Josue 18 - Old Testament Quechua Wanca（QVW）

Juc ayllucunäpa tücänin allpacuna

1Israel caśhtacunäpa maquinćhüña malcacunaca cayaptinñam Silo malcaćhu juntunacuycul chuya carpacta śhalcachipäcula.

2Ñatac israelcunäćhu anćhish ayllucunalämi tücänin allpacta manalä ćhasquipäculachu.

3Chaymi israelcunäta Josue nin: “¿Awquillunchiccunap Tayta Diosnin uycuśhuśhayqui allpacta imaycamañatan mana duyñuchaculcanquichu?

4Anćhish ayllupi-cama quimsa nunacta-cama aclapämuy allpacta licä caćhanäpä. Chaynu licapämul imanuy caśhantapis willapämaptinmi laquinaculcänayquipä nipäcuśhayqui.

5Jinalculmi chay allpacta anćhishman partinqui. Juda aylluñatacmi Sur lädu allpallanćhu quïdacunꞌa. Josepa milaynincunapäñatacmi nurti lädućhu canꞌa.

6Chaynu anćhishman allpa laquishayquita isquirbiyculmi yaꞌaman apamunqui. Chayćha Tayta Diosninchicpä puntanćhu chüsaycul tücachipäcuśhayqui.

7Levi ayllucunämi ichá ima allpallactapis mana ćhasquiycälinꞌachu. Paypa tücäninꞌa Tayta Diosta sasirdütinu sirbiymi. Ñatac Gad, Ruben jinaman Manases ćhawpi ayllucunacá tücäninta ćhasquipäculañam, inti ishpimunan lädu Jordan mayup chimpanćhu. Paycunactá Tayta Diospa uywaynin Moisesmari aypuycula” nil.

8Chay nunacunaca allpacta licä lipäcunan listuña cayaptinmi Josue nin: “Jinantin allpacta licamü lipäcul laquishayquitapis isquirbiycul apapämunqui. Chaymi cay Silo malcaman cutipämuptiqui Tayta Diosninchicpa puntanćhu chüsaycul tücachipäcuśhayqui” nil.

9Niptinmi lïcunaca Josue nishantanülla lulapäcul malcan-malcan pulipäcul anćhishman laquipäcula. Chaycuna imanuy caśhantapis isquirbiyculmi Josueman apapämula Silo malcaćhu jamapäcuśhanman.

10Josueñatacmi Silo malcaćhu Tayta Diospa ñawquin chüsaycul Israel läducunäta ayllunpa-cama aypuycula.

Benjamin aylluman tücänin allpacuna

11Chayurá chaynu tücachïpam Benjamin aylluctapis aycam capäcuśhanmannu allpacta tücachila. Cay Benjamin ayllup wic lädunćhümi Juda ayllup tücänin allpancuna cayäla; juc lädunćhüñatacmi Josepa milaynincunap tücänin allpacunaca cayäla.

12Culindanmi nurti lädupi, Jordan mayupïta allaycul Jericopa nurti lädu wätanpa pasala. Chaypïta pasala inti jiꞌalpunan ulꞌucuna lädunpam aśhta chunyä Bet-avencama.

13Chaypïta Acchi malcap sur lädunpam pasala. Chay Acchi malcaca Bet-el nishatacmi cala. Chaypïtam Atarot-adar ulꞌunpa jiꞌalpamula; chay ulꞌu cayan Bet-horon malcap sur lädunćhümi.

14Chaypïta sur lädunpam filtamula inti ishpimunan läduman aśhta Quiriat-baalman ćhänancama; cayta Quiriat-jearim nipäculatacmi. Chay malcam Juda ayllucunap cala. Caycunawanmari inti jiꞌalpunan lädupi culindancuna cala.

15Sur lädupi culindanmi Quiriat-jearimpa manyan inti jiꞌalpunan lädupïta allaycul Neftoa chimpanćhu pucyuncunaman ćhäla.

16Chaypïta pasala Hinom pampap chimpan wätancunapmi; chay cala Refaim pampampa nurti lädunćhümi. Chaypïta Hinompa pampancunapmi jiꞌalpula, Jebus lädup wätancunacta muyuśhtin aśhta Rogelta ćhänancama.

17Chaypïta nurti läduman filtamulmi En-semes malcaman yalamula. Chaypïta Aduminpa wätan chimpan Gelilotpam pasala. Chaypïta Rubenpa chulin Bohan wancacta ćhulaśhancamam jiꞌalpula.

18Jinaman Bet-arabap nurti lädu wätanpam pasala; jinal Arabacamam jiꞌalpula.

19Chaypïtam Bet-hogla malcap nurti lädunpa pasala; jinal Puchucü Lamarpa nurti lädu camacaynincamam ćhäla; chay Jordan mayu camacaśhancämanmari ćhäla. Caycunamari sur lädup culindancuna cala.

20Inti ishpimunan lädup culindan Jordan mayum cala. Chaynümari Benjamin ayllup aycam capäcuśhanmannu tücänin allpacunaca cala.

21Benjamin aylluman aycam capäcuśhanmannu tücaśhan malcacunaca caycunam: Jerico, Bet-hogla, Casis pampa,

22Bet-araba, Zemaraim, Bet-el,

23Avim, Para, Ofra,

24Quefar-haamoni, Ofni, Gebapis. Chay ćhunca ishcayniyu (12) jatućhä-cama malcamari malcantin-cama cala.

25Chaypïta calatacmi: Gabaon, Rama, Beerot,

26Mizpa, Cafira, Mozah,

27Requem, Irpeel, Tarala,

28Zela, Elef, Jebus (Jebusta Jerusalen nipäculatacmi), Gabaa, jinaman Quiriatpis. Chay ćhunca tawayu (14) jatućhä-cama malcamari malcantin-cama cala. Lluy caycunamari Benjamin ayllup aycam capäcuśhanmannu tücänin malcacunaca cala.