Sofonias 3 - Old Testament Quechua Wanca（QVW）

Jerusalen imanuy cananpämi nin

1¡Imanuylä canqui,

juccunactapis ñacachï,

pasaypi mana cäsucü juchasapa malca!

2Limapäśhantapis manam uyalicunchu,

anyapäśhantapis manam ćhasquicunchu.

Tayta Diosman manamá chalapacunchu,

payman manamari aśhuycunpischu.

3Paycunap puydïnincuna

liyunnümá licaycaćhayalcan;

fisnincuna tutanpa pulï atünümá

chay wälapä tullullantapis mana caćhaycapäcunchu.

4Willacünincuna nunatucüśha ipanchäcunamá.

Sasirdütincuna ima chuya cäcunätapis

anlamanmi muyülälichin,

camachicuytapis iwïlälinmá.

5Ñatac Jerusalenćhu cä Tayta Diosꞌa chuyamá.

Payꞌa manamá ima mana allinllactapis lulaycunchu.

Walan-walanmi cällanman licaycuycäta camalaycachin.

Mana manalcullalmari muyun-muyun camalaycachin.

Mana allin nunäpañatacmi ichá

pinꞌacuyninpis mana canchu.

6Tayta Diosmari nin: “Nasyuncunätam camacaycülú;

sumä sigüru murällancunactapis pampamanmi muyuycachí.

Mayanpis manaña puliptinmá

cällincunactapis pasaypiña chunyächí.

Malcancunapis pasaypi pulumäśham cayan.

Manañamá mayan nunallapis caycunchu;

manañamá jucllayllapis canñachu.

7Chayćhümi nilá: ‘Caynu lulaycuptí manchacamanꞌañaćh;

lawćhaycuśhätapis ćhasquiycamanꞌañaćh.

Chayurá yaćhaśhancunapis manañaćh camachishämannu

camacaycüśhachu canꞌa’ nil.

Ñatac paycuná imaymana mana allin lulaycunactalämi

aśhwanpa jicutäcuyalcanpis” nil.

8Chaymi Tayta Dios nin:

“Cuntrayqui śhalculcul cäraycuná

muyuncäta alcaycuy jinalla.

Lluy nasyuncunäta juntuycul

sumä piñacuynïwan mućhuycachinäpämá camayächí.

Rabyacuynïpa walaypa-walaynïwanmari

jinantin allpaca camacaycüśha canꞌa.

9“Chaypïta yaꞌa Tayta Diosmi

nunacunäpa shiminta chuyanchaycuśhä,

juc śhunꞌullaña yaꞌacta alawapämänanpä, ashipämänanpä.

10Etiopia lädu mayup wic läduncunapïtalämari

lluy chiꞌisha cä malcäní alawä śhapämunꞌa;

chaynütac uycunancunacta

uycapämänanpäpis apapämunꞌam.

11Chayćhu yaꞌap cuntrá ima lulaśhayquipïpis

manañamá pinꞌacunayqui canꞌañachu.

Puydïtucücunäta, nunatucücunäta

ampïta wicapäśhäñamari.

Chayurá chuya ulꞌüćhu manañamá

imaypis nunatucunquiñachu.

12Am caśhayquićhu mana nunatucü,

mana cäniyu nunacunallactañamari caćhaycüśhä.

Paycuna yaꞌa Tayta Diosllamanñamari

chalapacalcämanꞌa.

13Israelpi quïdäcunaca tincüllanmanñam lulaycälinꞌa;

manañamá articulcanꞌañachu,

nï mayantapis ingañapäcunꞌañachu.

Michisha capäculmari jawcallaña jamapapäcunꞌa,

mayanpapis manaña manchachisha” nil.

14Tuquish Sion lädu, cushicuywan taquipäcuy.

Israel lädu, cushicuypi apalipäcuy.

Jerusalen malca, llapan śhunꞌuyquiwan

sumä-sumä cushiculcay.

15Cäraycuśhunayquipä caśhanta

Tayta Diosmá manalcächin;

ćhïnicüniquicunactapis alapacülunmi.

Israelpa mandänin Tayta Diosmá amcunawan cayan.

Chayurá imaypis manañamá

mana allincäta manchacunayqui canꞌañachu.

16Chay muyunćhümi Jerusalenta nipäcunꞌa:

“Sion, ama manchacuychu

nï jucmanyaychu.

17 Tayta Diosniquimari amcunawan cayan.

Paymá sumä pilyä salbaycüniqui.

Ampïtamari sumä cushicunꞌa;

cuyacuyninwanmá muśhü cawsaytalä uycuśhunqui.

Cushicuypïtamá ampïta taquinꞌalä canpis” nil.

18Tayta Diosmari nin: “Fistachacuy muyunćhünümi

llaquicuyniquipïta libraycuśhayqui,

sumä pinꞌayniquipïta juluycuśhayqui.

19Chay muyunćhümi

lluy ñacachishüniquicunacta ñacachishä.

Wishtu uwishnu cäcunätamá salbaycuśhä,

alapacüśhacunätapis cutiycachimuśhämá.

Pinꞌayćhu caśhayquitamá jinantin allpäćhu

allinpä licaśha cayman muyuycachishä.

20Chay muyunćhümá cutiycälichimuśhayqui;

chay muyunćhümari juntuycälimuśhayqui.

Punta allin caśhayquimannu cutiycachilmá

jinantin allpäćhu sumä lisisha-lisisha,

allinpä licaśha cäman muyuycachishayqui.

Yaꞌa Tayta Diosmari niyá” nil.