Nahum 3 - Old Testament Quechua Wanca（QVW）

1¡Imanuylä canqui nuna wañuchicü malca!

¡Articuyllawan, juyu cayllawan juntäśha malca!

¡Waycacuycunacta mana caćhaycü malca!

2Uyaliyanchic asuticunallap suynayninta,

ruydacunap lüyayninta,

cawallucunap cap-capyayninta,

cärrucunap suynaynincunactamá.

3Cawalluman sillacüśhacunäpa cürricaćhayninta,

ispädacunap chipyayninta,

lansacunap waclintapis licayanchicmá.

Achca-achca dañädüśhacunacta,

muntun-muntun aya jitaläcunactapis licayanchicmá.

Wañücunaca mayćhüñapis timpuyaptinmari

nunacunaca mitcacaculcan.

4Lluy caycuna pasayan waticaca

waticacuśhanpa jananmá;

pay cuyayllapa tuquishllamá.

Rüjacuypá ishpisha-ishpishamá.

Nasyuncunäta waticacuyninwanmi inquitan;

rüja cayninwanmá malcacunäta ingañan.

5Sumä munayniyu Tayta Diosmi nin:

“Cayćhu cayá, amcunap cuntrayquim.

Cärayquicamamá faldinniquita alïshayqui;

calayquitam jinantin nasyuncunäman camalächishä;

pinꞌayniquitamá mandacücunäman licachishä.

6Ampa janäniquimanmá millachicuy ismaycunäta jitaycämuśhä.

Pinꞌayman ćhulaycuptïmá lluy asipäculcäśhunqui.

7Lluy licaśhüniquicunamá ampïta ayipäcunꞌa:

‘Ninive malca camacaycüśhañamá cayan.

Manañamá llaquipaycünin canñachu.

Manañamá mayantapis imasi ucunchu’ nil.

8“¿Chay Nilo mayup lädunćhu cä Tebas ćhawpinćhu täcuyä,

muyülïninćhu yaculla cä malcapi imamá?

9Etiopiawan Egipto läducunäpis

mana camacaycü callpayü-cama yanapäninmá capäcula;

Futwan Libia läducunäpis yanapänincunamari cala.

10Chaynu cayalpis Tebas prïsumá puśhaśha cala;

caminucunap pasanacuśhancunäćhümá

uruncunapis chapiwan camacaycüśha capäcula.

Allinnincunapämá chüsanacälälila;

lluy puydïnincunactamá cadinawan cadinälälila.

11“Am Ninive malca, manchacuypïtamá

shincanu chucchunqui;

ćhïnicüniquicunapïta ayilmá

mayman pacacuytapis ashinqui.

12Sumä sigüru murällayquicunapis ïgus lantaćhu

wamä puꞌuśha ïguscunanüllamá cayan;

yulacta mayanpis śhaśhächiptin

shiminman-pacha wayuynin palpücänümá canꞌa.

13Ćhïnicüniquicunawan pilyapäculpis

pilyäniquicuna walminümá cayalcanꞌa.

Puncuyquip wićhacuncunacta ninamá

lluy camacaycülunꞌa.

Jinaptinmá malcayquip lluy puncuncuna

ćhïnicüniquicunapä quićhaläcunꞌa.

14“Cunćhäśha caśhayquićhu upyanayquipäri

yacucta alistacuy.

Murällayquicunactapis mas tacyäta pilaycuy;

mitucta jalulculꞌari ladrillucunacta cusaycuy.

15Chayćhümá ninaca lupäśhunqui;

ispädaca camacaycüśhunqui,

siñaśh culütanümi pampaman muyüchishunqui.

Má, chay chuclluśhcunänu milapäcuyꞌari,

paćhcaśhcunänu milapäcuyꞌari.

16“Janay pachäćhu cä uyllurcunäpïtapis

mas-maslämá nigusyantiquicuna milälälin.

Ñatac puyuca luncuchanta caćhaycul

licuśhannümá liculcanꞌa.

17Licaycüniquicuna siñaśhcunänümá cayalcan;

camachïniquicuna timpuyä

chuclluśhcunänümá cayalcan.

Alaläcü timpućhuꞌa pilacunäćhümá laꞌalayalcan.

Acachäcü timpućhüñatacmi ichá liculcan;

manam mayćhu caśhantapis yaćhanchicchu.

18“Asiria lädu mandacü,

puydï michïniquicunamá

Chaynu caśhayquita uyalïcunämi

cushicuypïta paćhcaycaćhapäcunꞌa.

¿Mayanllactá manamá usuchilanquichu?” nil.