1 Tayta Diosllay, sumä-sumä llaquipayniquicunapïmi imaypis taquiycuśhä.
Chalapacuna caśhayquitam milaycuna pasaptinpis jinalla willaycuśhä.
2Cuyacuyniqui wiña-wiñaypä caśhantamá willacuśhä.
Chalapacuna caśhayqui sïlünu tacyaycü
caśhayquitamá willaycuśhä.
3Anmi nilanqui: “Aclacuśhämanmi limaliculá.
Uywayní Davidmanmi limaliculá:
4‘Wiña-wiñaypämi milayniquita tacyaycachishä.
Pudirniqui mandacunanpämari dispächuyquiman taycaycachishä’ ”
5 Tayta Diosllay, äśhalayllaman camana
lulaśhayquicunapïtam sïlucunaca alawapäcuśhunqui.
Chalapacuna caśhayquipïtam juntunacuynincunaćhu
japächaśhayquicunaca alawapäcuśhunqui.
6Sïlüćhu ¿mayanmá am Tayta Diosnu caycunman?
Sumä puydïcunäpa chulincunapïta
¿mayanmá am Tayta Diosnu caycunman?
7Japächäśha cäcunäpa juntunacuyninćhu sumä manchaymi canqui.
Jinantin muyülïniquićhu cäcunäpïpis sumä-sumä manchaymá canqui.
8Sumä munayniyu Tayta Diosllay,
¿mayanmá amnu chalapacuna caycunman?
Amnuꞌa sumä munayniyu manamá mayanpis canmanchu.
9Maquillayquićhümi sumä-sumä wicapacayämü lamarcäpis cayan.
Sumä piñäśha yacuncunactapis anmá jawcayaycachinqui.
10Anmá Rahab nishantapis wañüśhactanu ñitïlunqui.
Sumä munayniquiwanmá ćhinicüniquicunactapis chiꞌichinqui.
11Amllapamá janay pachäpis cay allpäpis.
Anmá lulayculanqui jinantin allpäta lluy cänintinta.
12Nurti läductawan sur läducta anmá lulalanqui.
Taborwan Hermon ulꞌucunaca śhutiquitamá alawapäcuśhunqui.
13Maquiqui sumä munayniyümi.
Liclayqui sumä callpayümi; allï maquiqui imactapis llalliycunmá.
14Dispächuyquip simintun allincäwan tincüninman licaycuycämá.
Llaquipaycuycäwan rasuncäpis puntallayquitamá ñawpaycun.
15 Tayta Diosllay, ¡ima cushicuymi alawaycuśhüniqui malcapä,
acchillayquićhu pulïcunäpä!
16Paycunamá śhutiquićhu imaypis cushiculcanꞌa.
Tincüllanman licaycuśhayquićhümá altuman juluycuśha capäcunꞌa.
17Anmá paycunacta altuman juluycüca, pudirta uycüca canqui.
Llaquipayniquiwanmá callpactapis masta uycunqui.
18Am Tayta Diosllämi atajaycamäní canqui.
Israelpa am Chuya Diosninmi lluypa mandacüní canqui.
19Unaymi sirbï chalapacüniquita suyñuyninćhu licaycachil nilanqui:
“Malcaćhu imactapis mana manchacünintam yanapaycú.
Cay aclaycuśhäcätamá altunninman juluycú.
20Sirbïní Davidtamari taliycú.
Chuya asaytïwanmi japächaycú.
21Maquïwanmi imaypis yanapaycuśhä.
Licläwanmi tacyaycachishä.
22Ćhïnicünincuna manamá yataycunꞌachu.
Mana allin nunacunaca manamá llalliycunꞌachu.
23Aśhwanpa ćhïnicünincunacta puntanćhümá camacaycüśhä.
Cuntran cäcunäta chincächishämá.
24Cuyacuynïwan chalapacuyní paywanmi caycunꞌa.
Śhutïwanmari munaynin altuman juluycuśha caycunꞌa.
25Chaynütacmi lamarcäpis maquinman ćhulaycuśha caycunꞌa.
Mayucunäpis munayllanmanmi ćhulaycuśha caycunꞌa.
26Paymi caynu ayacamanꞌa: ‘Amllamá canqui salbaycamäní Wancá,
Taytá, Diosní’ nil.
27Yaꞌañatacmi wamä chulip tücäninta uycuśhä.
Jinantin pachäćhu lluy mandacücunäpa mas altunninmanlämi ćhulaycuśhä.
28Cuyacuyní wiña-wiñaypämi paywan caycunꞌa.
Payman limalicuśhäca tacyaycuśhamá caycunꞌa.
29Milaynincunacta wiña-wiñaypämá tacyaycachishä.
Mana camacaycü sïlünümá dispächun caycunꞌa.
30“Ñatac milaynincuna yaćhachicuynïta unꞌaycul
nishämannu mana cawsapäcuptinꞌa,
31jinaman camachicuynïcunacta jalutaculcul
willacuśhäcunacta mana cäsuculcaptinꞌa,
32garutiwanmi chay mana uyaliycuyninpi mućhuycachishä.
Juchancunapïtañatacmi asutiwan lawćhaycuśhä.
33Davidpïñatacmi ichá llaquipäcuynïta nï imaypis quitaśhächu.
Chalapacuna caynïpis jinallamá caycunꞌa.
34Limalicuśhäta manamá ipanchaśhächu.
Shimïpi yalamuśhancäta manamari jucman muyuyächïmanñachu.
35Chuya caynïwanmi juc cutilla limaliculá.
Davidman manamá artipämanchu.
36Milaynincuna wiña-wiñaypämá caycunꞌa.
Dispächun intïnümá ñawpänïćhu wiña-wiñaypä caycunꞌa.
37Quillänümari wiña-wiñaypä masïsu tacyaycunꞌa.
Sïlüćhu chay ishcay cäcänümá caycunꞌa” nil. Selah
38Amñatacmi ichá aclacuśhayquipä piñacülanqui.
Juc läduman ćhulayculmi ipanchälanqui.
39Nunayquiman limalicuśhayquita mana caśhanmanmá cutïchinqui.
Curunantapis jalutacülunquimá.
40Murällantapis lluymá tuniy pawälanqui.
Sumä sigüru caynintapis pampamanmá muyüchilanqui.
41Chay caminunpa pasäcunaca waycälälinmá.
Muyülïninćhu yaćhäcunämá burlaculcan.
42Ćhïnicünincunap munaynintañatacmi ichá altuman juluyculanqui.
Lluy cuntracünincunactañatacmi cushiycachilanqui.
43Ispädanta lamüchilanquimá.
Pilyaćhu manamá yanapälanquichu.
44Dispächunta pampamanmi muyüchinqui.
Sumä allin cayninta mana caśhanmanmá licalïchinqui.
45Allin müsu cawsayninta mirmächinquimá.
¡Pinꞌaymanmá ćhulälunqui! Selah
46 Tayta Dios, ¿imaycamañatá pacacüśha cayanqui?
¿Ninanüchun piñacuyniqui walayanꞌa?
47Licaycuyꞌari cawsayní pasälla caśhanta.
¿Imapätá chincacüllacta nunacunäta lulalanqui?
48¿Mayan nuna mana wañücü canmantá?
¿Wañuycäpa maquinpi mayanllá ayinmantá? Selah
49Taytay, ¿mayćhütá punta llaquipäcuyniqui cayan?
¿Mayćhütá chalapacuna cayniquiwan Davidta limalicuśhayquica cayan?
50Taytallay, nunallayquicunacta uyshulächipämäśhanta licaycälillämayꞌari.
Achca malcacuna uyshulächipämäśhantamá śhunꞌüćhu apaycuyällá.
51 Tayta Diosllay, ćhïnicüniquicunamá chaynu jalutacayalcäman.
Maypa pulishäćhüpis chaynümá aclacuśhayquita jalutacayalcäman.
52¡Tayta Dios wiña-wiñaypä altuman juluycuśha cachun!
Chaynu cachun; chaynu cachun.
Who We AreWhat We EelieveWhat We Do
2025 by iamachristian.org,Inc All rights reserved.
