Proverbios 27 - Old Testament Quechua Wanca（QVW）

1Wala muyuncäpi ama alawacuyaychu;

wala muyunca imanuy canantapis manamá yaćhanquichu.

2Quiquillayquiꞌa amari alawacuychu;

aśhwanpa juccuna alawapäcuśhunqui.

3Lumiwan awishquica llasacunmá;

ñatac caypi masmá luclüpa piñacuynin llasacun.

4Rabyacuyca ñacachicunmi; piñacuyca llüllanümi lluy camacaycülun;

ñatac ¿mayantá imbidicuycäpa ñawpäninćhu tacyaycunman?

5Śhunꞌullanchicćhu mayantapis cuyaypïtá

mas allin cäranćhu anyapaycuymá.

6Ćhïnicüniqui uchuy shimillanwan yanꞌallamá lläwapäśhunqui.

Apanacuśhayquiñatacmi ichá nanay shimiwan piñapäśhuptiquipis chalapacuna.

7Maćhaycüśha cä nunacá urunwaypa mishquintapis millachicunmá;

micuypi cä nunäpäñatacmi ichá ćhacćhacü micuypis mishquicullan.

8Näsishan malcanta caćhaycul yanꞌal pulicücá,

ishnanta caćhaycul yanꞌal pulicü ulpaynümá.

9Pirfümiwan insinsium śhunꞌucta cushichin;

chaynümi apanacuśhanchicpa limapaycuyninpis cushichimanchic.

10Ñacayćhu cayalꞌa calućhu cä wawꞌi-caśhayquip wasinman ama liyaychu. Aśhwanpa apanacuśhayquiman ütac taytayquip apanacuśhanman liycuy.

Awari, calućhu cä wawꞌi-caśhayquipïtá mas allin läduyquićhu cä bisinuyquiman liycuymari.

11Iju, yaćhayniyu cayculꞌari śhunꞌulläta cushiycachimay.

Chayćha jamuyamänïcunäta uyalächishä.

12Tantiayniyüca mana allincäta licälulꞌa aśhucunmi.

Mana tantiayniyücäñatacmi ichá chayman yaycul ñacayninta taliycun.

13Mana lisinacuśhan nunacta garantiyäcätá, müdananta chalay;

chay garantiyäca päganancamamari müdananta chalacuycuy.

14Wäla wälalla apanacuśhan nunacta allin caycunanpä

ayaycaćhaypa niycuśhancá, mana allinpä licaśhanüñamá cayan.

15Achäquillacta ashiyä walmica tamya timpućhu

wasipi śhutuyä yacunümá.

16Chaynu walmicta upällachiyta munayꞌa waywacta śhaycachiyta

munäcänümá ütac asayticta aptilayta munäcänümá.

17Jïrruca jïrrupula afilanacuśhannümi,

nunaca nuna-masinwan tantiachinacun.

18Ïgus lantacta tuquicta licaycücá, ïguspïmi micun;

chaynümá duyñunpa cäninta tuquicta licaycücäpis altuman juluycuśha.

19Yacućhu imanuy cäran caśhantapis licacuśhannümi

śhunꞌunćhu imanuy nuna caśhantapis camalachicun.

20Wañuycäwan sipultüraca imaypis mana maćhaycuśhannümi

nunaca ima licaśhanwanpis mana maćhaycunchu.

21Üruca, illayca rasun caśhanta yaćhaycunapä

sumä-sumä ninaćhümari chulluchinchic.

Chaynümi nunäpa allin cayninta yaćhaycunchic juccuna alawaycuptin imanuypapis ćhasquishanpamari.

22Trïguctanu maynu jaluyalpis, wipyayalpis luclüpa

luclu cayninta manamá julunquimanchu.

23Uwishniquicuna imanuy caśhantapis tuquicta lisiycuy;

lluy uywactari sumäta licaycuy.

24Ima cäniquicunapis pasacüllamá;

puydï cayniquipis manamá pasaypipächu.

25Pastucunaca lutüśhaña cayaptin, chillquilimuptin,

ulꞌucunäćhüpis birdilimuptin pilwaycunquimá.

26Chaymi uwishniquicuna millwanwan müdachishunqui;

capishcunäta lanticuśhayquiwanpis ćhaclacta lantinqui.

27Capishniquicunap lichincunamá lluy aylluntinpä,

lluy sirbïnintin upyapäcunayquipä achca caycunꞌa.