1 Reyes 12 - Old Testament Quechua Wanca（QVW）

Israel caśhtacunaca ishcaymanmi laquicacun 2Cro 10.1—11.4

1Jinantin israelcunämi Shiquem malcaćhu juntunacälälila Roboamta mandacüpa ćhulapäcunanpä. Chaymanmi Roboampis lila.

2Chaytam yaćhäla Nabatpa chulin Jeroboam. Paymi mandacü Salomonpïta ayïninwan Egiptoćhu yaćhala.

3Chaymi Jeroboamta ayächimuptin israelcunäwan cusca Roboamman lipäcula. Chayćhümi Roboamta nipäcun:

4“Taytayqui sasa-sasa yüguwanlämi ñacachipämäla. Chay llasä-cama, sasa-cama yüguwan ñitichimäśhanpïtari canan jacyalpälichillämay. Chayćha am mandacünïta sirbiycälishayqui” nil.

5Niptinmi Roboam: “Canan wasiquita cuticulcay. Quimsa muyunpïtañam cutipämunqui” nin.

Niptinmi nunacunaca cuticulcäla.

6Jinalculmi mandacü Roboam papänin Salomon cawsayaptinlä sirbïnin yaśhancunacta tapucula: “¿Chay nunacunäta imanïmanmi?” nil.

7Niptinmi yaśhacunäñatac nipäcun: “Cay malcacta yanapaycul tuqui shimillayquiwan niycuptiquiꞌa paycuna wiñaypämi sirbiculcäśhunqui” nil.

8Ñatac chay yaśhacunaca limapäśhanta Roboam mana uyalicuyculmi cusca ishpipäcuśhan wiñay-masin sirbïnincunacta tapucuyan:

9“¿Imactatan chay nunacunäta nïman? Paycunamari nipäman: ‘Taytayqui sasa-cama yüguwan ñitichimäśhanpïta jacyalpaycälichillämay’ ” nil.

10Niptinmi nipäcun: “Chay sasa-cama yügu ñitiläśhancunacta jacyalpachinanpä mañacücunätam ninqui: ‘Papänïpa wiꞌawninpïtá uña dïdümi mas tita-titala canpis’ nil.

11Papäní sasa-cama yüguwanmi ñitichipäcuśhulanqui. Yaꞌa mas-mas sasanninwanlämi ñitilpachishayquipis. Papäní sumballawanmi asutipäcuśhulanqui. Yaꞌañatacmi ichá jïrru puntayu asutiwanlä camacaycälishayquipis” nil.

12Nishanmannu quimsa muyunca ćhämuptinmi Jeroboam lluy nunacunäwan caśhan cutipäcula mandacü Roboam caśhancäman.

13Mandacü Roboamñatacmi yaśhacunaca limapäśhanta mana cäsucuycul nana-nanay shimiwanlä niycülunpis.

14Chay müsucunaca limapäśhanta cäsucuyculmari nin: “Papäní sasa-cama yüguwanmi ñitichipäcuśhulanqui. Yaꞌa mas-mas sasanninwanlämi ñitilpachishayquipis. Papäní sumballawanmi asutipäcuśhulanqui. Yaꞌañatacmi ichá jïrru puntayu asutiwanlä camacaycälishayquipis” nil.

15Chaynu nilmi nunacunaca mañaculcäśhanta mandacüca mana awnilachu. Chaynu pasananpä Tayta Diosmi munala, Nabatpa chulin Jeroboamman nishanta lulaycunanpä; Silo malcayu willacü Ahiaspamari Jeroboamta nila.

16Chaynu mandacü Roboam mana uyalïtucuptinmi israelcunaca nicuyalcan:

“Davidwan manam imactapis lulananchic canchu.

Isaipa chulin mandacüninchic cananta manañamá munanchicchu.

¡David ayllucuna, aylluyquićhu mandacalcämuy!

¡Israelcunaca, wasinchicta-camaña cuticuśhun!” nil.

Nilculmi wasinta-cama lluy liculcäla.

17Roboamñatacmi Juda lädu malcacunäćhu yaćhä Israel caśhtacunäpä mandacüllanña cala.

18Chaypïta mandacü Roboam lulänincunap licänin Adoram nunanta Israel caśhtacunäman caćhaptinmi lumi tamshaywan wañülächila. Jinaptinmi mandacü Roboam carritanman mana-mana ishpiculcul Jerusalenta ayicula.

19Chaynüpam Israel caśhtacunaca Davidpa ayllunpïta laquicüśha canancamapis cayalcan.

20Chay laquicü israelcunämi Jeroboam cutïmuśha caśhanta yaćhälälil juntunacuyninman ayälälichimun. Chayćhümari lluy israelcunapä mandänin cananpä ćhulälälila. Manañamá mayannin David ayllullapis mandacü Roboamta atilañachu; Juda ayllullañamari paywan cala.

21Jerusalenman Roboam ćhälulmi Juda, Benjamin ayllucunapïta juntüla paćhac pusä ćhunca walanga (180,000) pilyäcunacta. Paycunawan jinantin Israelta llallilculmari mandacünin caśhan cananpä lipäcula.

22Ñatac Tayta Diospa nunan Semaiastam Tayta Dios nin:

23“Juda lädup mandacünin Salomonpa chulin Roboamta, Juda ayllucunäta, Benjamin ayllucunäta, jinantin malcätapis nimuy,

24Tayta Diosmi nin: ‘Israel caśhta wawꞌi-caśhayquiwanꞌa amam pilyapäcunquichu. Aśhwanpa wasiquita-cama cuticulcay. Chaynu pasananpä yaꞌapa munaynïmi cala’ ” nil.

Chaynu Tayta Dios nishanta uyaliculcalmi wasinta-cama cuticulcäla.

Taytachacunacta alawaytam Jeroboam allacuycun

25Chaypïta Efrain ulꞌucuna lädućhu cä Shiquem malcäta Jeroboam śhalcalcachilmi chayćhu yaćhala. Chaypïta Penuel malcactapis śhalcachilam.

26Jeroboammi śhunꞌunćhu nicula: “Mandacuyca Davidpa ayllunman cuticuycunmanpis canćha.

27Cay nunacunaca Jerusalenćhu cä Tayta Diospa wasinman uycü liyalcalꞌa Juda lädup mandacünin Roboamta cuyacalcälinꞌaćh. Chaynu Roboamman muyucalcälilćha yaꞌactá wañülächimanꞌa” nil.

28Chaymi Jeroboam imacta lulananpäpis caminaycünincunacta tapuycul ürupïta ishcay wäcacunacta lulächila. Jinalculmi malcäta nin: “Israelcuna, Jerusalenman anchapñam lïlälinqui. Cayćhüñam cayan Egiptopi julumuśhüniqui taytachayquicuna” nil.Exo 32.4.

29Nilculmi jucnin wäca taytachanta Bet-el malcaman ćhulachila, juccätañatacmi Dan malcaman.

30Chaywanmi lluy nunacunäta mana allinta lulachiyta ćhapala. Nunacunaca Dantawan Beteltañamari taytacha alawä lipäcula.

31Altunnincunaćhütacmi uycunacunactapis taytachancunapä lulachila. Jinalculmi Levi ayllupïta mana cä juc nunacunacta sasirdütinpä ćhulaycula.

32Jinaman pusä quillap ćhunca pichayünin muyuncäćhu juc jatun fista cananpämi Jeroboam camachila; Juda malcaćhu caśhancänu cananpä. Chay Bet-el malcaćhu cä uycuna patacćhümi taytacha lulaśhanman uycula. Chaynütacmi Bet-elćhu wäca taytacha lulachishanmanpis uycula. Chayćhu lulaycunanpäpis sasirdüticunacta ćhulayculamari.

33Chayurá Bet-elćhu uycuna patac lulaśhanćhümi Jeroboam uycula pusä quilla, ćhunca pichayu (15) muyuncäćhu. Chay quillaćhu cananpä unanchala śhunꞌun munaśhanmannümi.Lev 23.33-34. Chaynu israelcunäpä fistacta lulayculmi uycuna pataccäćhu insinsiucta lupachila.