Proverbios 1 - Old Testament Quechua Wanca（QVW）

Imapä cay yaćhachicuy caśhanpis

1Cay limaycunaca Israelpa mandacünin Davidpa chulin Salomonpa

3chaynütac sumä anyapaycunacta ćhasquiycunapä,

tincüllanman lulanapä, allincällacta lulanapä,

mana mayanmanpis śhalcullal lulanapä,

4jinaman mana yaćhäcunäta allin yaćhayniyüman muyuchinanpä,

müsucunäta allinta tantiapacachinanpä, chaynütac lisichicunanpä licaćhacachinanpäpis.

5Cayta allin tantiayniyüca uyaliculꞌa mas yaćhayniyülämi canꞌa;

allin umayücäpis mas fisyusapalämi canꞌa.

6Chayćha cay yaćhachicuy limaycuna, tincuchiycuna,

tantiachicuycuna ima ninantapis tantiaycunꞌa.

7Yaćhaycäpa allaycuyninꞌa Tayta Diosta manchacuymi;

luclucunacá yaćhaycätawan yaćhachicuycäta mana cäpämá licapäcun.Müsucunätam limapan

8Iju, taytayqui limapäśhuśhayquita uyalicuy;

mamayqui yaćhachishuśhayquita ama unꞌaycuychu.

9Chaymi juc adurnu-yupay umayquićhu tuqui caycunꞌa;

cullarnu cuncayquićhu caycunꞌa.

10Iju, juchasapacunaca juchacta lulachiyta

munaśhuśhayquiwan ama apachicuyaychu.

11Paycunam nishunqui: “Acuchun, allin nunacunäta awaytamuśhun;

yanꞌal-yanꞌal mana juchayücäta wañüchimuśhun.

12Wañücuna caśhan millpucalpuśhannu cawsayäta millpalpämuśhun;

sipultüra ayacta millpücänu millpulpämuśhun.

13Jinalcul imaymana ćhaniyu cänincunactamá talishun;

suwacamuśhanchicwanmá wasinchictapis juntächishun.

14Yaꞌacunaman jucllachacamuy,

ima quitaśhanchiccunapis luncunchicćhu llapanchicpämá canꞌa” nil.

15Iju, paycunawan ama apachicuychu;

caminuncunapi japächacuy.

16Paycuna mana allin lulayllaman liyllapïmá wañupacuyalcan;

wañuchïllactamá muspapacuyalcan.

17Pälï pishucunaca licayämuptin

trampacta ćhulay yanꞌal-yanꞌalmá.

18Ñatac chay nunacunaca quiquillanpämá trampacta ćhulacuyalcan;

quiquillanmá wañuyninta ashicuyalcan.

19Chaynümá juccunap cänincunapïta wañupacü nunacunaca camacapäcun;

wañupaculcäśhanwanmá wañuytapis talipäcun.

Yaćhaycämi müsucunäta ayaycaćhan

20Yaćhaycämi cällicunäćhu ayaycaćhan;

yaćhaycämi läsacunäćhu apalcaćhan.

21Achca nunacunaca capäcuśhanćhümá ayaycaćhan;

malcap puncunćhümá imapi caśhantapis willacun:

22“Mana tantiayniyücuna, ¿imaycamatá mana tantiayniyu caśhayquita cuyapäcunqui?

Jamuyäcuna, ¿imaycamamá jamuyayalcanqui?

Luclucuna, ¿imaycamamá yaćhaycäta ćhïnicuyalcanqui?

23Anyapäśhätari sumäta uyaliculcay.

Chayćha śhunꞌüta quićhaycul

lluy tantiaynïcunacta yaꞌa lisiycachishayqui.

24“Ayaycäliptïpis manamá śhamuyta munapäculanquichu;

maquïta chacchaycamuptïpis upatucuycälilanquimá.

25Aśhwanpam limapäśhäcunacta jamuyapämälanqui;

anyapäśhäcunacta jalutaculcälanqui.

26Chaymi ñacaycunaman ćhaptiqui yaꞌapis asipäśhayqui;

manchacuyćhu cayalcaptiqui yaꞌapis cushipäśhayqui.

27Lücu tamyanu manchacuyca śhamuśhuptiqui,

lücu waywanu mana allinca ćhäśhuptiqui,

llaquicuy sasachacuy chalaśhuptiqui asicuśhämá.

28“Chayćhülämá ayacalcämanqui, ñatac yaꞌa manam uyalishayquichu;

maynu ashipämalpis manam talipämanquichu.

29Yaćhachicuycäta jalutaculcälanquimá;

Tayta Diospa manamá manchacuyniquipis calachu.

30Limapäśhäta jitapapämälanquimá;

anyapäśhäcunacta mana cäpämá ćhulapäculanqui.

31Mana allin lulayniquip wayuynintamá apapäcunqui;

mana allin munayniquiwanmá maćhaycapäcunqui.

32Luclucunacá luclu-cayninćhümi wañupäcunꞌa;

mana tantiayniyücunätá mana tantiay munaśhanmi camacaycülunꞌa.

33Yaꞌacta uyalicamäcäñatacmi ichá jawcalla cawsaycunꞌa;

ima mana allinpïpis manamá manchacunan canꞌachu” nil.