Proverbios 26 - Old Testament Quechua Wanca（QVW）

1Usya timpućhu laśhtamuśhan manamá allinchu;

cusicha timpućhu tamyamuśhanpis manamá allinchu.

Chaynümá lucluca altuman juluycuśha caśhanpis mana allinchu.

2Maynümi pichuychancaca pälicaćhacun,

wayanaycäpis muyuycaćhacun,

chaynümi yanꞌalpi mana allin cananpä nishan nunäman nï ćhanꞌachu.

3Cawallüta balsarindanwanmi manijanchic;

aśhnüta jaquimanwanmi śhaycachinchic;

luclütañatacmi garutiwan allin caminuman ćhulaycunchic.

4Lucluca ima nishuptiquipis ama imactapis niyaychu;

yanꞌalmi ampis luclupa licaśha canquiman.

5Lucluca yaćhätucüśha mana cayänanpä

luclu-cayninmannu niycüluy.

6Luclucunäwan imactapis willaycachïcá,

ćhaquinta cuchucücänümá, ütac bininucta upyäcänümá cayan.

7Luclüpa yaćhachiynin imapäpis manam bälinchu;

ćhaquin paquïsha cä yanꞌal walcaläcänümá.

8Luclu nunacta altuman juluycuyca,

waracaman lumicta watäcänümá cayan.

9Luclup yaćhachicuynin

caśhacta shinca maquinćhu aywishancänümá cayan.

10Lulawshinanpä luclucta, ütac illa nunacta mincacücá,

flïchanta yanꞌal-yanꞌalman ćhächïcänümá cayan.

11Lucluca caśhan luclu cayninta cutipayan,

allꞌuca lansapacuśhanta caśhan micücänümá.

12Quiquillanpä yaćhätucüśha nunapïtá,

luclu nunapis mas allinlämá.

13Illa nunaca lulayta mana munalmi: “Waśhaćhu liyunpis canmanćha.

Awari cällicunäćhu liyunllaćh muyuyalcan” nipäcun.

14Illacunaca cämallanćhu muyuyalcan,

puncuca quiquillanćhu muyuśhannümá.

15Illacunaca lätunman maquinta ćhulaycälilpis,

shiminman apaycuyllapis manamá apaycälinchu.

16Illacunaca, mas allin tantiayniyu anćhish nunapïtapis

mas yaćhayniyütucunlämá canpis.

17Jucpa prublimancunaman śhatipacuyꞌa,

pulicü allꞌucta linlipi chalalayäcänümá.

18Sumä flïchacunacta

lücu ćhächïcänümá,

19apanacuśhan nunacta ingañäca,

casquipäca “yanꞌallam niyculac” niyan.

20Yamta mana captinꞌa ninaca wañucunmá;

waśha limä nuna mana captinꞌa piñanacuypis chincacunmari.

21Ruydullacta ashïca pilyayllactamá mismichimun,

carbunca ninacta mismichishannu ütac yantaca ninacta latachishannu.

22Jucpa waśhanta limayca mishquinümá mishquicullan;

tumshuncamalämi pasaycunpis.

23Cutuśh manca janällanpa llutäluptin tuqui-tuqui chipyayäcänümi.

Chaynümi juyu nunap mishqui-mishqui limacuyninpis, śhunꞌunćhu caśhanta mana camalachicunchu.

24Ćhïnicü nunaca limayninwanmi ćhïnicuyninta pacaycun;

śhunꞌunćhüñatacmi ichá ingañacuylla muyuyan.

25Mishqui mishquicta limapäśhuptiquipis ama quiriychu;

śhunꞌunćhuꞌa millachicuycunallamá juntäśha cayan.

26Ćhïnicuyninta camalachiyta mana munalpis,

lluy nunacunäpa ñawpäninćhümá uyaypa camalachicunꞌa.

27Palpunanpä ućhcucta luläcá chayman quiquinmi palpunꞌa;

mitcacunanpä lumicta cućhpaycücätá chay lumi quiquintam ñitïlunꞌa.

28Ćhïnicü arti limaycunaca nanachinmi;

janä śhunꞌullanwan alawätucuycunaca pampamanmi muyuchin.