Jeremias 10 - Old Testament Quechua Wanca（QVW）

Taytachacunäpïtá rasun cä Tayta Diosllam munayniyu

1 Tayta Dios nishuśhayquita Israel malca uyalipäcuy.

2Tayta Diosmi caynu nin:

“Juc nasyuncunäpa cawsaynincunacta ama atichipäcuychu;

nïtac sïlüćhu cä siñalcunäta juc nasyuncuna

manchaculcaptinpis amcuná ama manchaculcaychu.

3Chay malcacunäpa lulaynincuna mana bälïcunallamá cayan.

Paycuna muntipi ilucta cuchulcamuptinmari

jucnin labränin sinsilwan tuquillacta lulälun.

4Jinalculmi üruwan, illaywan adurnälälin.

Mana cuyunanpämi läbucunawan martillucunawanpis

sumäta tacyälälichin.

5Chay taytachancuna śhaywanü śhäcuyllam śhäcuyalcan.

Ñatac manamá limanchu nï pulinchu.

Chaymi wicman-cayman jucpa apaycaćhaśha.

Chaycunacta ama manchaculcaychu;

manamá ima allinllactapis lulanmanchu

nï ima mana allintapis lulaycunmanchu” nil.

6 Tayta Diosllay, amnuꞌa manamá pipis canmanchu.

Sumä munayniyümi am canqui;

śhutiquipis Sumä Jatun Munayniyümá.

7Am, nasyuncunäpa mandänincäta,

¿mayanllá manatan manchacunmanchu?

Amtamari lluy-lluypis manchaculcäśhunqui.

Jinantin nasyuncunäćhu cä yaćhayniyücunäćhu,

mandacücunäćhu amnuꞌa manamá pipis canchu.

8Lluy paycuna luclucunamá;

mana yaćhayniyü-camamá.

Caśhpipi luläśhacá, ¿imactamari yaćhachinman?

9Chay taytachancuna cayan Tarsispïta

apamuśhan illaywan laꞌaśhallamari;

Ufaz lädupi apamuśhan fïnu ürullapïtamá.

Puca, murädu lataśhwan müdächishallamari cayanpis.

Chaycuna fundiyta yaćhäcunap lulaśhallancunamá;

lulay yaćhäcunallap lulaśhancunallamari cayalcan.

10 Tayta Diosñatacmi ichá rasun Dios cayan.

Payꞌa cawsä Tayta Diosmari;

wiña-wiñaypä mandacücämari.

Paypa piñacuyninwanꞌa jinantin allpämá chucchupäcun;

pay rabyacuptinꞌa ima nasyunpis manamá awantaycunchu.

11Tayta Diosmi caynu nimäla: “Taytachacunacta alawäcunäta caynu niy: ‘Sïlütapis allpätapis mana lulä taytachacunaca cay allpäpïta sïlüpïta chincaculcanꞌamá’ ” nil.

12Cay allpäta Tayta Diosñatacmi ichá sumä munayninwan lulala;

sumä yaćhayninwanmi jinantin pachäta tacyaycachila.

Sumä tantiayninwanmi sïlütapis maśhtaycula.

13Pay sumä-sumä limalcuptinmá sïlüćhu yacucunäpis bululunyapäcun;

paymá allpäpa sapinpi pucutaycunäta pallalcachin;

paymá tamyachimul räyucunätapis ćhächimun;

paymá waywätapis wićhaläśhanpïta caćhaycamun.

14Lluy nunacunaca pasaypi mana yaćhayniyu, tullu uma-camamá.

Taytacha luläcunaca uyshulapäcunmi

chay lulaśhan taytachacunaca mana cawsayniyu,

mana ispirituyu caśhanpïta.

15Chay taytachacunaca imapäpis mana bälïcunamá, asipäcunallamá.

Cäraycunan muyuncäćhuꞌa

lluymá camacaycüśha capäcunꞌa.

16Jacobpa Tayta Diosninꞌa manamá chaynüchu.

Payꞌa lluy imactapis lulaycücämá.

Israel ayllupis paypa aclacuśhanmá;

paypa śhutin Sumä Munayniyu Tayta Diosmá.

Juda läducta camacaycünanpämi willacun

17Sumä murälläśhaćhu yaćhä Juda läducuna,

ima cäniquicunactapis jucllaña ipichaculcay.

18 Tayta Diosmari nin: “Cananꞌa

cay malcaćhu yaćhäcunätam

waracawan waracänüpis alapacüśhä.

Ñacaycunacta pasapäcunanpämari ćhulaycuśhä” nil.

19¡Imanuylä yaꞌa calläśhä! ¡Pasaypi ñutüśhamá cayällá!

Cay dañädú mana jampiycunamá cayällan.

Cay ishyayní mana awantaycunañamá cayällan;

chaynu captinpis apaycuśhäñamá.

20Carpäcunamá lluy camacaycüśha cayan;

watuncunapis laćhuypa pawäśhamá cayan.

Chulïcunapis caćhaycämanñamá;

carpäta śhalcachiyta yanapämänanpäpis

manañamá pipis canñachu;

atacuncunacta chutawshimänanpäpis mayanpis manañamá canñachu.

21Michïcunäpis mana allin

michïcunänüñamá pasaypi lucluman muyülälin.

Tayta Diosta manañamá ashiycälinchu.

Chaymi mana allinćhu cayalcan;

uwishcunänüñamari nunancuna chiꞌilälin.

22Sumäta uyalipäcuy,

mana allin willacuymi śhacayämun;

nurti lädupïmá apaliypa apaliycayämun

Juda lädu malcacunäta pulumäśhaman muyüchinanpä,

atücunap yaćhananman muyüchinanpä.

Tayta Diostam Jeremias mañacun

23 Tayta Diosllay, tuquictam yaćhá

nunacunäpä cawsaynin maquinćhu mana caśhanta.

Nunacunaca manamá yaćhanchu imaycama,

imanuy cawsapäcunantapis.

24 Tayta Diosllay, lawćhaycamalꞌa

tincüniquimannuꞌari lawćhaycallämay.

Piñacuyniquiwanꞌa amari mućhuycachimaychu;

rabyaśha mućhuycachimalꞌa camacaycämanquimanćha.

25Aśhwanpa mana lisiśhuśhayqui malcacunäman,

anman mana chalapacuśhuśhayqui

nasyuncunäman piñacuyniquita ćhaycachiy.

Chaycuna Jacob ayllucunätamari millpacalpälin;

intiruntamá pasacalpälichin;

yaćhaśhan malcancunactapis lluymá camacaycälälin.