Job 32 - Old Testament Quechua Wanca（QVW）

Eliumi limayta allaycun

1Chaynu juchannä caśhanta Job jicutayaptinmi quimsan allin apanacuśhan nunacunaca upällacaycälilaña.

2Paycunawanmi Buz lädu Ram ayllu Baraquelpa chulin Eliupis cayäla. Chayćhu Job mana juchayu caśhanta licacul Tayta Diosta juchachäśhanpïtamari Eliu sumä-sumä piñacüla.

3Chaynütacmi Jobpa quimsan apanacuśhancunapäpis Eliu sumä piñacüla; Awari, Jobpa ima juchan caśhantapis mana talipäcul juchayüpäña cäraycälishanpïtamari piñacüla.

4Jinalpis Eliu mas müsullalä calpis mayurcunaca Jobwan limayta camacapäcunantalämi alcaycula.

5Ñatac Jobpa quimsan apanacuśhancunaca imaniytapis manaña atipapäcuptinmari sumä piñacüla.

6Chayćhümi Buz lädu Baraquelpa chulin Eliu nin:

“Licapamäśhayquinüpis amcunapïta

śhullca caśhä-laycum ima tantiaśhätapis limalcuyta lisirälá.

7Yaꞌa nilá: ‘Achca watayücunälä puntacta limapäcuchun;

yaśhacunälä yaćhayninmannu niycälichun’ nil.

8Ñatac yaꞌanchicćhu ispiritumari,

Sumä Munayniyücäpa jäcaycuyninmari cayan.

Chaymari yaćhayta uycamanchic lluyta.

9Chayurá yaśhacunällachu manamá yaćhayniyu;

awquishña caśhallanpachu manamá tincüninman licaycüca.

10Chaymi nilá: ‘Uyalipämay,

yaćhaśhätam yaꞌapis niycälishayqui’ nil.

11“Amcuna limapäcuśhayquicama,

allinnin limaycunacta ashipäcuśhayquicama,

yaꞌañatacmi upällalla uyaliyculá, alcayculá.

12Licalätacmi cäninman-cama Jobta

mayanllayquipis imaniytapis mana atipapäcuśhayquita.

13Chayurá ama nipämaychu: ‘Job sumä yaćhayniyümá;

Tayta Diosllari niycuchun’ nil.

14Ñatac Job manamá yaꞌawan imactapis ninaculachu.

Chaymari amcuna nipäcuśhayquinüllachu nï niycuśhä.

15“Tayta Job, cay quimsan apanacuśhayquica uman muyüśhañam cayalcan;

manañamá imaniytapis atipapäcunñachu.

16¿Paycuna imaniytapis mana atipal

upällacaycäliptinchun yaꞌapis upällacuycuśhä imamá?

17Yaꞌapis limamunäta limalcamuśhämari;

tantiaśhäta niycamuśhämi.

18Yaꞌactá limaycuna manamá faltamanchu;

ispiritümi upälla cacunäpä manaña caćhaycamanchu.

19Bïnu puꞌuyal muśhü laquictapis

paćhyachicänümari śhunꞌüćhu cacuyan.

20Chaśhnulpunäpä limanämá;

shimïta quićhalcul niycunämi.

21Mayantapis manamá śhalcuśhächu;

pictapis manamá alawaśhächu.

22Shimí manamá mayantapis alawayta yaćhanchu;

chaynu lulaptiꞌa Lulamäcäćha mućhuchimanman.