1 Samuel 1 - Old Testament Quechua Wanca（QVW）

Anapmi wawin licalin

1Efrain lädu ulꞌucunäćhümi Ramataim malcaćhu Elcana yaćhala. Paymi Jerohampa chulin cala; Jerohamñatacmi Eliupa, Eliuñatacmi Tohupa, Tohuñatacmi Zufpa chulin, Zuf cala Efrain ayllupïtam.

2Elcanapam ishcay walmin cala: Anawan Penina. Peninam wawiyu cala, Anañatacmi mana.

3Elcanam watan-watan Silo nishan malcaman lila sumä munayniyu Tayta Diosta alawaycunanpä, jinaman cañaywan uycunanpäpis. Chay Silo nishanćhümi Elipa ishcaynin chulincuna Tayta Diosta sasirdütinu sirbipäcula: Ofniwan Finees.

4Cañaywan uycunan muyun ćhämuptinñatacmi partinta uycula walmin Peninactawan walaśh-wamla chulincunacta.

5Anactam ichá allicta cuyal allinnintalä uycü cala, masqui wawin cananpä Tayta Dios mana munayaptinpis.

6Chaymi Penina usuchila Anacta Tayta Dios wawicta mana talichishanpïta.

7Chaynüllam Tayta Diospa wasinman watan-watan lipäcuptin Penina usuchila. Jinaptinmi Ana waꞌaylla-waꞌayal mana miculapischu.

8Wayapan Elcanañatacmi nin: “Ana, ¿imapïmi waꞌayanqui? ¿Imapïmi mana micunquichu? ¿Imapïmi sinticüśha cayanqui? ¿Ćhunca wawipïtapis mas ćhaniyünin manachun yaꞌa cayá?” nil.

9Juc muyunmi Silo malcaćhu micuśhanpi Ana śhalcuculcul Tayta Diosta mañacü licun. Sasirdüti Eliñatacmi Tayta Diospa wasinpa puncullanćhu täcuyäla.

10Chayćhümi Ana ancha llaquisha alli-allicta waꞌaśhtin Tayta Diosta mañacula.

11Chaymi limalicula cay nil: “Sumä munayniyu Tayta Diosllay, cay uyway nunallayquita llaquipaycamalꞌa, yalpalcamalꞌari walaśh wawicta uycallämay. Paytam ampa maquiquiman pasaypipä ćhulaycamuśhä, ächantapis manam imaypis lutucunꞌachu” nin.

12Chaynu una-unay Tayta Diosta Ana mañacuyaptinmi paypa shiminta Eli licapayäla.

13Ana śhunꞌullanćhu mañacuyaptinmari shimillan cuyuyäla; limaśhantá manam uyalilachu. Jinaptinmi sasirdüti Eli: “Shincäśhaćh cayan” nin.

14Chaymi nin: “¿Imaycamañamá shincalla cayanqui? ¡Malläyayñari!” nil.

15Niptinmi Ana nin: “Taytallay, manam shincachu cayá. Manam bïnuctapis nï imactapis upyalächu. Sinuꞌa sumä-sumä llaquicuynïtam Tayta Diospa puntanman ćhulaycuyá.

16Amari mana allin walmipä licallämaychu. Caychica timpu mañacuyälá anchap llaquicuynïćhümari” nil.

17Niptinmi sasirdüti Eli nin: “Jawcalla licuy. Israel caśhtacunap Tayta Diosnin mañacuśhayquita uycuśhunquimá” nil.

18Niptinmi Ana: “Sulpä callächun cay uywayllayquita allinpä licaycamäśhayquipïta” nin. Chaypïta Ana cuticulmi miculaña. Manañamá llaquishañachu cayäla.

19Chay walantinta wälalla śhalcuculcul Tayta Diosta alawaycälishanpïmi Rama malcaćhu cä wasinman cuticulcäla. Mañacuyninta Tayta Dios uyaliycuptinmi wayapan Elcanawan puñul Ana patayu licalïla.

20Chaynu patayu Ana licalïlulmi ishyacuynin quilla ćhämuptin walaśhta ishyacüla. Paytam Samuelwan śhutichäla: “Tayta Diosmi mañacuynïta uyaliman” nil.

21Chaypïta watan-watan lipäcuśhannu Elcana lluy aylluntin Silo malcamanmi lipäcula Tayta Diospa cañaywan uycälinanpä, jinaman limalicuśhanta lulaycamüpis.

22Ñatac Ana manam lilachu. Wayapantam nin: “Iñachäta wasinäcama yaꞌa manalämi lishälächu. Wasïlulñam ichá puśhaśhä Tayta Diosman uycuptí chayćhu pasaypipä cananpä” nil.

23Niptinmi wayapan Elcana nin: “Chayurá chulinchicta wasinayquicama quïdacuchcay; Tayta Dios limalicuśhanta lulaycuchun” nil.

Chaymi Ana quïdacula wawinta wasinancama ishpichishtin.

24Wasïluptinñatacmi masqui wawin uchuyllala cayaptinpis Silo malcaćhu cä Tayta Diospa wasinman puśhala. Apalatacmi quimsa watayu malta wäcacta, ishcay ćhunca ishcayniyu quïlu arinacta, juc wacuy bïnuctapis.

25Chayćhu malta wäcacta uyculmi Eliman wawintapis uycapäcula.

26Chayćhümi Elita Ana nin: “Taytallay, ampa läduyquićhu Tayta Diosta mañacü walmica yaꞌami cayá.

27Cay wawïpämi Tayta Diosta mañaculá; cayꞌari uycalläman.

28Yaꞌañatacmi cay wawïta Tayta Diosmanña uycú; pay cawsaśhancama Tayta Diosllactaćh sirbiycunꞌa” nil.

Chaymi Tayta Diospa puntanćhu Eli pampäcama uyshucuycula.