Exodo 37 - Old Testament Quechua Wanca（QVW）

Limalicuśhan babulcätam lulapäcun Exo 25.10-40; 27.1-8; 30.1-10

1Chaynütacmi Bezaleel lulala limalicuśhan babulcäta acacia ilupïta. Largunmi juc mitru ćhunca (1.10) cintïmitruyu cala. Anchunñatacmi süta ćhunca pichayu (65) cala. Altunninmanpis süta ćhunca pichayütacmi (65) cala.

2Chaypa lulïnintapis janänintapis ürunllanllanwanmi laꞌala; muyülïnintapis üruwanmi ribityäla.

3Jinaman tawa argüllactam ürupïta fundïla. Chaytam babulpa tawan isquinancunap ćhaquinman ćhulala.

4Chaynütacmi bäractapis acacia ilupïta lulalcul üruwan laꞌala.

5Jinalculmi ishcay argüllacunäpä pasächila. Chaymi babulta apanapä allin cala.

6Täpantañatacmi ürunllanllanpi lulala. Largunmi juc mitru ćhunca (1.10) cintimitru cala; anchunñatacmi süta ćhunca pichayu (65) cintimitru cala.

7Chaypa ishcaynin manyanmanmi ürupïta ishcay querubin anjilcunacta śhaycachila. Chay martilluwan labräśha masïsu-camam cala.

8Chay täpawan ishcaynin querubin anjilcämi jucllayllapi luläśha cala. Ñatac wic-lädu cay-lädu manyanćhümari cala.

9Chaycunap laplanmi llantuyänu quićhäśha cala. Cärancunañatacmi licanacuyänu täpaman uyshulayal licalayalcä cala.

Mïsactam lulapäcun Exo 25.23-30

10Chaynütacmi acacia ilupïta juc mïsacta lulala. Largunmi isun ćhunca (90) cintimitru cala. Anchunñatacmi tawa ćhunca pichayu (45), altunñatac süta ćhunca pichayu (65) cintimitru cala.

11Ürunllanllanwanmi lluy laꞌala, manyancunactapis üruwanmi ribityäla.

12Ürupïtacmi muyülïninćhu aläjancunactapis anćhish cintimitrupi lulala.

13Ürupïtacmi tawan ćhaquinpa wätanćhu walcalänanpä tawa argüllacta lulala.

14Chay argüllaca aläjacunäpa ulapaycascanćhümi cala. Chayman bäracunäta uśhtuycachil mïsacta apanapämari cala.

15Chay apanan bäracunactañatacmi acacia ilupi lulalcul üruwan laꞌala.

16Ürunllanllanpïtacmi chay mïsaćhu lätuncunacta, wishlancunacta, järrancunactapis, jinaman Diospa apapämuśhan upyanapä cäcunäta ćhulanapä bäsuncunactapis lulala.

Ürunllanllanpi jatun michïructam lulapäcun Exo 25.31-40

17Chaynütacmi ürunllanllanpi martilluwan labräśha jatun michïructa lulala. Jucllayllapi luläśham cala täcucun, śhäcunanca, walachicuncuna, waytancuna lluy imaymana cänincunapis.

18Chay jatun michïrup wätanpïtañatacmi süta pallaycunanu yalula. Jucnin lädunpïtam quimsa, juc lädunpïtapis quimsa.

19Chay sütantin pallaycunanu cäcunäćhümi jucninćhu-cama almindra waytanu aläjancuna cala. Lluymi capäcula umanćhu waytayü-cama.

20Chay jatun michïrup śhäcunanćhüpis tawa bäsucunam cala. Chaypis almindrap waytannümi cala.

21Chayurá jatun michïrućhu quimsa pärish pallaycunanümi cala. Chay jucnin pallaypa ulapayllanćhümi jucnin aläjan cala. Chay ishcay pallaycäpa ulapayninćhüpis juc aläjam cala. Chay quimsa pallaycäpa ulapayninćhüpis juc aläjatacmi cala.

22Chay umacunäwan pallaycunänu cäcunämi chay śhäcücällapi yalupäcula. Jucllayllapïmi martilluwan labräśha ürunllanllanpïta calapis.

23Chaynütacmi ürunllanllanpïta lulala jatun michïrup puntancunaćhu anćhish walanancunacta, micha cuchucunta, ćhulacuntapis.

24Chay jatun michïructawan lluy imancunactapis quimsa ćhunca (30) quïlu ürunllanllanwanmi lulala.

Insinsiu cañana patactam lulapäcun Exo 30.1-5

25Chaynütacmi insinsiucta cañanapä acacia ilupïta cuadrädu uycuna patacta lulala. Tawan läduncunañatacmi tawa ćhunca picha (45) cintimitruyü-cama cala; altunmanñatacmi isun ćhunca (90) cintimitru cala. Chay uycuna pataccällapïtam tawan isquinanćhu-cama lulala śhäcuya wälactanu. Chaycuna juc ilullapïta luläśham cala.

26Chay tawan läduntapis, janänincunactapis, wälancunactapis ürunllanllanwanmi laꞌala. Janapay lädu muyülïninmi ichá üruwan ribityäśha cala.

27Chay ribityäśhap ulapay manyancascanmanmi argüllacta ćhulala. Chay argüllacunaca ishcay-camam wic lädun cay lädunćhu cala. Chaypam apanapä cä bäracta pasachila.

28Chay bärancunactapis acacia ilupïta lulalculmi üruwan laꞌala.

Japächanapä chuya asaytictawan insinsiuctam lulapäcun Exo 30.22-38

29Chaynütacmi alli-cama pirfümicunacta luläcunänu lulaycula japächaycunapä cä chuya asaytictapis, allinnin chuya insinsiuctapis.