1Amozpa chulin Isaiasta Tayta Diosmi licachila
4¡Ay, juchasapa malca,
mana allin lulaywan ñitichicüśha malca,
awquilluyquicunapïpis mana allin
lulayniyu nuna, pasaypi mana allin chulicuna!
Tayta Diostamá caćhaycälälinqui.
Israelpa Chuya Tayta Diosnintamápiñälächinqui;
paytamá ipanchalälinqui.
5¿Jinallachun imaycamapis cullu linli cayalcanqui imamá?
¿May aychallayquiꞌa cayanlätan mastalä lawćhaycuśha cayta munayänayquipä?
Lluy umayquicunapis dañädullañamari cayan;
śhunꞌuyquicunapis pasa-pasaypiñamari cayan.
6Ćhaqui puntayquipi umayquicama,
manamá imallapis sänu caycunñachu;
dañädullañamá, yanamancayllañamá,
mayanpapis mana jampiycuśha wataycuśha,
asaytillawanpis mana llusiycuśha
dañädullañamá cayan.
7Nasyunniquipis pampaman muyüchishañamá cayan;
malcayquicuna cañaycüśhañamari cayan.
Licayaptiquimá ćhaclayquicunapi
juc caśhtacuna waycayalcan;
ćhïnicüniquicuna camacaycüśhannümá
lluy imapis camacaycüśha cayan.
8Tuquish Sion malca chunyayämi quïdälun.
Üba ćhaclacta täpana chucllanüllamá,
pipinillu ćhaclaćhu ramädanüllamá quïdälun;
imanaytapis mana atipal pasaypi cunćhäśhamá quïdälun.
9Sumä munayniyu Tayta Dios ashllactapis
cawsayniyüta mana caćhaycamaptinchicꞌa
Sodoma, Gomorra malcacunänüćha cachwan cala.
10Sodoma malcap puydïnincunanu cäcuna, Tayta Dios nishanta uyalipäcuy.
Gomorra malcanu cäcuna, Tayta Diosninchicpä yaćhachicuyninta uyalipäcuy.
11 Tayta Diosmi nin: “¿Imapäñamá maychica ulu uwishta
uycapämäśhayquicunapis bälin?
Amïshañamá cayá cañaywan ulu uwishcunacta uycapamäśhanwan,
wira uywacunap wilancunawan.
Chaynütac wäcacunap, uwishcunap, ulu capishcunap
yawarnincunapis manañamá śhunꞌüpäñachu.
12¿Imapäñamá apacuśha yaꞌaman śhayalcämunquipis?
¿Mayantá nipäcuśhulanqui alawana wasïpa patyunman jalutacü śhapämunayquipä?
13Mana cäpa uycamayniquiwan amaña yanꞌal apayalcämuyñachu.
Insinsiupa aśhnayninta millachicülüñamá.
Llullu quilla, jamana muyun fista, watan-watan fista
juntunacuynincunapi amïshañamá cayá.
Allinnu cä fistayquicuna mana allin yanꞌal-yanꞌalpäñamá.
14Chay llullu quilla fistayquicunacta ćhïnicümi;
watan-watan fistayquicunapi sumä amïshañamá cayá.
Manañamá awantaycüchu; licaytapis manañamá munächu.
15Maquiquicuna yawarwan chapüśha cayaptinmá,
maquiquicunacta chacchalcul mañaculcaptiquipis,
yaꞌa manaña licalcälishayquichu.
Masqui maynu-maynüpa mañaculcaptiquipis manañamá uyaliycälishayquichu.
16¡Mana allin lulayniquicunacta ñawïpïta chincachipäcuy!
¡Juchayquicunacta caćhaycapäcuy!
¡Paꞌaculcay, chuyanchaculcay!
17Aśhwanpa allincäta lulayta yaćhapäcuy.
Tincüninman licaycuycäta ashipäcuy;
usuchïcunätañatac anyapaycuy.
Mana taytayü-mamayücunäta allinpä licaycäliy;
japanyäśha walmicunäman śhalcapäcuy.
18“Tayta Diosmi nin: ‘Caypi sumäta limaycunapä, canan śhapämuy.
Mana allin lulayniquicuna masqui yawarnu puca cayaptinpis,
ñïbinu yulä-yuläman muyuycachishamá caycunꞌa.
Masqui juchayqui muräduwannu tiñïsha
cayaptinpis yulä-yulä millwamannu muyuycachishamá caycunꞌa.
19Amcuna cäsucü-cama capäculꞌa,
ćhaclayquip allinnin wayuynintalämá micapäcunquipis.
20Ñatac chaynülla cullu linli capäculꞌa ispädawan
camacaycüśhamá capäcunqui. Yaꞌa Tayta Diosmi niyá’ ” nil.
Jerusalentam cäraycul juluycun21¡Ay, chalapacuna Jerusalen malca, imanuypamá waticaman canan muyülunqui!
Tincüllanman licaycuycällam,
allin cällanman lulaycuycällam amćhu puntacta caycula;
cananñatacmi ichá wañuchicuycunallaña cayan.
22Puntacta illaynu ćhaniyümi calanqui;
cananñatacmi mana ćhaniyu anlaman licalïlunqui.
Allin bïnunümi puntacta calanqui;
cananñatacmi yacuwan yapäśha bïnumannu muyülunqui.
23Puydïniquicuna pasaypi
cullu linli-camam, suwacunap cumpinchinmi.
Yanꞌalpi mañapacuypïmi wañupacuyalcan,
imallactapis uycunallantam alcaycaćhayalcan.
Mana taytayü-mamayücunäta
tincüninmanchu manamá licaycälin;
japanyäśha walmicunätapis manamá licaycälinchu, śhalcaycälinchu.
24Chaymi israelcunap sumä munayniyu Tayta Diosnin nin:
“Am ćhïnimänïcunacta yaꞌami cutichicüśhayqui;
am cuntrá cäcunäta tincüniquimanmi uycüśhayqui.
25Jinalculmi amcunaman maquïta ćhulaycuśhä;
anlayquicunactamá lijiawannu chuyanchaycuśhä.
Lluy mana allinniquicunactamá juluycuśhä.
26Puydïniquicunacta punta allin capäcuśhantanümá canan uycälishayqui;
limapaycuśhüniquicunactapis unay
capäcuśhantanümá canan uycälishayqui.
Chayćha nipäcuśhunqui: ‘Chalapacuna Jerusalen malca;
tincüninman licaycü malca’ ” nil.
27Tayta Diospa tincünïmannümi Sion malca libraycuśha canꞌa;
mana allinninpi wanacul allin cäcunaca
salbaycuśhamá capäcunꞌa.
28Ñatac cullu linlicunäwan juchasapacunämi ichá pampaman muyüchisha capäcunꞌa.
Tayta Diosta caćhaycücunaca camacaycüśhamá capäcunꞌa.
29Chay encina nishan lantacunaćhu
taytachacunacta alawapäcuśhayquipi uyshulapäcunquimá.
Taytachayquicunacta japächaycul wirtacunaćhu alawapäcuśhayquipi,
pucayacüśhamá pinꞌayćhu capäcunqui.
30Lapin lluy palpüśha encina lantanümá capäcunqui.
Yacupïta chaquiyä wirtanümá capäcunqui.
31Sumä callpasapa nunacunaca päśhanüllamá licalipäcunꞌa;
lulaynincunapis ninap sumbayninnümá licalïlunꞌa.
Chay nunacunaca lulayninwan-cuscamá cañaycüśha capäcunꞌa;
Jinaptinmi manaña pipis wañuycachinan canꞌañachu.
Who We AreWhat We EelieveWhat We Do
2025 by iamachristian.org,Inc All rights reserved.
