Isaias 9 - Old Testament Quechua Wanca（QVW）

Salbacüca näsimunanpämi nin

1Chaynu captinpis, sumä ñacaywan, tutawyaywan intüśha cayca, manamá pasaypipächu canꞌa. Śhamü timpućhu Galilea lädu, Neftali, Zabulon ayllucuna caśhanca, chay juc caśhtacunawan cusca cäca, Jordan mayup juc lädunpi aśhta lamarpa patancama cäca uyshulächishamari canꞌa. Chaypïtam ichá altuman juluycuśha canꞌa.

2Tutapayćhu cä malcaca sumä acchictamá licanꞌa.

Awari, wañuycäpa jananćhüña yaćhäcunämanmi

cawsayca ćhämunꞌa.

3Nunacunäta achcaman milalcachilmá,

sumä cushicuytalä uycunqui.

Cusicha timpu cushiculcäśhannu,

gïrrapi apamuśhanta aypunaculcäśhanpi

cushiculcäśhannümá, ñawpäniquićhu cushiculcanꞌa.

4Llasacü yügucta paquishayquinümá,

asutishan sumbapïtanümá,

ñacachïninpa maquinpïta juluycunqui.

Chaynu lulaycunqui Madian malcacta lulaśhayquinümari.

5Gïrraćhu pilyäcunapa bütasnincuna,

yawarwan anläśha müdanancunapis

lluy cañaycüśhamá canꞌa;

ninamá lluy camacaycülunꞌa.

6Cushisha cayanchic iñacha yaꞌanchicćhu näsimunancäpïtamá;

juc walaśhtamari uycamanchic.

Mandacuyca paypa jananćhümá canꞌa;

paytamá nipäcunꞌa: “Sumä Limapaycü,

Allin Munayniyu Dios,

Wiña-wiñaypä cä Tayta, Jawcayaycachï Puydï” nil.

7Mandacuyninwan jawca

caynin mana camacaycümá.

Awquillun Davidpa dispächunćhümá

mayanmanpis mana śhalcullal tincüninmancama

wiña-wiñaypä mandacunꞌa.

Sumä munayniyu Tayta Dios

ancha-anchap cuyalmari chaynu lulaycunꞌa.

Israelpämi Tayta Dios sumä-sumä piñacülun

8Jacobpa cuntranmá Tayta Dios nin;

mućhuchicuynin Israelmanmi ćhaycun.

9Cayta lluy-lluymá Israel läducunaca,

Samaria malcanćhu yaćhäcunäpis yaćhapäcunꞌa.

Paycuna sumä nutatucüśha, allintucüśhalämá nipäcun:

10“Ladrillupi cä pilacunaca tunïluptinpis,

labräśha lumicunawanlämá śhalcächishun.

Sicomoro ilupi cä umralcunäta cućhpälächiptinpis,

Cedro ilucunawanlämá ćhuläśhun” nil.

11 Tayta Diosñatacmi Israelpa cuntran

Asiria läducunäta juntuycul śhalcachinꞌa.

Asiria lädup ćhïnicüninmari Siriap mandacünin Rezin cala.

Chaynütacmi Israelpa cuntran śhalcachinꞌa cay ćhïnicünincunactapis:

12Inti ishpimunan lädupïmi waquin Sirio läducunäta;

inti jiꞌalpunan lädupïñatacmi Filisteo läducunäta.

Chaynu śhalcachimuptinmari Israelta juclla millpacalpälinꞌa.

Chaywanpis Tayta Diospa piñacuynin manamá pasanꞌachu;

jinallalämá maquinta mas-mastalä ćhulaycunanpä cayanꞌa.

13Chaynu-chaynüpa mućhuycachiptinpis malcaca manamá wanaculcanꞌachu;

nïtac sumä munayniyu Tayta Diostapis ashiycälinꞌachu.

14Chaymi Tayta Dios juc muyunllaćhu Israelpa umanta, ćhupanta cutülunꞌa;

śhuꞌuśhpa ütac palmïrap pallayninta cuchücänümá cutülunꞌa.

15Chay umaca, Israelpa yaśhancunamari cayalcan;

ćhupäñatacmi Tayta Diospi willacünintucul articunallacta yaćhachïcunaca cayalcan.

16Cay malcap puydïnincuna mana allin caminucunapmi puśhälälin.

Caminaycuśha cäcunäpis pasaypi pantäśhamá quïdälälin.

17Chaymi lluy-lluy pasaypi ishcay cära, juyucama,

mana allinllacta limäcuna cayalcan.

Chaymi müsuncunacta, mana mamayu-taytayücunäta,

nï japanyäśha walmicunätapis Tayta Dios llaquipaycunꞌachu.

Chaywanpis Tayta Diospa piñacuynin manamá pasanꞌachu;

jinallalämá maquinta ćhulaycunanpä cayan.

18Chay mana allinca cayan imaymana

ulacunacta, caśhacunacta nina camacaycücänümá.

Sumä munticunätapis lupaptinmi untaynin

muyulcul-muyulcul altu-altuman ishpiyan.

19Sumä munayniyu Tayta Diospa piñacuyninpïmi

jinantin nasyunca lupanꞌa;

nunacunäñatacmi yamtanu lupananpä capäcunꞌa.

Nunacunaca wawꞌipulapis

manañamá llaquipänaculcanꞌachu.

20Cay lädućhu cäcäta lacsayalpis

manamá maćhaycunꞌachu;

wic lädućhu cäcäta jächiyalpis jinallalämi micanayanꞌa.

Aśhta nunamasincunacta camacayaptinpis

munaynin manamá pasanꞌachu.

21Manasesmi Efrainta millpucalpunꞌa;

Efrainñatacmi Manasesta lacsacalpunꞌa.

Pulanñatacmi Judata millpälälinꞌa.

Chaywanpis Tayta Diospa piñacuynin manamá pasanꞌachu;

jinallalämá maquinta masta ćhulaycunanpä cayan.