Ezequiel 8 - Old Testament Quechua Wanca（QVW）

Alawana wasićhu millachicuycuna caśhantam Ezequielta licachin

1Canan má, süta watap, süta quillap picha muyunninćhümi wasïćhu täcuyalcälá Juda lädup yaśhancunawan. Chayćhümi unꞌaypi Tayta Dios pudiracaycaman.

2Chaymi licalcuśhäćhu nuna śhäcuyätanu licälú. Wiꞌawpi ulamanꞌa ninanümi caña; wiꞌawpi janamanꞌa llipyayä brunsinümi cacuña.

5Chayćhümi Tayta Dios niman: “Am wañucülla nuna, nurti läduman licaćhacuy” nil. Nimaptin chay läduman licalcunäpämi Tayta Diosta sïlachishan taytachacta licälú; chay cayäña uycuna patacman yaycuna puncup lädunćhu, chay quiquin yaycunaćhümari.

6Chaypïtam nimam: “Am wañucülla nuna, ¿cayćhu manachun licanqui Israel läducunaca lulapäcuśhantapis imamá? ¿Manachun maynu-maynu millachicuyta lulapäcuśhantapis cayćhu licanqui imamá? Chaynu lulayalcan cay yaćhanäcäpïta calupachimayta munayninwanmá. Rasunpa, cay licaśhayquipïpis pasaypi mas millachicuy lulaycunactalämá licanquipis” nil.

7Chaypïtam alawana wasip patyunpa puncunman puśhäman. Chayćhu licalculmi pilaćhu juc ućhcucta licälú.

8Chayćhümi niman: “Am wañucülla nuna, cay pilaćhu ućhcu cäcäta mas jatunta ućhcuy” nil. Nimaptinmi ućhcuśhäćhu juc puncucta talïlú.

9Chaymi niman: “Chaypa yaycuycul millachicuy anla lulaycunacta lulapäcuśhanta licamuy” nil.

10Nimaptinmi yaycuycul pilaćhu licälú śhullwaypa pulï imaymana culucunap, millachicuy uywacunap liträtuncunacta. Chaynütacmi Israel läducunap taytachancuna dibujäśha cayäcunactapis pilaćhu licälú.

11Chay taytachacunap puntanćhümari anćhish ćhunca (70) yaśha Israel läducuna alawayalcäña. Paycunawanmi Safanpa chulin Jaazaniaspis cayäña. Lluy paycunamari insinsiu cañacunta apticälälisha-cama cayalcäña; chay cañanapä caśhancäpïmi aśhnaynin altuman ishpiña.

12Chayćhümi Tayta Dios niman: “Am wañucülla nuna, ¿licayanquichun Israel lädu yaśhacunaca tutapä cuartucunaćhu taytachancunawan ima lulapäcuśhantapis? Paycuna niyalcanmá: ‘Ima lulaśhanchictapis Tayta Dios manamá licamanchicchu. Payꞌa cay malcacta jitälunñamá’ ” nil.

13Nilculmi niman: “Cay lulaśhancunapi mas millachicuy lulapäcuśhancunactalämá licaycunquipis” nil.

14Chaypïtam Tayta Diospa alawana wasinpa nurti lädu puncunman puśhäman. Chayćhümi walmicunaca taycacaycälil taytachan Tamuz nishanta waꞌapayalcäña.

15Chaymi Tayta Dios niman: “Am wañucülla nuna, ¿chaycunacta licayanquichun? Rasunpa, chaypïtapis mas millachicuy anla lulaycunactalämi licaycunqui” nil.

16Chaypïta alawana wasip patyunmanmi puśhäman. Chay patyupi uycuna patacman linap cä ćhawpićhümi ishcay ćhunca pichayu (25) umricuna cayalcäña. Chay Tayta Diospa alawana wasinta ipanchayculmari inti yalumunan läduman unꞌulacuycul intïta alawayalcäña.

17Chayćhümi Tayta Dios niman: “Am wañucülla nuna, ¿cayta licayanquichun? Juda läducta, imapis manamá ucunchu, sumä millachicuy anla lulaycunacta lulaypis. Manamari jinantin nasyunman supayapachinacuyllawanchu juntächin, sinuꞌa piñachimaytalämi ćhapayalcanpis. Aśhta siquintapis sinꞌämanpis ćhulayalcämunlämá.

18Chaymari yaꞌapis sumä piñacuywan camacaycüśhä. Ñawïwanpis manañam licaycuśhächu nï llaquipaycuśhächu. Masqui maynu-maynu apalcaćhaywan ayacamaptinpis manamá uyaliycuśhächu” nil.