi chuya carpap puncunćhu maqui paꞌacunacta täcunantinta brunsipi ćhulala. Chaycunam walmicunäpa brunsipi cä ispïjuncunawan lulaśha cala.Chuya carpap patyuntam lulan Exo 27.9-19

9Chaynütacmi chuya carpap patyuntapis lulala; sur lädu patyunpa curtïnancunam fïnu lïnupi cawpüśha cala. Largunꞌa tawa ćhunca pichayu (45) mitrum cala.

10Chay paradïruncunawan brunsipi simintuncunäñatacmi ishcay ćhunca-cama (20) cala. Argüllanwan linlincunañatacmi illaypïta cala.

11Allï lädu ipa patyunꞌa tawa ćhunca pichayu (45) mitrum cala. Paradïruncunawan simintuncunapis ishcay ćhunca ishcayniyu ćhawpi (22.5) mitrum cala. Argüllancunawan, linlincunawan, bärancunañatacmi illaypïta cala.

12Chaynütacmi inti jiꞌalpuna lädu ipa patyunꞌa ishcay ćhunca ishcayniyu ćhawpi (22.5) mitru cala. Curtïnancunapis chaynu midïdallatacmi cala. Paradïruncunawan simintuncunapis ćhunca-camam cala. Argüllancunawan bärancunañatacmi illaypi cala.

13Chaynütacmi inti ishpimunan lädu patyunpis ishcay ćhunca ishcayniyu mitru ćhawpin (22.5) cala.

14Chayćhümi anćhish mitru curtïna ćhuläśha cala. Quimsan paradïruntacmi simintuyü-cama cala.

15Puncup juc lädunćhu curtïnanpis anćhish mitrum cala. Chayćhu quimsatacmi paradïruncunapis simintuyü-cama cala.

16Chay patyup lluy muyülïninćhu curtïnacunämi fïnu lïnupi cawpüśha cala.

17Chay patyućhu lluy paradïrucunäpa simintuncuna brunsipïmi cala; argüllancunawan linlincunañatacmi illaypïta cala; paradïrucunäpa umanćhu cäcunäpis illaywan laꞌaśham cala.

18Chay patyup puncunćhu curtïnam asulpi, murädupi, pucapi, fïnu lïnupi cawpüśha cala. Jinaman tuqui-tuqui burdäśham calapis. Largunmi isun mitru cala; altunninmanñatacmi ishcay mitru ćhawpin cala.

19Chaynütacmi chay puncup tawan paradïrun brunsipïta simintuyü-cama cala. Argüllancunawan linlincunañatacmi illaypïta cala. Chaycunam paradïrup umanćhu illaypïta laꞌaśha cala.

20Chay chuya carpaćhu lluy ishtacancunapis, patyup ishtacancunapis brunsipïmi cala.

21Lluy caycunamari yaycula chuya carpacta lulananpä; cayꞌa Tayta Diospa camachicuyninpa caśhan carpanmi. Caycunacta licaycälinanpä Moises nishannu levitacunämi capäcula. Chaymari lluy licaycücunäpa puydïninca sasirdüti Aaronpa chulin Itamar cala.

22Chaynütacmi Moisesta Tayta Dios lluy camaycachishantanülla lulaycüca Bezaleel cala. Paymi Juda ayllup, Hurpa willcan, Urip chulin cala.

23Yanapäninñatacmi Aholiab cala. Paymi Dan ayllup, Ahisamacpa chulin cala. Paymari lumicunaćhu liträtucunacta labrala, chaynütac awala, jinaman burdalapis asulcunaćhu, muräducunaćhu, pucacunaćhu, fïnu lïnucunaćhüpis.

24Chay chuya carpaman yaycuśhan ürucunaca Tayta Diosta uycälinanpä apapämuśhan ürucunämi cala. Chuya carpap midïdanmannu mïdiptinꞌa isun paćhac süta ćhunca pichayu (965) quïlum yaycula.

25Chaynütacmi sinsućhu illay apapämuśhanta fintaptin ćhäla quimsa walanga quimsa paćhac ćhunca isunniyu (3,319) quïluman. Chaynu mïdisha cala chuya carpap midïdanmannümi.

26Chay sinsućhu ishcay ćhunca (20) watayüpi janaman sinsachicücunämi süta paćhac quimsa walanga picha paćhac picha ćhuncayu (603,550) capäcula.Mat 17.24. Paycunam süta grämu illayta uycapäcula.Exo 30.11-16.

27Chaynütacmi quimsa walanga quimsa paćhac (3,300) quïlu illaypis juntüśha cala. Chayta fundilculmi chuya carpap curtïnancunap paradïrunpä paćhac (100) simintuncunacta luläla. Quimsa ćhunca quimsa (33) quïlu illaypïta-camam luläśha cala.

28Ñatac chay ishcay ćhunca (20) quïlu puchü illaycunäwanꞌa lulala argüllancunactam; jinaman paradïrucunap umanćhu cäcunätam laꞌala.

29Chaynütacmi brunsicunacta uycapäcuśhanca ćhäla ishcay walanga quimsa paćhac quimsa ćhunca süta (2,336.5) quïlu ćhawpinman.

30Chaywanꞌa lulala: chuya cuartup puncunpa simintuncunacta, brunsipïta cä uycuna pataccäta, mällactanu brunsipi cäcäta, chay uycuna patacpa lluy cänincunactapis.

31Chaynütacmi lulala patyup muyülïninćhu, jinaman puncunćhu cä paradïrucunap simintuncunacta, ishtacancunactapis, chaynütac chuya carpap lluy ishtacancunactapis.