Jeremias 34 - Old Testament Quechua Wanca（QVW）

Mandacü Sedequiastam Jeremias anyapan

1Babiloniap mandacünin Nabucodonosor lluy pilyänintin, maquinćhu cä nasyuncunäpi śhamü nunacunäwanmi Jerusalen2Rey 25.1-11; 2Cro 36.17-21. malcap cuntran, chaynütac lluy tacsha malcancunap cuntran pilyayalcäla. Chaycuna pasayaptinmi Jeremiasta Tayta Dios nin:

2“Israelpa yaꞌa Tayta Diosninmi ní: Juda lädup mandacünin Sedequiasman lilcul caynu nimuy: ‘Yaꞌa Tayta Diosmi cay malcacta Babiloniap mandacüninpa maquinman ćhulaycüśhä. Jinaptïmi pay cañaycülunꞌa.

3Paypa munayninpïta am manamá ayinquichu. Aśhwanpa chalalcul paypa maquinman ćhulaycuśhuptiquim mandacücäwan cära-cära licanacunqui; chaypïta Babilonia lädumanmi apachisha canqui.

4“ ‘Chaynu captinpis yaꞌa Tayta Dios nishuśhayquitari Juda lädup mandacünin Sedequias uyaliy: Am manamari gïrraćhüchu wañunqui.

5Aśhwanpa jawcallam wañunqui. Maynümi punta mandacü awquilluyquicuna wañucuptin pirfümicunacta cañaycapäcula, chaynümi amćhüpis cañaycapäcunꞌa. Jinaman waꞌapäcunꞌalämi canpis: “Ay, taytallay taytay” nil. Yaꞌa Tayta Diosmari niyá’ ” nil.

6Chay nishancunätam willacü Jeremias Jerusalenman lilcul Juda lädup mandacünin Sedequiasta willaycula.

7Babiloniap mandacüninpa pilyänincunañatacmi ichá pilyayalcäla Jerusalenwan, Laquiswan, Azecawan. Chaynüpam Judapa murälläśha lluy malcancunäpïta chay quimsa malcallanña quïdapäcula.

Uyway nunacunäta caćhaycälinanpämi willacun

8Uyway nunacunaca caćhaycuśha lluy malcaćhu cananpä Mandacü Sedequiasmi Jerusalenćhu limalicula. Chaynu limalicüśha cayällaptinmi Jeremiasta Tayta Dios yapañatac nila.

9Chaynu limalicula Israel läducunaca uyway nunanta masqui walmictapis umrictapis caćhaycuśha cananpämari. Jinaman mayanpis malca-masinta uyway nunaman manaña muyuchinanpämá.

10Chay limalicuśhanmannümi lluy puydïcunaca, jinantin malcaca uyway nunancunacta librictaña caćhaycapäcula. Manañamá mayantapis uyway nunactanu sirbichiculcälañachu.

11Ñatac chaypïta, chayta unꞌacaycälilmi libri caćhaycuśhan walmictapis umrictapis caśhanñatac uywayninpä cuticaycälichin.

12Chaynu cayalcaptinmi Jeremiasta Tayta Dios nin:

13“Israelpa Tayta Diosninmi ní: Awquilluyquicunacta Egiptoćhu uyway nuna cayalcaptin julamuśhäćhümi yaꞌa quiquí limaliculá:

14‘Uyway nunapä lantishayqui Israel caśhta-masiquicunacta anćhish watapi-camam librictaña caćhaycapäcunqui. Quiquincuna uyway nunapä lanticücunaca süta wata sirbipäcuśhanpïtamá libri caćhaycuśha quïdapäcunꞌa’ nil. Ñatac awquilluyquicuna manamá uyaliculcälachu nï cäsuculcälachu.Exo 21.2; Deut 15.12.

15Amcunañatacmi ichá yaꞌaman cuticalcämul munaśhämannu allincäta lulaycälinqui; malca-masiqui libri cananpämá willacuyalcanqui. Chaynu lulapäcunayquipämari alawana wasïćhu, yaꞌa yaćhaná wasïćhülä limaliculcälanquipis.

16Ñatac chaypïta chayta unꞌayculmi libri caćhaycapäcuśhayqui uyway nunayquicunacta caśhan uywayniquipä cuticaycälichinqui. Chaynu lulapäcuśhayquiwanmá yaꞌacta jalutacayalcämanqui.

17“Chaymi yaꞌa Tayta Dios ní: Amcuna, wawꞌi paniquicunacta, malca-masiquicunacta libricta caćhaycälinayquipä manamá uyalicalcämälanquichu. Chaymi amcunaman caćhaycälishayqui gïrraman, ishyayman, micuy wanayman. Chayćha jinantin allpäćhu nasyuncunaca amcunacta licapäcul manchacuyllaćhu capäcunꞌa. Yaꞌa Tayta Diosmari niyá.

18Limalicuynïta ñawpänïćhu jalutacuśhayquipïmi wäcacta ćhawpipi-cama cuchulcul ćhawpinpa pasapäcul limaliculcäśhayquinu amcunactapis lulälälishayqui.

19Chaymi chaymannu Juda lädup, Jerusalen malcap puydïnincunacta, palasyućhu yanapänincunacta, sasirdütincunacta, jinantin malcäta, jinaman malta wäcap ćhawpinpa lluy pasäcunätapis,Gen 15.9-17.

20wañuchiyta munä ćhïnicünincunap maquinman jitaycüśhä. Chay ayancuna aycha micü pälïcunäpa, munti uywacunäpa micunanñamá capäcunꞌa.

21“Juda lädup mandacünin Sedequiasta lluy puydïnintintamá wañuchiyta munä ćhïnicünincunap maquinman jitaycüśhä, chay Babilonia mandacücäpa pilyänincunap maquinmanmari. Paycuna canan jawcayäśhalämi cayalcan.

22Cananmi Babilonia läducunäta yaꞌa Tayta Dios cutichimuśhä cay malcaman yaycapämunanpä, pudiracaycälinanpä, cañaycälinanpäpis. Juda läducta pasaypi chunyäyätamá caćhaycüśhä; jucllayllapis manamá quïdaycunꞌañachu” nil.