1 Tayta Diosta alawapäcuy.
Maynu sumä tuquim Tayta Diosta alawaycuy.
Payꞌa alawaycuyta ćhasquiycunanmá.
2 Tayta Diosmá Jerusalenta śhalcachinꞌa.
Chaymanmari chiꞌisha israelcunäta pay juntuycamunꞌa.
3Manaña cawsayninćhu cäcunäta paymá cawsapacachin.
Dañäduncunactapis paymá jampiycun.
4Ayca uyllurcuna canantapis paymá niycun.
Śhutinpa-camamá lluytapis lisiycun.
5Tayta Diosninchic maynu sumä-sumämá.
Munayninpis jatu-jatunmá, yaćhayninpis mana camacaycümá.
6Mana nunatucücunäta Tayta Diosmá altuman juluycun.
Mana allin nunacunätañatacmi ichá pampäcama uyshulächin.
7Taquicunawan Tayta Diosta alawapäcuy.
Arpacunawan Tayta Diosninchicta sulpäta uculcay.
8Paymá sïlüta pucutaywan juntaycachin.
Paymá cay allpäman tamyaycachimun.
Paymá ulꞌucunäćhu pastucunätapis wiñaycachin.
9Paymá uywacunäta micaycachin.
Paymá wisculcunäpa wawin waꞌapäcuptinpis micaycachin.
10Cawallucunäpa callpan Tayta Diospá manamá imapischu
nï pilyä nunacunaca allin-cama callpayu capäcuśhanpis.
11Aśhwanpa manchacuywan cäsucünincunacta,
llaquipayninman chalapacücunäta Tayta Dios ama-pacha niycunmá.
12Jerusalenćhu yaćhäcuna, Tayta Diosta alawaycuy.
Sion, Tayta Diosniquitari alawaycuy.
13Paymá puncuyquicunap wićhacuncunacta sumäta tacyaycachin.
Paymá amćhu cä chuliquicunacta allinpä licaycun.
14Paymá malcayquiman jawca cawsayta apaycamun.
Paymá allinnin trïgucunawanlä maćhaycachishunquipis.
15Paymá limayninta cay pachäman apachimun.
Chay willacuynin waywanümá juclla ćhaycun.
16Paymá millwactanu laśhtäta maśhtaycun.
Ućhpactanu iscarchäśhäta wacaycun.
17Paymá chicchicacta ćhaycachimun.
¿Mayantá chay alaläcuy waywanta awantaycunman?
18Limayninwanñatacmi ichá lluy chullüchin.
Waywachimuptinmá yacucunäpis liyalcan.
19Jacobmantacmá willacuyninta camalaycachila.
Israelmanmi yaćhachicuyninta, camachicuyninta uycula.
20Juc nasyuncunäwanmi ichá nï chaynütachu lulaycula.
Juccuna manamá Diospa camachicuyninta lisiycälilachu.
¡Tayta Diosta alawapäcuy!
Who We AreWhat We EelieveWhat We Do
2025 by iamachristian.org,Inc All rights reserved.
