2 Cronicas 21 - Old Testament Quechua Wanca（QVW）

Juda lädućhu Jorammi mandacun 2Rey 8.16-24

1Josafat wañucuptinmi awquilluncuna pampaläśhan Davidpa Malcan nishanman pampaśha cala. Chulin Joramñamá pudirnin mandacüca cala.

2Jorampa wawꞌi-caśhancunañatacmi cala: Azarias, Jehiel, Zacarias, Azarias, Micael, Sefatiaspis. Lluy paycunamari Judapa mandacünin Josafatpa chulincuna capäcula.

3Chay chulincunamanmi papänin uycula achca-achca ürucunacta, illaycunacta, imaymana ćhaniyücunacta, jinaman Juda lädućhu murälläśha malcacunactapis. Ñatac mandacuynintá mayur chuli caśhanpam Joramman uycula.

4Chay mandacuyninćhu Joram allicta tacyacuyculñatacmi, lluy wawꞌi-caśhancunacta ispädawan wañüchila; jinaman Israelćhu waquinnin puydïcunactapis wañüchilamá.

5Cay Joram mandacuyta allaycula quimsa ćhunca ishcayniyu (32) watanta liyalmi. Pusä watamari Jerusalenpi mandacula.

6Payꞌa, Israelpa mandacünincuna lulapäcuśhannu, jinaman Acab ayllu mana allin lulapäcuśhannümari lulala. Mandacü Acabpa jucnin wamla chulinwan casaracülulmari Tayta Diospa ñawquin mana allincunallacta lulala.

7Chaynu cayaptinpis Davidman limalicuśhanpam paypa milayninta Tayta Dios mana camacaycülachu. Paytamari limalicula: “Lluy milayniquipis wiñaypämi acchipäcunqui” nil.

8Chay timpu Joram mandacuyaptinmi Edom läducunaca Juda lädup cuntran śhalcacalcälilGen 27.40. quiquinpa mandacüninta ćhulacälälila.

9Jinalculmi Edom läducunaca pilyänincunawan Joramta lluy nunancunactawan cunćhälälila. Jinaptinmi chay tuta Joram śhalcacalcälil pilyänincunap puydïnincunawan, carritancunawan Edom nunacunäta atacayta allacaycälila.

10Chaynu captinpis Edom läducunaca canancamapis manañam Judapa maquinćhüñachu. Chay timputacmi Libna malcapis Juda lädup maquinpïta yaluculcäla. Chaynu pasala awquilluncunap Tayta Diosninpa cuntran Joram śhalcuśhanpïtamari.

11Jinaman Juda lädup ulꞌuncunaćhümi uycunacunacta lulachila, Jerusalenćhu cä nunacunaca taytachacunaman muyucalcälil waticaculcänanpä. Chaynüpamari Juda läducta mana allincäman jitaycula.

12Chaynu cayaptinmi willacü Elias apachimuña caynu niyäta: “Awquilluyqui Davidpa Tayta Diosninmi caynu nin:

‘Am manamá taytayqui Josafat cawsaycuśhannüchu nï Juda lädup mandacünin Asa cawsaśhannüchu cawsayculanqui.

13Aśhwanpa Israelpa mana allin mandacünincunanümi cawsayculanqui. Chaymari Acab ayllu lulaśhannu Juda lädućhu, Jerusalenćhu cä nunacunäta, taytachacunaman muyucalcälil ipanchananpä jitayculanqui. Jinaman ampïpis mas allin-cama cä, wawꞌi-caśhayquicunactapis wañüchilanquimari.

14Chaymi malcayquiman, chuliquicunaman, walmiquicunaman, ima cäniquicunamanpis Tayta Dios, juyu mućhuchicuyta ćhächimunꞌa.

15Anmanñatacmi llaqui-llaqui ishyaycunacta ćhächimunꞌa. Jampiyta manaña atipana pata nanaywanmari ishyanqui allashquiquipis yalamunancama’ ” nil.

16Chay nishannüllamari pasala. Quiquin Tayta Diosmi Jorampa cuntran Filisteo läducunäta Etiope lädućhu yaćhä Arabia nunacunäta śhalcachila.

17Chaymi Juda läduman yaycaycälil palasyućhu lluy ima ćhaniyünintapis apaculcäla, jinaman Jorampa chulincunactapis walmincunactapis. Jucllay śhullca chulin Joacazllañam cawsayniyu puchuycula.

18Chaypïta jampiyta mana atipana allashqui nanaywanmi Joramta Tayta Dios ishyächila.

19Ishcay wata jinalla sumä-sumä ishyayaptinmari allashquin yalalcamuptin wañucula. Chaynu wañucuptin awquilluncunactanüchu manam altuman juluycuyninwan imallactapis cañaycapäcula.

20Má, Joram mandacuyta allaycula quimsa ćhunca ishcayniyu (32) watanta liyalmi. Pusä watam Jerusalenpïta mandacula. Masqui Davidpa Malcanman pampayalcalpis manamá mandacücunäpa pampaläśhancunämanchu pampapäcula, nïtac mayanllapis waꞌapäculapischu.