1Tayta Diostamá ayacullá.
Tayta Dios uyaliycamänanpämá mañacullá.
2Llaquicuynïcunaćhu Tayta Diosllanchictamá ashiycullá.
Tutanpapis maquilläta altuman chacchalayalmi mana jamaycul ayacullá.
Śhunꞌulläpis jawcayayta manamá taliyculachu.
3Tayta Diospi yalpalcul waꞌaculämi.
Payman yalpaćhaculcul jucmanyalämi. Selah
4Taytay, am manamá puñuycachimanquichu.
Muspayćhünu cayalmá limaytapis nï atipalächu.
5Punta muyuncunätamá,
pasä watacunätamá yalpalcú.
6Tutacunap taquishäcunätamá yalpalayá.
Śhunꞌüćhu yalpaćhaculmi tapucú:
7“Tayta Dios ¿wiñaypächućh piñacüśha cayanꞌa?
¿Manachućh allinpä caśhan licaycamäśhun?
8¿Wiñaypäñachućh llaquipaynin camacälun?
¿Pasaypipächućh limalicuynin pawälun?
9¿Llaquipäcuyta Tayta Dios unꞌälunchućh?
¿Sumäta piñacülulchućh manaña llaquipaycamanchicchu?” nil. Selah
10Chaypïmi nicú: “Sumä munayniyüca, puntanu
manaña licamäśhanchicmi, nanaypa-nanaycaman” nil.
11Chaynu captinpis Tayta Dios sumä lulaycuśhancunämanmá yalpaćhacuśhä.
Milagrucunacta punta lulaśhancunämanmá yalpaycuśhä.
12Lluy lulaycuśhayquicunämanmari yalpaćhacuśhä.
Lulaśhayquicunapïtamá willacuśhä.
13Tayta Diosllay, lulaśhayquicuna chuyamá.
¿Mayan Diosmá Tayta Diosninchicnu caycunman?
14Am Tayta Diosmá sumä lulaycunacta lulaycüca canqui.
Lluy malcacunämanmá munayniquita camalaycachinqui.
15Munayniquiwanmá malcayquita julaycamulanqui.
Jacobpa, Josepa milaynincunactamá libraycamulanqui. Selah
16Tayta Diosllay, yacucunäpis licaśhulanquimá.
Licälälilmi chucchupäcula;
lamarcunäpa lulincunapis sumä-sumätamá chucchupäcula.
17Pucutaycunäpis lücu tamyactamá caćhalpapämula.
Räyucunäpis suynatityapäculamá,
waclicunapis lluy-lluyćhümá cacula.
18Sumä waywap śhunꞌunćhümá räyuyqui paćhyatityämun.
Wacliquiñatacmi jinantin allpäta acchïlun;
allpäpis sumä-sumä cuyuywanmá śhaśhälun.
19Lamarcäpam caminuyqui pasala.
Sumä-sumä yacupmi chimpalanqui;
laśhćhuyquita manamá mayanpis talilachu.
20Moiseswan Aaronwanmá uwishtanu
malcayquita puśhachilanqui.
Who We AreWhat We EelieveWhat We Do
2025 by iamachristian.org,Inc All rights reserved.
