Levitico 7 - Old Testament Quechua Wanca（QVW）

Mana allin lulaśhanpi uycunanpämi nin

1“Mana allin lulaśhanpi uycunapä cäcä sumä chuyam. Chayurá caynümi lulaycälinqui:

2Mana allin lulaśhanpi uycunapä cä uywaca muꞌuśha canꞌa cañaywan uycunapä wañuchinan caśhan sityućhümi. Yawarnintañatac uycuna patacpa muyülïninman chächuycunꞌa.

3Jinalculmi Tayta Diosman uycunꞌa lluy wilancunacta, ćhupanćhu cä allashquincunaćhu cä wilancunactapis.

4Chaynütacmi ishcaynin lulunninta wilantincamacta, lümunćhu wilantapis uycunꞌa, chaynütac ñatinninćhu wilancunactapis lulunnintinta.

5Lluy caycunactam uycuna pataccäćhu sasirdütica cañaycunꞌa, Tayta Diosman cañaywan uycuśhä cananpä. Cay canꞌa juchan chuyanchaycuśha cananpä uycuymi.

6Chay uycuśhan uywacta sasirdüticunäpa umri aylluncunallam micapäcunꞌa. Ñatac sumä chuya caśhanpam japächäśha sityućhu micapäcunꞌa.

7“Chay juchanpi uycuśhannüllam mana allin lulaśhanpïpis uycunꞌa; cay ishcayninpäpis chaynüllactam lulaycunꞌa. Chay uywaca sasirdüti chuyanchaycücäpämi caycunꞌa.

8Chaynütacmi uywa cañaycuśhancäpa utanpis sasirdütipa caycunꞌa.

9Jinaman ninaćhu, casitućhu, mancaćhu yanüśha ćhacla micuy uycuśhancäpis sasirdütipämi caycunꞌa.

10Ñatac chaqui ütac asaytiwan chapüśha ćhacla micuy uycuśhancunacá Aaronpa milaynincunapämi iwalninca canꞌa.

Allin cawśhanpi uycunanpämi nin

11“Chaynütac allin cawsaśhanpi Tayta Diosman uycul caynümi lulaycunayqui:

12Allin cawsaśhanpi uycuyćhu sulpäta uycuyniquiwan uyculꞌa: asaytiwan chapüśha libadürannä tantacta, asaytiwan llusïsha libadürannä panquïquicta, fïnunnin arinapi asaytiwan chapüśha tantacunactapis uycunquim.

13Chaynu allin cawsaśhanpi uycuśhanćhu, uycunantacmi libadürayu tantactapis.

14Chay tantacunäpi jucta-camam Tayta Diospä japächaycunꞌa. Allin cawsaśhanpi uycuśhan tantacunaca yawarcäta chächuycü sasirdütipämari caycunꞌa.

15“Chayurá anradisicuypi ütac allin cawsaśhanpi uycuśhancäta chay quiquin muyuncällam micunꞌa. Walantinpá manam uchuyllactapis caćhaycunanchu.

16Ñatac limalicuśhanpi ütac śhunꞌunpi yalamuśhanpi uycuśhancäpïtá chay muyunllam micunꞌa; puchünintañatacmi walantinpä ćhulanꞌa.

17Quimsa muyuncamaña uycuśhan aychacta mana camacalꞌa lluyñam cañaycunꞌa.

18Sïchuśh allin cawsaśhanpi uycuśhanca quimsa muyun chuläśhactaña micüluptinꞌa chay uycuśhanca manam ćhasquishachu nï awnishachu canꞌa. Millachicuypäña aychaca licaśha cayaptinmari micüca juchanpa wayuyninta apaycunꞌa.

19“Chay aychaca ima anlamanpis tupaycüluptinꞌa manañam micunachu; cañaycünañamá.

“Ñatac allin aychätá chuya nunacunällam micapäcunꞌa.

20“Mayanpis anla cayal allin cawsaśhanpi Tayta Diosman uycuśhä aychacta micülulꞌa malcapi alüśham canꞌa.

21“Chaynütacmi anlapä licaśha cä nunap ima cänintapis ütac anlapä licaśha uywactapis ütac ima anlactapis yataycülul, chay allin cawsaśhanpi Tayta Diosman uycuśhan aychacta micülulꞌa malcapi alüśhamá canꞌa” nil.

Wilactawan yawarta mana micapäcunanpämi nin

22Chaypïta Moisestam Tayta Dios nin:

23“Israel caśhtacunätam ninqui: Amam micapäcunquichu wäcap, uwishpa, capishpa wilantapis.

24Ñatac wañüśha uywacunap wilanta ütac imapis wañulcachil ticshïsha uywap wilantapis amam micapäcunquichu. Juc licchäpäñatacmi ichá sirbichiculcanquiman.

25“Mayanpis Tayta Diosman cañaywan uycul uycuśhanpa wilanta micülulꞌa malcanpi alüśham canꞌa.

26“Chaynütacmi mayćhu chayćhu capäculpis ama micapäcunquichu pishucunap ütac juc uywacunap yawarnintá.

27Chayurá mayanpis ima yawartapis micücá malcanpi alüśham canꞌa” nil.Uycunacunaćhu sasirdüticunäpä partin cananpämi nin

28Chaypïtam Moisesta Tayta Dios nin:

29“Israel caśhtacunätam ninqui: Allin cawsaśhanpi Tayta Diosman uyculꞌa, partintañatacmi Tayta Diospa uycunꞌa.

30Tayta Diosman uycul quiquinmi cañaywan uycunꞌa: uywap pïchunta lluy wilantinta. Chay pïchu uycuśhantam ichá altuman pallalcul Tayta Diosman uycunꞌa.

31Sasirdütiñatacmi chay apaśhan wilacta uycuna patacćhu cañaycunꞌa. Pïchunñatacmi ichá Aaronpä lluy chulintinpä canꞌa.

32Chaynütacmi allin cawsaśhanpi uycapäcuśhan uywap allï caćhpan sasirdütipä pägun caycunꞌa.

33Chayurá chay allï caćhpan caycunꞌa allin cawsaśhanpi Tayta Diosman yawarcätawan wilacta uycü sasirdütipämari.

34Yaꞌa Tayta Diosmi Israel caśhtacunaca allin cawsaśhanpi altuman pallalcul uycapämäśhan pïchuctawan caćhpacta uycunäpä japächaycú sasirdüti Aaronpä lluy chulintinpä. Cay camachicuyca Israel caśhtacunäpä wiña-wiñaypämari caycunꞌa” nil.

35Chayurá Tayta Diospa cañaywan uycuśhancunäpi lluy chaycunamari Aaronpäwan chulincunapä caycunꞌa. Chaynu tücaycun sasirdütinu sirbipäcunanpä japächaycuśhan muyunpïmi.

36Quiquin Tayta Diosmari camachila llusiycul japächaycuśhan muyunpi Israel caśhtacunaca tücaycälichimänanpä. Cay camachicuy imaycamapis lluy milayninpämari canꞌa.

37Chayurá lluy caycuna camachisha cayan: cañaywan uycunapi, ćhacla micuycunacta uycunapi, jucha lulaśhanpi uycunapi, mana allin lulaśhanpi uycunapi, japächaycunapä uycunapi, allin cawsaśhanpi uycunapïpis.

38Caycunacta Sinai ulꞌüćhümi Moisesman Tayta Dios camaycachila, Sinai chunyäcäćhu Israel caśhtacunaca uycunancunacta uycälinanpä.